19th ICI Nuhmei Pawl General Conference Shillong Khawpuia Hmang

Shillong, November 03, 2019, Virthli (ONP): Independent Kohran Nuhmei Pawl Inkhawmpuilien vawi 19-na (19th ICI Women General Conference) chu ICI Madanrting biekin, Shillong khawpuiah November 1 - 3, 2019 sung khan 'Hun la hung tlung dinga chun an nuia (Thuvarhai 31:25)' ti thupuia hmangin phuisui taka hmang zo a lo ni tah.

Hi inkhawmpuia hin mikhuol Reception-a in report mi 339 an um a, mikhuol in report kher lo hai tiem sa chun mi 350 vel mikhuol um dinga ring a nih; ICI Nuhmei General Conference-a mikhuol fekhawm tam tak nia record a ni nghe nghe. Inkhawmpui hi Madanrting kohran in an biekin bawl mêk, biekin tharah, an intlun a; biekin le gallery-in mipui a dai tâk naw leiin Hall-ah big screen TV-in programme LIVE-a peksuok a nih.

Inkhawmpui sung hin mikhuol hai ta dingin tlungkimni (Zirtawpni) anthawk ṭumṭiek ni (Thawtanni zing) chen thlaithleng (Mess) Madanrting kohran in an buotsai a, inkhawm (Worship Service) zo zâtin thingpui le bei buotsai a ni bawk.

Inkhawmpui sung hin Pathien thuhril rawngbawlna Pi Lalthasiem (Manipur Mission Field), Pi Lalhlimpui (Senior Lecturer, Sielmat Bible College), Pi Lalthiengzo (Vice-Chairperson, Central Nuhmei Pawl) le Rev. Lalhmingthang (Secretary, Ministries, ICI) in an nei a, Pathienni sun inkhawmna ah 'Khawvel hmasawn mek le Nuhmei hai' ti thupuia hmangin, Pi Zosangkim Pudaite thuoina hnuoiah Seminar nei a ni a, Pathien inpakna hlasak rawngbawlna Meghalaya West Presbytery Choir, Voice of Angels (Madanrting Female Voice), Madanrting KTP, Shillong Sub-Hqrs. KTP, Guwahati City Church Nuhmei Pawl, Tripura Mission Field, Assam Mission Field le Arunachal Pradesh Mission Field haiin an nei bawk. Hieng hai baka hin Choreography (lâm) mawi tak el Arunachal Pradesh Mission Field haiin ṭum 2 (hni) suklangna an nei bawk a nih.

Central Nuhmei Pawl in Guwahati khawpuia Building Project an nei mêk le inzawmin Ms. Darthangmawi, Women Co-Ordinator in campaign a neina ah cheng nuoi 2 (Rupees two lakhs) vel intiem dawk a ni a, thawlawm cheng 10,000 (sing khat) vel dawl dawk a ni bawk.

Hi inkhawmpui a puitlingna dinga tha-le-zung tamtak lo sengtu Madanrting Kohran, Meghalaya West Presbytery Nuhmei Pawl le HYA Shllong Jt. Hqrs., an ṭhungna (bench) a thlâwna an inhmangtir na-ah, Central Nuhmei Pawl Chairperson Pi Lalronghak chun lawmthu a hril a, 20th ICI Women General Coneference Tuivai Presbytery-a inhmukhawm nawk seng dingin fielna a siem nghal.