Responsive Ad Slot

Nk. Elizabeth thattu ni dinga ring man

Friday, October 18, 2019

/ Posted by Simon L Infimate
Silchar, October 18, 2019, Virthli (ONP): Nilaini a Saihriem Punji 8 km vel bawra hla Dwarbond Police Station, Dholai Constituency, Cachar District, Assam hmuna Hmar nunghak Elizabeth Hmar Sungte kum 17 chaua upa suollui a ni hnunga nunrawngtaka thattu ni ngei dinga ring hai laia mi pakhat Moina Das chu zantieng 6:15PM bawr vel khan Cachar Police haiin an man. Nk.Elizabeth suolluia thattu laia thang ni dinga ring Rajen Das chu vawituk khan ama le ama an khaihlum a, tuhin Silchar Medical College, Morgue ah a ruong sie mek a nih.

Nk. Elizabeth hi Pu Rina le Pi Lingi hai nau pathum laia a pahnina niin u pakhat le sang pakhat Class 7 inch√Ľklai a nei bawk a nih. Borjalengga Higher Secondary School a Class XII final re- appear dinga in buotsai le computer DCA inch√Ľklai mek a ni a. Kar khata vawi thum home tuition a pek hlak bawk a nih. Ama hi Silchar Cachar Presbyterian Kohran a, Presbytery Choir member khawm a ni nghe nghe a nih. Vawituk khan a ruolhai chun mithli thla pumin inkhawmpui fe dingin an in an suoksan a nih.

October 16 (Nilaini) zantieng dar 3:00PM khan an in anthawka 40 minute lam Bumbasti hmuna naupang tuition pek dingin an in anthawka suok a ni a, a tlangpuia an lawi hun 5:30PM vela in an lawi ta naw leiin a u nu Pi Melody in a call a, ring 3/4 vel bawr fein a lak ta nawa, chu hnung chun not reachable a ti zawm ta pei a, a sunghai ngai a tha ta naw leiin an zawng tan tah a, zan dar 6 vel ah an in anthawka 15 minute lam vela hla leilet ah Nk. Elizabeth a ruong chu a pa in ava hmu tah a nih. Silchar Medical College and Hospital panpui nghal niin post mortem hai thaw a ni a, a ruong hi an venga zanikhan vuiliem a nih. NK. Elizabeth hi ringdan chun an suollui hnungin an thata leilet ah an dehawn nia ringhla a nih.

Nk. Elizabeth nu Pi Lingi kuomah Dr. Vanlallien Pulamte, President, HNU, Assam chun a naunu Elizabeth thattu ni thei ding awma ring a nei le a nei naw an dawnnaah chun; a tuition pekna naupang hai pa le an sangpa an ni naw chun Moina Das hai suongkuo ni dingin a ring thu a hril a. Nk. Elizabeth tuition pekna hai suongkuo chu Police haiin zani khan thu an indawn tah a, iengkhawm ringhla thei ding awm nia an hriet naw leiin Police haiin an maksan nawk el a nih. Pi Lingi in Nk. Elizabeth tuition pekna hai a ringhla nasan chu nidanga Nk. Elizabeth inlawi hlakna huna an lawi naw leia a Tuition pekna hai vel tam an fawn khawma an fawn an lak naw lei a nih. Moina Das hai suongkuo a ringhla nasan: Nk.Elizabeth hai hin Ui pathum an vaia, an In hi tlangsipa um niin an huonin an huol khuma, an in hung pan tum mihriem le rannung dang dang an hmelhriet ngai naw hai chu an lo inbau khum hlaka. October 13 ( Pathienni) zan khan Moina Das hai kel chu Nk. Elizabeth hai huona a lut leiin an Ui haiin an lo se a, an se na deu leiin Rs.4000 chawi dingin an tia. Pu Rina Elizabeth pa hai chu Moina Das hai inah fein thupha chawiin Rs.2000 peng kan cheua inrem ei tih an tia. Hi chungthuah hin an buoi deu meta, Moina Das haiin kut an lo thlakkhum met ni’n Pu Rina chun a hril. Chuongchun Rs.2000 chu an peka an Ui haiin Moina Das hai kel a se chu an laka an in tieng an chawi a ,  zana kel chu a thi zui nghal a nih.

Ringhla pahnina Moina Das hai sungkuo le an buoina thu hi Dr. Vanlallien Pulamte chun Assam Police hai kuomah fawnin a zuk hril vat tah a. Police haiin Ui sathiem hmangin a ruong umna hmun lai dappui an thawa, a ruong hmuna hmun ah Moina Das in a chapel a maksan chu Ui sathiem chun a puta a  tlanpui a. Ui sathiem chun hla nawte a phak chun Nk. Elizabeth bakkil le puonhlek a hmu nawka an bau rak raka Police hai chun an lak tah a. Chapal chu seput malamin Ui sathiem chu a tlan peia Moina Das hai In ah a tlan luta, Moina Das keraitaka a va se chat a nih. Moina Das chu thlaphangin a kheka Police hai chun an man tah a nih. Anni laia thang ve Shamiran Das chu tlan hmang sien khawm Police hai chun man vat an beisei a nih. Nk. Elizabeth chunga nunrawngtaka kuthlaka that a ninasantak hi Moina Das hai kel Nk. Elizabeth hai Ui in an se lei ni takin an lang.

Nk. Elizabeth nunrawngtaka suollui a ni hnunga that a nina chungthuah hin Barak Valley Hmar Inpui, HNU, Assam, HSA, Barak Valley Joint Headquarters le hnam dang pawl thuoitu haiin nasatakin hma an lak ve nghal a nih. HSA, Barak Valley Joint Headquarters President Tv. Lalmalsawm Thiek le Tv. Lalsiemthar, Vice-President haiin siettuoktu hai in tienga thaw ding tul, Police hai ta dinga evidence pawimaw hai lo lakhawmin hma an lo laka. Nk. Elizabeth Singson, Advocate, Silchar in a theitawpin Police tieng thil um dan hai a hril bawk a.

Pu EL Rejoy Intoate, President Hmar Inpui, Barak Valley Region in Saihriem Punjee le a sevela cheng Hmar nauhai inhriepaw a, inunauna siem that nawk zuol a pawimaw zie a hril a. Nk. Elizabeth nunrawngtaka suolluia that a nina chungthuaah hin Barak a Hmar nauhai an to tawk tawk naw ding zie le a tul dan ang peia hnamin hma a lak pei ding thu a hril a. Barak Valley a Hmar nau haiin an unaunu Nk. Elizabeth an inro zie le an sun zie inentirna dingin Ralna sum inhlana an nei a nih.

Moina Das
Don't Miss
© all rights reserved
made with by Simon L Infimate