Hi hun a hin Mr. Darthankhum chu Conductor niin Hun hawng ṭawngṭaina Pastor Ramenglien in a nei a, Inhmeihrietna le lawmlutna Mr. Lalrohlun Hrangchal, Secy. VA in a nei a, Pathien kuoma ṭawngṭainaa lawmman inhlanna Rev. Vanlalruot Zote in a nei zoin Thuhrilna Pu Alfred J. Khaute S.D.O, Saikot Sub-Division le Pu T.K Muan Simte CEO, ADC Churachandpur hai bakah khawtlang ṭhuoitu, HWA Unit ṭhuoitu le MRHRC/Bethesda College/School of Nursing a hotulien ha'n thuhrilna an nei a, Lawmthu hrilna Pu Lalzarlien Darngawn, Chief of Muolvaiphei in neiin Hun khar le ruoi inhlanna ṭawngṭai Capt. Jerry Lalrozama, Salvation Army in a nei zoin hi hun a fekhawm ha'n Lawmman lawmna ruoi an kiltlang a nih.
Hi hun a Pu Alfred J. Khaute S.D.O, Saikot Sub-Division le Pu T.K Muan Simte CEO, ADC Churachandpur ha'n thuhrilna an neina hun a chun Muolvaiphei khuo in Churachandpur District pumpui a khuo fai tak nina lawmman dawng theia a um chu lawmum an ti hle thu hrilin hmatieng peia khawm sunzawm pei dingin an infui a, hmalak tlangpui an nuom thu hrilin an thei ang anga Muolvaiphei khuo chu ṭhangpui dingin an in tiem. Anni hi Muolvaiphei khuo in Hmar Thangsuopuon inbat tirna neiin an lawmman dawng hi an kut a'nthawkin a hranpa takin hi hun a hin an dawngsawng a nih.
Muolvaiphei khuo hin lawmman an dawng sumfai ₹ 10,000/- (Cheng Sing Khat) ah 10% chu Muolvaiphei khuo a um The Salvation Army, Motherless Babies' Home ṭhangpuina dingin an inhlan. An lawmman dawng le inzawm hin tulai hnai khan Mango Punch theitui bur khat ₹ 10/- man hai bur 2,000 chuong ding an khuo mipuihai lai le In tin ah an lo sem tah bawk.
Churachandpur District pumpui ah khuo 848 (including hamlets) a um a, chu hai popo laia khuo fai tak lawmman latu Muolvaiphei khuo hi entawn tlak tak an nih.
Muolvaiphei khuo vawng fai zing a ni theina ding hin khawtlangin theitawpa hmalain Kohran le HYA Branch chun hmunhnawk bawm (dustbin) iemani zat siemin hmun tum tum haiah an sie a, hi baka hin Chura-Sugnu Road an khawsung ah inlirthei tlan dan ding Speed Limit 35 KM/PH khawm signboard an tar bawk. Tulai hnai el khan Muolvaiphei khawsunga hin inlirthei tlan hrat leia changsuolna (accident) tlung hriet ding a um nawk a, HYA, khawtlang ṭhuoitu le khuo mipui hai chun an ngaimaw hle.
Pathien, mipui, khawtlang ṭhuoitu, Sub-Divisional le District level a hotuhai zara lawmman hi dawng thei anni thu Muolvaiphei khawtlang ṭhuoitu hai chun an hril a, lawmman inhlantu hai chung ah lawmthu an hril.
Tutaka Muolvaiphei Village Facts chu hi ang hi a nih:
No. of household - 734, population around 4,000 people. lnstitution run by NGO's tieng ah - (1) Muolvaiphei Rural Health& Research Centre. (2) Bethesda College of Nursing/(3) Bethesda School of Nursing. (4) Community Care Centre under SHALOM. (6) Shwadarh, The Home of Widows. (7) NPT Prayer Mountain. (8) Destitute Boys' Home & Motherless Babies' Home runs by The Salvation Army. (9) Mount Carmel Higher Secondary School attached with Gilgal Orphanage Home runs by New Life Ministries.
Chun, Govt. tieng ah - (1) Upgraded Primary School. (2) BPO Postal Dept. (3) 50 Bedded Integrated AYUSH Hospital under construction.
(Mi 1,000 vel ding non permanent residents Muolvaiphei khuo a hin hieng institution tarlanga um haia hin an um phak bawk.)
Hieng hmun pawimaw popo Muolvaiphei khawsunga an ṭhut theina san chu Muolvaiphei lal sungkuo (Chief) in hmun-le-hmang mipui le khawtlang tadinga inphal taka an lo suodawk (Donated) lei lieu lieu a nih.
Report : LRS Puruolte
