Responsive Ad Slot

The 2nd Sizo Festival 2019 hmang

Sunday, September 29, 2019

/ Posted by Simon L Infimate
Saikot, September 28, 2019, Virthli (ONP): Hmar Youth Association (HYA), Saikot Branch in a huoihawt 'The 2nd Sizo Festival 2019' chu vawisun khan Saikot SDO complex ah hlimtlang takin hmang a nih. Hi huna hin Chief Guest in Pu Alfred J. Khaute, SDO, Saikot hmang ani a, Guest of Honour Pu Joseph R. Hmar, President, Hmar Inpui GHQ chu remchang nawna leiin a thang thei naw a, a aiin Pu Romeo Hmar, Jt. Secy., Hmar Inpui GHQ in hi hunser hi a uop, Functional President in Upa Laldawnlien Varte, General President, HYA GHQ hmang a nih.

Hun hmangna hi Nk. Deborah Lalrozam le Tv. Zakaria han an keithuoia, Rev. Hrangtinai, Mission Promoter, ICI in hun hawng tawngtaina a  nei zoin program hi tan a ni a. Nk. Lungmuongzo, Finance Secy., HYA Saikot Branch in 'Sizo Festival' chanchin hrilna a nei a. " Sizo & Its Value" thupuia hmangin Tv. Immanuel Lalthuoilien, M.Sc. (Forestry) a inthawkin thuhril ngaithlak a nih. Pu Timothy Z. Zote, President, HYA Saikot Branch le Visioner, Sizo Festival in lawmlutna thucha hrilna le khuollien hai chawimawina thilpek inhlanna hunser a hmang.


Hi huna Chief guest in thu a hrilna a chun Sizo hi hme sukhniktu a ni zie, a sukhmasawn dan le a vawnghim dan hai thiem tum ei tiu ti'n a hril a. Sizo le theikung chi hrang hrang hai hi a hma neka phun uor a tul zie thu ursun takin a hril. Sizo hi tlangmi tawng dang dang hmang hai khawma 'Sizo' ti'n an ko deu vawng a, hmunkhat a mi kaikhawmtu a nih tiin a hril bawk. A hril peina a chun hieng ang Sizo Festival buotsai theia a um hi lawmum a ti thu a hril a, hmathlir tha tak neia an huoihawt hi inpakum a ti thu le hmatieng peia khawm Sizo Festival hi sunzawm pei dingin Organising Committee hai a ditsakna thu an hlan.

Guest of Honour in thu a hril huna Sizo hi ei hnam in a suong dan ei thiem a, neitu chan changtu ei nei leiin a sukropui thei dan ding hai ngaituoa thang tlang a tul zie a hril a, sawrkarin Sizo Festival hi a recognise thei dan ding lampui hai khawm ngaituoa hmathlir nei zingin ei thang tlang a ngai a nih tiin a hril a, hieng ang hunser huoihawttuhai chungah lawmum a ti thu a hril. Functional President chun hi huna hin Sizo hi ei hnam nunphung, ei identity a ni a, sizo hme chi dang dang ei suong theina hi ei danglam bikna a nih tiin a hril a. Pathienin ei pi-le-puhai varna a pek hmang tangkaia sizo hme chi hrang hrang, inhnik tak tak el lo hmusuoktu hai ngaisang an um thu a hril a, sizo hi chawisangin dawmsang pei ei tiu tiin a hril. Hi huna hin Saikot Village Authority le HYA Tuithaphai Joint Heaquarters hai khawma thuhrilna hun an hmang ve.

Hi hunser hmang huna hin Sizo hme chi 17 lai zet pholang a ni a, Khuollien hai le mipui fekhawm han Sizo hme chi 17 pholangna um hai hi fain an dawn a, inhnik an ti tlang hle. Program hmang sung hin hun kar laka Tv. Michael Paugoulian Songate, Nk. Rebecca Lalengmawi, Grace Ramhlukim han 'Sizo Festival Theme song'  sakin mipui fekhawm hai an inawi a, Nk. Ruthi Ralsun khawma hnam hla mawi tak tak el sakin mipui fekhawm hai an awi ve. Vote of thanks Pu Ramsanlien Hmar, Vice- President, HYA Saikot Branch in a hril zoin Pro-Pastor Thangsanglura Darngawn, Tuithaphai Presbytery , Manipur Synod in hun khar tawngtaina a hmang a, dit khawp lo takin hun suktawp a ni a, ruoi inhnik tak el kiltlang a nih.
Don't Miss
© all rights reserved
made with by Simon L Infimate