Sinlung Hills Accord Implementation Demand Committee (SHAIDC) chu September 4 khan Sakawrdai Community Hall ah a huoihawt a nih.
Hun hawng: Rev. Salem L Hmar, EFCI P/S Sakawrdai in Pathien thucha le tawngtaina hmang in meeting chu tan a nih.
Introductory Speech: Pu. Lalparkung Secy.Gen, SHAIDC in a hmanga; SHAIDC main objective/thiltum hai hrilin, India Flag le HMAR hnam puonzar hnuoia, Dan angin kal a chawi ding thu le Hnam le tawng hi Pathien mi pek ani leiin huoisen taka hma la ding ei ni thu hai a hril.
Welcome Speech: Pu Vanlalsiem, Chairman, SHAIDC in hun a hmang na ah
1. Ei ram le hnam tlusie ta hnung hi ei ngirsuok nawk ngei ding thu hrilin, Hnam hmakhuo ngaiin muol an mi liemsan pei leia ei hnam mivar le mithiem lo inkil tawi ta hai, keitho nawk a Hnam rawng hi a chin a lien ti lova lungruol taka ei bawl tlang theina dingin Judiciary Dan hmangin ei hnam la hung parvul nawk ding thu a hril.
2. SHAIDC hi pawl bik nei lo, Hmar hnam ka hmangai ie titu hai ta ani thu a hril bawk.
3. SHAIDC hi committee el chau nisien khawm ei hnam thuoitu lu hai inza tak puma a ko ngam nasan chu Hnam damna Issue a tlinga a hriet lei ani thu a hril bawk.
TECHNICAL & ACTIVITY REPORT: Pu Lalsandam Hmar anthawk in ngaithlak ani a, a thu hril a tawi zawng in
1. SHAIDC a hung pieng dan le pieng san hai kimchang takin a hril a, SHDC hi Mizoram sawrkar in Kum 22 a sei zet el interim in a mi fepuia, chulai chun ei lawm lo Council chu thenkhat haiin lutak inchu in hnam neka mani phingpui politics khelin Kum 2015 hmel an mi phurtlung a, Hmar taphawt chun hriet naw ruol lovin ralthuom le politics hmang chun ei hlawsam thawk khat ta a, chuleiin judiciary hmanga hmalak hi ei pawimaw tah tiin a hril.
2. Feb 9, 2016 in SHAIDC a pienga. Gauhati High Court, Aizawl bench ah May 25,2016 Khan Writ Petition in Court a lo hmasawn tah lai zingin thingpui dawr titina a SHC election thuonawp zawnga hmala anga hril a um hi thu indik lo ani thu a hril bawk.
3. SHAIDC hin Council thungna inchu ngai naw ni a, hnam damna hi thupuitak in nei a tih, Hmar Inpui Gen.Hqrs in press statement neiin a tul ang anga hma latu ani thu a hril bawk.
ECONOMIC DEVELOPMENT: Pu LB Sinate in Sinlung Hills Council area economic development um thei ding tam tak a hril hai chu bengvar tlak hle in mipui na a ver a, nasa taka hma lak ngei beisei ani bawk.
A then a zar chau tarlang inla;
1. Economic a hma ei sawn thei na hmangruo hmasatak chu ringumna, indikna le taimakna ani thu hrilin ei ram le hnam in chu chu a tlasam nia a hmu thu a hril.
2. Mi thaw anga thaw ve thei dinga ei inngai naw hi mi suk thuonawptu niin a hriet thu a hril bawk.
3. Ei ram del chin statistics felfai tak hriet khawm a pawimaw thu a hril bawk.
4. Ei ram in hmangai tak le duot taka enkawltu a nei naw hi pawi a ti thu a hril bawk.
Rawtna tamtak a siem laia thenkhat :
1. SHC sunga hin department hieng horticulture, agriculture le a dang dang hai ei thaw ve thei ding ang phursuok nisien.
2. SHC sunga forum indin le a monitor theitu ding thlangsuok a pawimaw a ti bawk.
3. Ei ram delhmun hi link road tha tawk nei nisien a geographical location that zie hai fumfe tak in a hril bawk.
4. Ei ram thlai le rasuok thil hrim hrim hi a market siem a tul thu hrilin market nei naw chun hlawkna ding lam a ping thu hrilin ei market ding lampui ding hai hrilhrietna a nei bawk.
ESSENCE OF LANGUAGE: Pu Joseph H Neingaite anthawk in ngaithlak ani a,
1. Hmar tawng in hma a sawn thei na ding chun Hmar Bible le hlabu ei nei rawn tul a ti thu a hril.
2. Hmar tawng hi a mawi el chau khawm nilovin a hausa em em a, hnam dang hai inhnar khawp a ni thu a hril bawk.
3. Thangthar tamtak hai a hmu dan chun Hmar tawng thiem tum nekin thiem naw tum hi insuk changkangna in an hmang niin an lang ti thu a hril bawk.
4. Hnam hi i pa angin inza la tawng hi i nu angin hmangai rawh ti a thuhril ah a belsa bawk.
5. Hnam damna chu tawng hi ani thu hrilin Hmar haiin ei tawng hi hmang uor sau sau a hmang thiem ei inchuk a pawimaw hle thu a hril bawk.
6. Ei tawng hi Pathien mi pek ani a, an zapuitu chun a siemtu khawm an zapui a nih ti thu a hril bawk.
DISCUSSION: Pu Darrosang in hnesaw takin a keithuoi a, discussion point thenkhat
1. Hnam puon veng him (protection) Hmar hnam puon hi hnam dang haiin an min chupui mek le an hnam puon a an sie iemani zat a um ta thu le iengtin am ei hnam puon hi humhim thei ei ta ti hriltlang a nih.
SHAIDC chun evidence um huna Court lutpui dingin an pei thu a hril a, evidence zawnga hma lak ni bawk a tih.
2. Internal assimilation
3. Mizoram census (2021) thlirlawkna: ei identity hi thaibo pekin ei um hlak Nnia hriet a nih. Census nawk huna hma latu ding insiem a tul a, commissioner hai thlawp a fact finding nei ngei a tulin makmaw a bawzui ding ani thu hril ani bawk
Abridged and extracted by David Thilsong, Sakawrdai Mizoram
