Responsive Ad Slot

HPC (D) Manipur Region in Hmar Inpui lekha a thawn

Sunday, September 8, 2019

/ Posted by VIRTHLI
CCPur, September 08, 2019, Virthli (ONP): HPC (D) Manipur Region chun Hmar Inpui GHQ zawna le an ngirhmun chungchang a lekha an thawn chu Hmar mipuiin lo hre ve ngei hai sien an nuom leiin Virthli a insuo dinga ngenna an hung siem angin an lekhathawn chu hung insuo a nih.



To,

The President/General Secretary,
Hmar Inpui,
General Headquarters


Ahmasan, ei Lalpa ISU KRISTA hmingin chibai ka hung buk cheu,

Hnam hmakhuo ngai tak tak in lo ni chun, kan hrietfie nuom chu, khuong a hnuoia zawna hai khu mi hung dawn fel pek ngei inla kan nuom takzet a. Chun, chubaka kan ngirhmun kan hung hril nawn nawkna hai hi ngun taka lo inchik dingin kan hung dit sa bawk anih. Chu el khela lekha hi kan thawn rawn ta khawp el cheu a official le unofficial a dawnna kan la hmu naw hi mak kan ti tawp thei naw pakhat chu a nih bawk.

Hmar Inpui General Headquarters a Affiliated Pawl pakuo; heing HPC-D (Keini Hmar Inpui indintu le Hmar hnam hmakhuo ngaina leia hmar hnam ai-awa sawrkar inbiepuitu tak), HCLF, HSA, HYA, HWA, HNU (Manipur), HAA, HACS le HLS (Manipur) hai nilo hi, Hmar Inpui Constitution ang tak le Assembly remtina ngeia laklut thar an um am? Lunginsiet takin mi hril ro?

Chun, HMAR INPUI CONSTITUTION (INAWP DAN), CHAPTER I, ARTICLE 2 ah Hmar Inpui THILTUM ei hmu a, chu chu - Clause: (i) na dungzuiin, Hmar nauhai po po keikhawma, inthuruolna le inpumkhatna kengkaw tlata kalchawipui, ti a na. Chuong ani si chun iengti leia Hmar nauhai sukdar zawnga Hmar Inpui hmalakna hi, a um thei am ana? Hmar mipui hriet dingin hi zawnna hi hung dawn bawk ro?

Chun, Hmar Inpui Affiliated body laia mi ngei HPC(D) sung, sukbuoitu le faction suokthar hai infuipawrtua dam iengti leia Hmar Inpui, General Headquarters ṭhuoitu le Inpumkhatna dinga hmalatu Pawl (JMG) member ni ve zing sia, a sie zawng tak le mi sukdar zawnga hmalatu (hriet chieng taluo) an um thei zing am ana? Hmar mipui hriet dingin hi zawnna hi hung dawn bawk ro?
Chun, Hmar Inpui, 10th Assembly, ni 4th le 5th, March 2019 laia VTI Auditorium, Rengkai, Manipurah nei tum khan, thil umdan fietawk taka inhril ani ta hnung khawma, vel tam tawk tak mit le na nei hai, hmu le hriet dinga, a vel, a vela inhrilhriet nawn nawk pei hi ieng leia, a la ngai rawp zing el am ana?

Hmar Inpui Constitution a bawk, CHAPTER X, ARTICLE 21 - HMAR INPUI LE AFFILIATED BODY-HAI INLAICHIN DAN tia ei hmu chu –

Clause: (i) Hmar Inpui a hin Hmar hnam hming chawia pawl tum tumhai inthlungkhawm an tih (Hi taka hin Hmar Inpui indintu tak laia mi kan ni angin HPC (D) chu hi inthlungkhawmna a hin ala ṭhang zing ding a nih. Hmar Inpui Constitution ang takin tukhawm a nuom el a hnawl le ban el theina a nei nawh, Assembly chau naw chun).

Clause (ii): Hmar Inpui hnuoia Affiliated Body dinghai chu General Assembly-a sukfel ning a ta; Region-haia Affiliated Body dinghai chu Regional Conference-a sukfel ni ve thung a tih. Region-haia Affiliated Body hai chu region-in Headquarters-ah fie le feltakin an hriettir ngei ding a nih (Tuta Hmar Inpui ṭhuoitu thar hai hriet chi a nih).

Clause (iii): Hmar hnam pum huopa Pawl (Organization/Association), Hmar Inpui, General Assembly-in a pawm-hai chu Hmar Inpui rorêlna hnuoiah um vawng anta, Inpuiin (Assembly-in) an zawm ding thupêk insuo thei atih (Hi hi fair taka kengkaw thei loa a um hi a mak ngei el ie! 10th Assembly khan ko in kan um a, agenda a khawm HPC (D) thuah kan inhrilfiea, hrietthiem le sukfel an ta an naw maw? Hmar Inpuiin thudik a hriet ta hnung khawma ro felin arel nuom nawh! Ieng lei am ana? Hidden Agenda in nei a ni?).

Clause (iv): Hmar Inpuiin a hrietpui (recognized) pawlhai ang bawka thiltum thuhmun nei, Pawl thar indin chu Hmar Inpuiin hrietpui/pawm thei ta naw nih, ti anih. Hmar Inpuiin iengti leia a Constitution a ngaitha a, a palzut nasa em em am ana? Chun, iengtik lai khan am mani le mani HPC (D) General Headquarters inti fawm mei mei (SoO Group khawm nilo, Gang mei mei, Guwahati a Covenant ziek a um le JMG Ground Rules bawsie rawptu), a Pawl hming neitu tak khawma, kan i pawm lo le a hrietpuilo hai hi Hmar Inpui General Headquarters in, iengleia mi tak tak cheia, achei zing le an thlawppui thei zing am ana, a san indik tak iem ana? Hmar hnam sunga Pawl tum tum hai hi buoina neu neu an nei tawl firfer a, inrawlna awm tak tak a hai khawm Hmar Inpui an rawl vawng chuong der si naw a! Iengti leia Hmar Inpui General Headquarters thuoitu thenkhat hai in, hi Gang hai hi in hum zing am ana?

Chuleiin, tuta term a Hmar Inpui, General Headquarters le ṭhuoitu hai hin an khawsak dan hai in ennawn vat hai sienla nuom a um ta ngei el ie. Hieng hin chu hnam mipui hai an mi la sukzak elna khelah an mi la suksiet hle ding a nih. Hmar Inpui hin dilsut takin alo la ngaituo ngai naw ani? Hun liemtah haia khan Hmar Inpui Affiliated body laia mi HSA sunga ngei khawm buoina, inlakhranna le Pawl thar indinna hai alo tlung rawp ta hlak. Sienkhawm Hmar Inpui, General Headquarters in dam zatin, Hmar Inpui Constitution ṭhangsanin a chingfel el hlak chu ani kha tie. Tuta hai hin iengleia an zuk thaw thei ve der naw am ning a ta? Chun tuta term a Hmar Inpui, General Headquarters thuoitu hai ruok hin chu Hmar Inpui le a Affiliated body hai Constitution (Inawp dan) khawm a ngaisak nawa, dan le dan naw, a awm le awm naw khawm a ngaisak der naw hi a mak! Chu chu buoina sukzuoltu tak khawm a hung ni reng a. Inzak a um vieu naw maw? Dan naw angtak (Unconstitutional) a che hai hi Hmar Inpuiin ieng chen am a welcome ding ana? Hmar mipui hriet dingin lunginsiet takin mi hrilfie pek ro?

Chu khel a Hmar Returnees in ti laia mi le mi lungril suol, thil umdan tak hrie ve zing sia, kawina ding zawng ṭhenkhat nuorpui kan hung sukfel tah leiin ieng am an la kawi rawp nasan? Remchanga an hmang le an mi hekna hai hlak kha anni vekin an hung thaw nawk ta peia,  Ni 27th June, 2019 laia Guwahati a Covenant zieka lo um ta khawm kha ienglei am a ni a? Tuin am a bawsiet a? Thudik hung hril ta ro? Hang ngaithla tlang diel diel ei tiu!

Chun, Hmar Inpui General Headquarters in ralna pawisa sum kha iengtik am a dawngtu ding indik tak hai kutah, peksuok a tum a? Hril rik aum ta naw ngei el! A la him an naw? Sem ding chie pha kan la hung pek ding khawm, a um ani kha aw. In la hriet am? Theinghil naw ro, Inchik zing ro, Hmar Inpui fund ani naw kha aw!

Chun, ni 28thAugust, 2019 khan Hmar Inpui General Headquarters  Office, HSA Campus, Rengkai, CCPur-ah Hmar Inpui Executive Meeting nei ani hun a khan Resolutions pahni siem a um laia -Thuthlukna pakhatna a Inpumkhatna dinga Hmalatu Pawl a Hmar Inpui a’nthawka member ruot a um; Pu Romeo Hmar, Convenor le Benjamin Shakum, Co-Convenor (Hmar mipui ami thlawptu le keini khawma kan study chet chet a kan ringzo thei hlawl lo ve ve, HPC(D) GHQ. mani le mani in ti fawm, faction thar indin puitu le supporter) haiin an hmalakna report an pek le ngaithlakna nei a ni lai khan Inpumkhatna dinga Hmalatu Pawl hai hmalakna chu Inpuiin țha la tiin le hrat nawk zuola fe dingin țha ti tlang el bakah Guwahati Thuthlung (Covenant) zieka um a chun la ngir tlang seng ding le a țulna aum ani chun Inpumkhatna dinga Hmalatu Pawl khawm sukzau nisien țha ti thu media haia suklanga um kha belchieng adawl tak tak chie am? Hmar Inpui hi a mit andel an naw maw? Kan ngaidan chu tuta Hmar Inpui thuoitu hai hi Tuithapui Vadunga Baptistma an chang seng a tul in kan hriet.

Hmar hnam hmakhuo ngaiin inpumkhat chu kan nuom taluo ringawt el,keini neka inpumpkhatna dit khawvela um naw ni hai, chuleia Saipui in ui khawm a la vuok hlum naw ani hi, na nei chun hrie raw seh! Nuthlawi nu anga kan zangai theina leia Zau nau pasari nei chu min thaw tir naw hram ro, nisienlakhawm asan ṭha tawk um si loa Affiliated lo hai le angkhat rawnga ieng leia in mi sie? Affiliated laia mi ni si tukum Hmar Inpui Excecutive Council huna  vawikhat khawm fiel ve kan ninaw nasan hi ienglei? Hmar Inpui Assembly Speaker lekha kan hung thawna, dawnna lekhathawn kan dawng khawm kha a fie tawk naw ngei el! Hmar Inpui Constitution, ieng Article le Clause ang dungzuia fiel ve kan ni naw am ana, lunginsiet takin mi hung hrilfie ro ie?

Hieng neu neu hai lei le Ground Rules vawitam bawsiet ani ta leiin Hmar Inpui, General Headquarters le inpumkhatna le inremna dinga hmalakna kan ringzo ta hlawl nawa, midang athar ruot anni hmakhat chu kan pawm thei ta naw ding anih. Hnam le mipuiin thudik le thu umdan tak chu la hung hriepei bawk antih.

Hriet nawn rawp dinga ṭha chu: HPC(D) sung buoina hi mi lungril suol le kawi hai chawkdawk, mimal inthikna khom a kawpsa a, pawl sung roinrelna inza nawna le hotu ni inhawk le sum chelek in hawk bek bek hai thu phierrukna leia hung um, Hmar Inpuiin chingfel tum ni awm taka, ching fel tum tak tak ni bawk si loa, satene beram vun sil a in hungin rawl hi buoina a sukzuol sau tu lem le, ei tlung lo ding chen chen tlung ani ta hi, inhmei ruol lo ani. A pawi khawp el, hieng ang mihai hin Hmar hnam maw an hmangai? Khawtieng am an mi ṭhuoi ding ana? Khur-ku-rum tieng am anih?
Hnam hmangai tak tak hai thurawn ṭha le zawm tlak hai chu kan lawmlut zing a, HPC (D) Manipur Region/UPF (SoO Group) ku hi Hmar hnam hmakhuo ngaia Manipur a movement nei le subject uluk taka fepui zing lai kan nih. Kan adviser le kan ruot nisi loa, a nuom taphawtin mi zuk ṭhuoi an tum khawm thil thei annawh.keini fe tleng naw chun tukhawm pa kuoma lut naw ni hai, Laklut tlak hai chu Pawl in laklut kan rin der nawh. Mivar le thiemna tienga insitum lo chu kan dit hle. Chu ang mihriem chu kan ringzo an vang, kan zawng zing. Senioritya Pawl khawm fe a ngai. Mifel chu pawl a khawm dit an um. Nina le thuneina khawm insang tak pek an phu ti kan inphat der nawh. Chun a chawi pawl le Civil Organizations umzie hi, in la hriet naw ani chun, ‘Sinlung Camp’ Ankhasuoa in rengin la hung ro!

Ei Hmar hnam felnain chawimawi tlat ei tiu. “Felna a hnam chawimawi” (Thuvar 14:34) ei hnam thupui ani kha. Amiruokchu, ziek tiem theilo lei am, Tarmit nei naw lei am, Bible bi ngai lo lei am, ei Bible reference pek hai khawm hi en tha hlak ei tui, chuong a ni naw chun “Felna a hnam chawimawi” chu Sanghawngsei thimna a lut awl lem a tih. Chun, tuta Hmar Inpui General Headquarter thuoitu hai hi, HPC (D) General Council Resolution ang taka kan I tlang cheu le keini ngei khawm a vote  panga kan nei, kan tlak le inzawma Pathien ringsan a kan tlang cheu ana, amiruokchu, duamna lei am? Eselna lei am? Hming thatna dit lei am? Or sum du na leiin am, in mit hai suk del in a um a, thil dang po po inhmu thel hai chu kan hriet thiem, ana chu Hmar Inpui Thupui tak (Thuvarhai 14:34) bek hi chu vawisunni a in term hmang mek lai le a bo hma ngeiin in thupui la hmu dik thei loa, Hmar Hnam thuoitu dinga Pathien in a ruot cheu hi chu, Juda Isakariot ang kha hung ni pal in tih, ti hi, HPC (D) chun an lau pui hle bawk cheu a nih. Chuleiin, Letter-head a Bible reference ei hmang kha midang hmu rawn hmain tlakthleng vat ngai a ti aw.

Hun sien,


Hnam a in thahnem ngai pui,


(MR. ISAK HMAR)
Secretary




For Information :

Copy to-

01) The Assembly Speaker Hmar Inpui: GHQ.
02) The President/General Secretary HYA: GHQ.
03) The President/General Secretary HSA: GHQ.
04) The President/General Secretary HAA: GHQ.
05) The President/General Secretary HNU: GHQ.
06) The President/General Secretary HCLF: GHQ.
07) The President/General Secretary HLS: GHQ.
08) The President/General Secretary HWA: GHQ.
09) The Chairman/Secretary HACS: GHQ.

Don't Miss
© all rights reserved
made with by Simon L Infimate