Responsive Ad Slot

Henchungpunjee ah Free Medical Camp nei; Chief/Chairman, VA in lawmthu a hril

Friday, September 27, 2019

/ Posted by VIRTHLI
Henchungpunji/CCPur, Sept. 27, 2019, Virthli (ONP): Vawisun khan tulai hnaia natna hrietchieng lo a thi an um hlak nia hrila a umna hlak khuo le mi 4 thina leia khuomipui inlau/ṭithawng taka an umna Henchungpunjee (Sunggakhal) ah khuomipui hriselna enfelnain PHC Sibapurikhal (Ankhasuo) enkawltu New Life Trust (NGO)/Medical Team haiin Chief/Chairman, VA chengna In ah Free Medical Camp an huoihawt.


Hi hun a hin mi 190 chuong hriselna enfel anni a, doctor in Malaria Typhoid invawi ni pal thei dinga a ringhla hai mi 22 thisen test niin test result ah Malaria Typhoid negative (-ve) anni tawl a, chuong ang taka hri ṭium awm hmusuok a um naw niin thu ei dawng. Doctor hril dan dungzuiin hi huna in en a tamlem chu thisen chau/thisen tlasam (anaemia) an lo ni thu hriet a nih. A mamaw hai kuomah damdawi khawm a thlawna sem le pek an ni bawk.

Hi le inzawm peia bieltu MLA Dr. Chaltonlien Amo ei inbiekpuina hun a chun a ṭul ang anga hmalak pei a ni ding thu hrilin tuta ṭuma enfelna nei a ni zoa khawm a ṭul ding chun doctor le a ṭul ding ang ang chu ngaituo nawk pei a ni ding thu a hril.

Hi khuo a hin tulai hnai khan mi 4 naupang le nghaklakte kum 20 hnuoitieng vawngin natna leia thina an tuokna le inzawmin hrilsep a um a, social media a hai suklanga a um hnungin suizui a ni a, Khuomi, Village Authority, bieltu MDC le MLA hai chen biekpaw anni a, an ngai pawimawin thei tawpa hma an lo lak dan hai khawm hriet a nih. CMO, Pherzawl  khawmin chanchin a hriet charin theitawpa hma lain le New Life Trust (NGO), PHC Sibapurikhal (Ankhasuo) enkawltu tak ha'n chanchin an hriet charin an ngaiven nghala a hmun ngei ah enfelna hi neia hung um tah a nih.

Pu Duoilo Chief of Henchungpunjee (Sunggakhal) le Chairman, Village Authority chun hi le inzawm hin an beidawngna hriea, theitawpa hmalapuituhai popo, bieltu MDC Pu Lal Hossan le MLA Dr. Chaltonlien Amo, Dr. Phirthanglien Buhril CMO, Pherzawl le New Life Trust (NGO) hai chungah khuomipui aiaw'n lawmthu a hril. Henchungpunjee khuo a hin In 58 umin mihriem 329 an um a nih.

Chanchin hrieta um ngaiven a ni hun ah naupang damnaw hmun danga doctor pan puia um Master Ruolneikhum Pulamte (7 Months) S/o Lalduotthang khawm ṭhat tieng a hung pan pei tah beisei a ni thu Chief/Chairman, VA Henchungpunjee chun a hril bawk.
Don't Miss
© all rights reserved
made with by Simon L Infimate