Responsive Ad Slot

SHC huom sunga khuo 9 Saitual district ah

Friday, August 9, 2019

/ Posted by Simon L Infimate
Aizawl, August 9, 2019, Virthli (ONP): Vawisuna Chief Minister Zoramthanga keihruoina hnuoia Council of Minister ṭhungkhawm chun district thar pathum- Saitual, Khawzawl le Hnahthial hai huom chin ding a pawm fela, Sinlung Hills Council huom sunga khuo 9 chu Saitual district ah inkawptir an nih.

Saitual district a rinlûta um SHC area a khuo pakuo hai chu Phuaibuang, Khawlian, NE Tlangnuam, Daido, Zawngin, Suangpuilawn, Lamherh, Vanbawng le North Khawlek hai an nih.

Council of Minister inṭhung chun Saitual district in a huom chin dingin khuo 37 a pawma, Khawzawl district in khuo 28 le Hnahthial district in khuo 26 huom a tih.

Kha hma khan HSA, Sinlung Hills Joint Headquarters chun SHC area huom sunga khuo hai chu Saitual district huomsungah rinlut an nuom naw thu le Aizawl district ah kawp an la nuom lem thu thusuok siemin an lo puong dar tah a nih.

Hi bak a hin Lunglei district, Vanva area a khuo 11 hieng Ramlaitui, Sekhum, Mualthuam North, Haulawng, Mausen, Chengpui, Zotuitlang, Hmuntlang, Bualpui-V, Chhipphir le Ralvawng hai chu Hnahthial district a um an nuom naw thu kha hma khan an lo kheksuokpui tah bawk.
Don't Miss
© all rights reserved
made with by Simon L Infimate