~Jami Darngawn
Pathienin mihriem a siem hma khan
thlai chitinhai a lo siem tah a nih ti chu ei Bible a ei hmu a nih. Genesis 1:
12. Chuongchun hnuoi chun hlo dâm, thlai mani chi um dân ding anga chi nei
dâm, thing mani chi um dân ding anga ra, a ra sûnga a chi um dâm chu ân suo ta
a. Pathienin a en a, ṭha a ti hle a.
Awleh, Pathienin thlai chitinhai
chu mihriemhai ta dinga ṭangkai em em le, ei damna/hringna dinga a mi pek a
nih. Thlaichihai le, thlai chingtuhai hi lo umnaw hai sien chu mihriemhai ta
ding chun beidawng um hleng a tih.
Ka naupang lai khan huon lien deu
kan neia kan huon-a chun ka Pi leh ka Nu’n thlai an ching hlak a, vawikhat chu
kan ar-in kawl hmunhnawk kan peina-a chun thlaichi ka va thlaka, a hung ṭo vak naw leiin ka va thlak
nawka, chu khawm chun a ṭo nawk chuong nawh. A tawp a chun beidawng chuong
lovin ka va thlak nawka ka beisei tanaw hnunga chun a hung ṭo tah a nih.
Ka thlaichi thlak kha
hmunkhat/bikhat chara ka thlak a nih a, a ṭhen fangma chi ana, a ṭhen chu vaimin chi ana, a ṭhen chu maichi a nih. Amiruok chu
a hung ṭova a hung inṭhang pei chun maichi kha a hung
ni tah a, a hung inṭhang lien peia an zâm sei nasa em ema, ring nekin a ra rawn
hle a nih.
Kh^ ka maitu kha a ra rawn em ema
kan fak seng nawha kan zawr zing bawk, mi khawm a thlawnin kan pek thei zing tho
a, maisen chu kan sumphuk ah kan sie a, a chang chun sûn phîng ṭama fak dingin kan but hlak a
nih.
Ka naupang laia ka maitu kha tu
tieng tienga ka ngaituo kir chang chun hieng hin a hung inlang hlak. Ka maitu
kha khang ema ṭha-a a ra rawnna san kha ka
ngaituo chun ar-ek le hmunghnawk kan peina hlak, ka Pi le ka Nu khawma thlaichi
thlakna ding khawma an en lo, kei chun a ruktea ka lo thlak hlak kha hnuoi
tirdakum em em kha thlaichi ta ding chun a lo ṭha hle thung a, chuleichun ka
maichi tu kha a ṭhat pha ta em em a nih.
Chuongang bawk chun Pathien
nauhai khawm hi thlaichi ang ei na, a ṭhen chu chan ṭha tak tak le, chansie tak tak khawm ei um a nih.
Amiruok chu ei chansietna tak kha dit umnaw hle sienkhawm ei thlarau ta ding
ruokchun hnuoiṭha anga lo ni thei a nih. Chanṭha le ngaisangum em em hai khawm
Lalpa Pathien chu an nun ah a ṭhangnaw chun an ra insuo thei ngai naw ni hai a,
Pathien ta ding chun hnawksak an chang thei a nih.
Thlaichi inrim taka ei thlaka ara
fak ding um lo chu a thlaktu ta dingin lawmna hrim um naw nih. Amiruokchu ei
thlaichi thlak khan a hun taka ra an insuo thei chun a thlaktu ta dingin hlimna
le damna a tling a nih.
Thlaithar lawm um tak ei dawng,
ei hmu thei hi Lalpa malsawmna a nih.
THLAITHAR LAWMUM MI PETU LALPA
KUOMAH LAWM UM RAW SEH.
