Responsive Ad Slot

Pu Joseph Joute ei lo the tah

Friday, June 28, 2019

/ Posted by Simon L Infimate
CCPur, June 28, 2019: Pu Joseph Joute (50), Freelance Journalist le Social Entrepreneur, Bible Hill, Rengkai, CCpur chu hun iemani chen kal tieng le sung tieng natna leia RIMS, Imphal hmuna enkawla um chu nakie 2:15PM vel khan ei lo the tah.

Pu Joseph Joute hi hnam tadinga mi tangkai tak el le ziek tieng panga thaw hlawk tak el a nih. Virthli (ONP) Columnist khawm a ni nghe nghe a nih. Virthli chun ei inpam hlea, lus√Ľn sunghai ei tuorpui tak zet a nih.
-----------------------


A Chanchin Tawi

Pu Joseph Joute hi June 2, 1969-in Pu J. Tongkho Hmar le Pi Hriemneizo hai karah Rengkai, Churachandpur, Manipur-ah a hung pieng a. Unau pasal 2 le nuhmei 4, pasal a upa lem a nih. Inchukna le thiemna tieng; Middle School Don Bosco-ah a zo hnungin Standard English High School-a inthawkin High School le Matric a passed a, Patkai Christian College le Churachandpur Government College-ah PUC a passed a, CCpur Government College a inthawkin 1998 khan BA. (Hons) (Political Science) passed in, 1989 kumin Diploma in Journalism a zo a nih.

1985-a inthawkin famtah H.A. Lalrohlu leh SHAN DAILY Hmar nitin chanchinbu an suksuok a. HPC Movement hun lai a ni bawk leiin Shan Chanchinbu chu an lar em em a, Shan Daily hi Hmar tawnga National Standard Size newspaper RNI hrietpui hmasa tak a nih. 1990s lai khan John H. Kungate Publisher leh ama Editor niin "Sinlung Khawpui" weekly magazine an siem nawk a. Publisher-in a thisan thut leiin an chawl a. 1995-1998 sung po Press Trust of India (PTI), The North-East Sun le The Sangai Express le Matamgi Yaikairol haiah Correspondent a ni a. 1998 kum ler tieng a inthawka 2001 chen Hmar tawnga "The Churachandpur Times" chanchinbu a suksuok a. Manipur Assembly election-ah a laibungpa a san nuomna leiin a chawlsan a. 1992-94 sung po khan J. Lalpienglien Pulamte Publisher le ama Editor niin "Sinlung" an suksuok bawk a. 2004-a inthawk khan "The Manipur Mail"- ah Correspondent sin tuchen hin a thaw a, hienglai zing hin "Sinlung Weekly" chu ama puola thaw nawkin Editor & Publisher a nih. National paper hran hran haiah Article ziekin vawisun chenin an Correspondent a la ni zing.

An hnikna chu sport le lekha tiem a ni a. Kum 1996 khan Bible Hill Youth Club (BHYC) indinin Founder President a ni a, tuchen hin a la ni zing a. Sorkar registered, NYK affiliated (no.42 of 1996, MSCS Act) ni in Award chen dawng ta Youth Club a nih. School student a ni lai in Meritorious Certificate iemani zat a dawng a. District level Badminton-ah pahnina a nih. 1990 laia inthawkin Kohran NSS le KTP tieng inhmang tan in, hotu le thuoitu nina tam tak a chel a. 1989-1995 khan Nehemia Singing Group indinin Secretary sin a tluonin a chel a, album "Phulo Hmangaina" an siem a, North East state biel po po fangsuokin rawngbawla an fe laiin upa Laltlanlien, Missionary, Karbi Anglong naunu upatak Laramsiem leh inhmu in January 11, 1992-in Kohran dan thienghlim in an innei a, nau nuhmei 2 le pasal 1, William Lalmalsawm an nei.


Lekha ziek mi tak niin Hmar laia Journalism Course lo zo hmasa pawl a nih. Article tam tak a ziek ta a, hla iemani zat a phuok ta bawk. Lekhabu pakhat "Hnam Pasaltha" HPC Movement kara Love Story khawm a lo siem tah bawk a nih. A thiltum chu thangthar peihai khawvel hmasawn ang peia ram le Hnam ta dinga tangkaina chite bek a bikin Journalism tieng tangkaina an nei ve theina dinga keithuoi le sinthaw hi a nih. Hmar haiin nitin suok chanchinbu ei neisun Hmasawnna Thar ah Co-Editor nilai mek khawm a nih. Pu Joseph Joute hi Virthli (Online News Portal) intan hlim anthawkin tu chen hin Columnist khawm ani nghe nghe a nih.


Source: Manmasi Year Book 2006-2007
Don't Miss
© all rights reserved
made with by Simon L Infimate