Responsive Ad Slot

Pu. H. Zosangber - A Chanchin Tawi

Wednesday, June 26, 2019

/ Posted by Simon L Infimate
Pu. H. Zosangber hi Pu (L) Rokham le Pi (L) Zawllienhnem hai inkarah 9th May, 1947 khan Sakawrdai khuo ah a hung pienga. An ureng hi Unau pasal pathum le nuhmei pakhat an nih a. A Unau piengpuihai chu:

1. H. Zaneisang, Manager SBI, Churachandpur Branch (Rtd) h/o Lalchawimawi Rengkai, Churachandpur
2. H. Zosangbera h/o Mangthankungi
3. Lalthanlien Thiek, Asst. Director, Statistic, Govt. Manipur (Rtd) h/o Mitinsiem, Rengkai, Churachandpur
4. Zoremmawi w/o Lalsuongvel - Lamka, Churachandpur


Pu H Zosangber hi mitaima, sinthawna taphawtah inthlada ngailo niin lekha thiemthei tak mi niin, a naupang laia inthawk vawikhat a tiem ta chu a hrietzinga, Vaitin Middle School Headmaster Pu Vanlallien khawmin "Nau ka nei nawk pha chu a hmingah Sangber sak veng tang ka tih" a ti pha hiel hlak a nih. Parbung High School-ah Class — X kum 1966 khan II Div ah a passed a, St. Edmunds College, Shillong-ah kum 1970 khan Rs 250/- chawiin B.A a zo nawk a, B.A a zo hnung hin Darlawn High School-ah Zirtirtu sin a thaw a, hi taka sin a thaw lai hin Pi Mangthankungi Darlawn leh kum 1973, December 18 ah an innei a, Saikawt Churachandpur High Schoola a thawk lai zingin a piengna Sakawrdai inchukna tieng a ngaipawimaw em leiin kum 1975 ah Sakawrdaia lut nawkin, Sakawrdai Jr. High School indin in a thawka, hienglai hin Y.M.A tieng ngaipawimaw in theitawp suoin a lo thuoi a, khawtlang ta dinga Sawrkara petition ziek ding hrim hrimah a ma hi hmang tak a nih. Pi Mangthankungi le hin rila ra nua malsawmna nuhmei 6 le pasal 1 an neia chuong hai
1. Margaret Lalrintluangi w/o Zirsangliana, Aizawl
2. Melody LalchIntangzeli
3. Juliet Lalnithangi w/o Upa Lalrinngheta, Sakawrdai
4. Priscilla Lalnunthangi
5. Rosangzuala Ralsun h/o Grace Laldinpuii
6. Lalrammawii
7. Lalremruati Hmar

Pu H. Zosangber hin Tu 8 le Tu-suon 1 a nei.

KHAWTLANGA AN HMANG NA:

Pu H Zosangber hi nunghak tlangval enkawl thiem le keithuoi thiem tak mi niin Y.M.A thuoitu khawm kum 10 lai lo chel tah a nih. A ma hi Hnama inhnik mi le Hnam invawi mi tak a nih a, Hmar Cultural Troupe khawm kum 1980 khan Sakawrdaia indintu a nih. Ei Culture hi lungril ruk takin an vawi em em a, kum 1985 khan Mizoram sunga hnam hrang hrang haiin mani hnam lam Aizawlah an inentira, Adviser niin nunghak le tlangval 30 bawr leh Aizawl an fe nghe nghe a nih.

Sakawrdai Y.M.A indintu laia mi niin, YMA life member hmasatak a nih. Kum 10 sung Sakawrdai YMA President sin chelin Y.M.A Branch inthe a ni khawm khan khawtlang inlungruolna ding a ni beisei leiin Joint YMA President dinga fiel a nih a, Sakawrdai Joint YMA President hmasatak a ni el bakah 14 Group YMA ei ni lai khawma Group thuoitu lo ni tah hlak a nih.

POLITICS TIENGAH:

Kum 1987 khan Political Party-ah lutin, M.N.F General Hqrs Joint Secretary a nih a, Party tadinga thahnemngai le inpezo tak a nih a, Hmar Hnam a hmangaina le sirde-a um chu ngaitheilo in kum 2005 hin HPC (D) a zawma, General Secretary sin chel nghalin, Kum 2012-ah HPC (D) Chairman a chel laiin Delhi Airport-ah man a nih a, Jail-ah hun iemani chen an tang hnungin Bail-a insuo a nih. 2nd April, 2018-a Mizoram Sawrkar le HPC (D) inremna thuthlung ziek a ni khan, a ma Chairman-na hnuoia ziek a ni nghe nghe.

Taksa bawrsawmna le insawiselna chi hrang hrang hung neiin, Damdawiin hmun hran hran hieng Imphal, Guwahati, Shillong le Delhi hai panpui a nih a. Dt 27th May, 2019 khan NEIGRIHMS Shillong Damdawiin panpui nawk niin a that pei beiseiin Shillonga inthawk Dt 8th June, 2019 khan in tieng hungpui a nih a, vangduoithlak takin Dholai, Assam-ah motor accident tuokin inrang taka Aizawl panpui niin, Civil Hospital, Aizawl-ah admit nghal a nih. A natna in zuoltieng a pan peia, that tieng lawm lawm pan lovin ni 25.06.2019 khan Sakawrdai hung panpui a nih a. Chawhnung dar 3.30 in Sakawrdai hung tlungpui niin, ringlo le beisei naw ang takin zan dar 9:20PM in ngai ngawi ngawiin a taksa ei lo inthe pui tah a nih. June 26, 2019, sun dar 12:00 ah Sakawrdai thlanmuol ah vuiliem alo ni tah.
Don't Miss
© all rights reserved
made with by Simon L Infimate