Guwahati, May 15, 2019, Virthli (ONP): Guwahati khawpuia Zoo Road laia Central Mall tuol ah thimbut khan grenade ni dinga ring bomb a puoka, mi pahni 2 an thi a, mi 8 an hliem thu dawng a nih. Vangduoithlak takin Hmar tlangval Edward Tuolor S/o (L) Puihrawng Tuolor, Railway Colony, Haflong chu hliem tuok hai lai a thang ve a, Gauhati Medical College panpui nghal a nih.
Update: Hi thu hi hriet ani le inruolin HSA le Welfare thuoitu hai chu a buoipui dingin an fe nghala, Tv. Edward hi a awm lai le a kut hai chu a bomb hlekin a denga, a deng pawpna hai khawm an thui zo tah thu le biek thei ani tah thu dawng a nih. Tv. Edward hi Aryabhatta Jr. Science College a Class XII inchuklai ani a, tuta bomb puokna bul laia um a nih.
