Responsive Ad Slot

IN AIHAL

Sunday, March 24, 2019

/ Published by Simon L Infimate
~ Jami Darngawn

March 21, 2019 Tûk ka tho char chun ka lungrilah chieng êm êmin "IN AIHAL" ti a um char chara thildang ka ngaituo khawmin a bo thei chuong nawha, hla thu ang deu damin a hung um peia ka hla mi naw em leiin ka ngaisak sunzawm pei ta nawh a.

Amiruokchu, hang topui el ding ka ti laiin ka lungrila mi mawrtu um angin ka um zing leiin ka lungrila um ang angin hung suklang ka tih. "IN AIHAL" ti umzie chu ka hriet danin inmil lo/inrem lo tina niin ka hrieta a bikin fak tieng pang a kawk deu niin ka hriet bawk.

Vawikhat chu ditsak taka min an mi pek thlaihna chikhat chu hmepawkin sahro leh kan suong a, hme dang khawm iem a ni zat um sienkhawm kha hmepawk kha ka pasal leh inhnik kan ti deu a ni awma kan fak țeu tah a, kan sunghai ruok chun kha hmepawk kha an lo fak bek naw a hawi, ka naupa a naupang lem nautet lai nene ka pek a ni nghe nghe.

Chuongchun leh zan a hung sawt deu chun ka luok a suoka ka zawi tawp tah a, ka um ang chun ka pasal khawm a um bawk, kan beidawngin Hospital tieng kan pan tah, Hospital kan tlung chun ka zawi der taha țawng khawm ka țawng thei ta nawh. Nurse hai hlak chun in hmangai leia sung le kuo haiin an phal naw leia tur dawna thi tum angin an mi ngaia an mi en dan chu indik lo deu a nih. Kei ni nupa hlak chu thi tum nek nekin dam kan tum nasat vei le chun aw eh ! He he.

Chuongchun a tawi zawngin hril el inla kan thil fak suol lei a ni ti chu doctor han an hriet suok taha kan um dan chu kan thil fak hai kha "ln aihal" a lo um lei a ni chuh !  Chuongchun Lalpa zarin kan thi naw chauh a lo nih a, darkar iengzam a ni zo chun in tieng kan inlawi thei taha ka lawm hle a nih. Khang anga rinum kha Lalpa zarin tuok nawk ta naw hram inla ka nuom hle a nih.

Ka thil fakhai an aihala ka tuor naw em leiin ka thipui vang angin, thlarau rama khawn ei ni a hin inmil lo/inrem lo ei thaw/fak pha hin an aihal thei bawk a nih ti chu a nih.

1. Lal lsu thisena sawpfai/intlan ka ni tak leiin.

2. Suol rawngbawl hi ka thlarau le inmil lo/inrem lo IN AIHAL ang a nih.

3. Kan ringnaw kar suolin a mi hung bei chang hin a chang chun ka lo tlu hlak. 

4. Sienkhawm tluk sawng chu ka tum ngai nawh Lalpa zarin.

5. Hrat lo le chau taka ka um lai khawm, hmangaina sip Lalpa Pathien chu mi țhangpui/kei tho dingin ka ko hlak a.

6. Lalpa Pathien chun A nau duotlai rawl hi a ngai nuom tak a lo ni hlak.

7. Aw Lalpa ! Ka lawm ie, suol Setanin mi hne tumin mi hung bei hlak sienkhawm.

8. Kei a hin Nang l um tak leiin suol remruothai chu kan aihal pui an tah.

9. Ka taksa hin tuor hlak sienkhawm, pasal țha ramsuok hling le buorin a lo ziet rang angin.

10. I kuom ka hung tlung pha chun, pasalțha tuorna leia a taksa ser um angin, I hmaa chun suol leia ka tuorna hai hi mawi lem ka tih.

Tiemtu ditum i thlarau leh in aihal thei thilhai chu Lalpa Pathien thilthawtheinan lo bo vawng vawng ta raw seh. Amen.
Don't Miss
© all rights reserved
made with by Simon L Infimate