Responsive Ad Slot

Lakhipur Dev. Block President-in Office hluo ṭan

Wednesday, February 20, 2019

/ Posted by Simon L Infimate
Hmarkhawlien, February 20, 2019, Virthli (ONP): Tarik 18 Feb. 2018 zing 10 khan Pu Jacob Lalzarlien Faihriem, President, Lakhipur Development Block chun Pathien kuoma ṭawngṭinaa hun hawngna neiin office a lo hluo ṭan tah. Ngaina taka fiela um angin, a hmasa takah Pastor Lalringmawi Lungtau-in Bible chang tiema infuina le Pathien kuoma ṭawngṭaipekna hun hmangin office hi a lo kai ṭan ta a nih. Hi hun hmangpui ding hin Party leaders, office staff le ruolṭhahai khawm an fe khawm bawk.

Pu Jacob Lalzarlien Faihriem hin kum 2018 Assam State sunga Goan Panchayat Election huna khan 76th Fulertal GP hnuoia Anchalik Pachayat Member hung tling tungin, Block President lai hiel a hung ni tah a nih. Lakhipur MLA Constituency hnuoia hin Block pali a um a, chuong Block tinhai hnuoia chun Gaon Panchayat pasari pei a um bawk a nih. Chuong Gaon Panchayat tinhai chun Anchalik Panchayat Member pakhat pei neiin, a tam lem hnena changtu party chun Block President ding hi an siem hlak a nih. Assam rama Hmar nauhai ta ding chun, a vawi khatna dingin Panchayati Raj hnuoia elected hai laiah Block President hi an chel vawi khatna a la ni bawk. Chuleiin, hieng ang nina pawimaw tak Assam rama Hmar nauhaiin an hung chel tung hi sirbi pawimaw le inchik tlak, hnam hmasawn tungna ropui tak a ni leiin ei lawmpui tak zet a nih.





Don't Miss
© all rights reserved
made with by Simon L Infimate