Responsive Ad Slot

THISEN MAN TAM A INTLAN A NIH

Thursday, January 24, 2019

/ Posted by Simon L Infimate
~ Weldy Pa

Kum 25 hma tieng khan Sinlung Hills tlangpui hi tu naupa khawma 'Sinlung Hills' ti'n an la ko ngai nawh. Hi hming hi put a tih ti tu naupa khawma suongtuo pha kher naw el thei a nih.
Lungrila an ngaituo phak naw lai zingin hnam insingsat runpui a hung tlunga. Chu, hnam kalsiem a chun hnam thisen paitu ta phawt hai chu phur le tha tho takin mawphurna an inbel a nih. Inchûkna, le fak zawngna hai maksanin an fe suok a nih. Chuong mihai chun hnawt dar, sawisak, vuok le kap hai an tuora; vuok thi-dup le dangcharin an inruma, mi ṭhenkhatin hril seng ruollo a nâ hliempui an tuora, mi tam takin hringna an chân a nih. Kha hnam kalsiem meipui chawk kha mei mei lo tak a nih.


Chawlzai reng rel lovin hnam meiser sittu hai chun ram tiem ram pan tumin an hmaa thil um chu huoisen takin an baw pei a. An doral hai chu mi lien tak tak le mi hrat tak tak hai, ralthuom nei ṭha anni ti hrezing sienkhawm hnama siemtu, an biek Pathien hrezingin kir an rêl chuong nawh. Mi ṭhenkhat in an deusawa, an sawisela, an diriêm em em lai khawmin ' ka thisenin ṭhangthar lai thu la hril a tih.' ti'n jordan ral kai tumin ringna le huoisenna a inthuom in hmatieng an intawl pei a hlak a ni kha.

Theina le hratna popo an hmang zo hnung chun insung, kohran le khawtlang hai an maksan chau ni lovin an hnam ta dingin an thisen chu an inhlan ta a nih. Iêngkim inhlanna lungril, sunga thawktu um, chu hnam hmangaina chu an thuk a nih.

Ṭhangthar hai ta dinga ram inhawi le mawi, hnam puonzar hnuoia lengna ding suol suok nuom hle hai sienkhawm, an tha hai a lo ṭhum zo ta leiin thisena an intlan dawk thei umsun chu Sinlung Hills a hung ni tah.

Thisen a inchawk a ni leiin ngainêp chi ni naw nih. Sinlung Hills hi a hlui le thar, suol dawk hmasak le suol dawk hnuhnung lem hril mawia bik neia, hril mawilo bik nei hi thil thaw chi ni naw nih; thisena intlan ve ve a nih. Mi ṭhenkhat in thisen a inchawk a nih ti hrelo ang ela ṭawngbau ei nei hlak hi chu bansan a ṭha khawp el.

Ei thisen man hi tuta inthawk chun hrilselin, sawisel ta naw hram ei tiu. A ṭha lem, ei ngaituo dawk thei a ni sie naw chun ei intetpuka, ei sawisel rak hin râ ṭha insuo naw nia; umzie nei chuong bawk naw nih. Khawvel thiemna le varna hung insang pei a ta, ṭhangthar mithiem le rem hriê lem hai zarin hi thisen man ram hin hma la hung sawn pei a tih ti hi ka ring tlat a nih.

Hnam pasalṭha muol liem ta hai popo kha hung tho nawk sien, an thisen man vawisun huna ei sawisel le ei inchuo hrawn luoi luoi hi hung hmu hai sien an lungawi i ring am? Hringna chân ta hai thisen kha inza a um a nih. An hnam ta dinga thei tawpa ṭhang anlak laiin " sum hmang, rukru" tia mihai deusaw le hmusit an nih i sawn naw! Khang pasalṭha hai kha an nu le pa haiin an hmangai ngawi ngawi hai an ni ve a nih. Ṭhenkhat lem chu nuhmei nau le te nei hai an nia, an nauhai an ṭap changin an nuhmei haiin " mamte ṭap ta naw ro, i pa hnam san dingin a fe a, a hungkir phat leh inthil dit hai a hung hawn ding a nih." Ti'n an ṭawng thlamuon hlak. Sienkhawm, intieng inlawi zo ta lo hai kha aw....

Hi sinlung tlangpui, thisena inchawk hi hringna inhlantu hai inzana lei le an maksan an sunghai le "pa" ti ding nei ta lova fahra hai lainatna lei bekin i lei kha thunun rawh.

A hnam thlang Isreal hai khawm kum 40 chuong thlalera an invakvai a nih. Eini khawm Pathien hin ei thil dit tak hi, hun a la ti naw a ni el thei a nih. Chuleiin  THISEN MAN TAMA INTLAN SINLUNG HILLS hi duot tak le thiem takin enkawl phawt ei tiu.

Sinlung aw, Sinlung kan ngaina che, i sakhming par ang chuoi el ding hi
kan phal lul nawh zaleng nau hai'n; vulzing raw aw sinlung khawpui kan tawnah

Dated. Sinlung
23.1.2019
Don't Miss
© all rights reserved
made with by Simon L Infimate