~ Jami Darngawn
BC 800 lai vel khan Isai chun, Nunghâk thienghlim pakhat chu inrai a ta, naupasal nei a ta, a hminga Immanuel sak an tih, ti hi a lo hril lawk a nih. Emmanuel (Isu) insiengna nu ni nuom nunghâk khawm tam tak um ngei an tih. Nisienlakhawm chu ding chun, thil ṭul pahni a um.
1. Nunghâk thienghlim ni a ṭul.
2. Pathien ngaisak zawng ni a ṭul bawk a nih.
Mary kuomah chun Pathien thu a hung tlung tah! “Mary ṭi naw, Pathien ngaisak zawng I nih” a hung ti tah! Mary chun mak ti takin, “Chuongchu iengtin am ni thei a ti leh? Pasal ka nei si naw a” tiin a dawn a nih. Nunghâk thienghlim chu an inrai ngai naw hrim a nih. A lo inbeisei phak naw hle a nih. Isaiin a lo hril lawk suk diktu ni dingin Mari chu Isu paitu dingin thlangin a um tlat el! a san iem ning a ta le?
1. Nunghâk thienghlim a ni lei: “Nunghâk thienghlim in ti” tam tak um mei an tih, “In ti” hai chu Lalpa'n a dit nawh, “Pathien ti” ni a ṭul lem a nih. Vantirko in, “Inrai I ta, naupasal I nei ding a nih” a ti khan, Mari chun, “Iengtin am ni thei a ta, Pasal ka nei si naw a” a ti a nih. Nunghâk thienghlim ta lo, pasal lo zalpui hlak nisien chu, hieng hin a dawn ngam naw ding a na! A lungril in, “Kha zana ka zalpui pa nau kha mani ding aw?” ti vel naw ni'm. Sienkhawm, chuongchu ni lovin Isu piengna ding khawpa Qualified a lo ni lei a nih thlanga a um nasan chuh.
Awleh, vawisun hin, Isai 7:14 hi ei tulai a ding khawma a la pawimaw zing a nih. Miss world top 5 Qualified ding chun hmelṭha, zei, personality nei, presence of mind nei hai a ṭul. Sienkhawm, sungtieng thienghlimna chu an en ka ring nawh! Pathien ruok chun sung tieng thienghlimna a en a nih (ISamuel 16:7b) Isu piengna ding khawpin i Qualified ve am le? Setan in a lo zâlpui zing zing, suol leh lo in partner zing i ni chun, nangâh Isu hung pieng naw nih, Thlarau Thienghlim-in pâwl ngai naw ni che. Isu piengna dingin I thienghlim/fit naw tina ning a tih.
Sienkhawm, ei vangnei em em ziet chu, zanita setan le i lo zâlkawpna, suol le i lo in partner nahai popo kha, insîra i sim a ni chun, vawisun hin ei Lalpa chun, Isu Krista thisen zarah Nunghâk thienghlim angin a pawm che. Isun a piengna dingin a dit zing che a nih. Chuchu lunginsietna hun, chenchiltu Thlarau Thienghlim hun a la ni lei a nih. Hi hun sunga i thienghlim naw a, Setan leh in lan partner zing a ni chun, Pathien lungsenna chu la tuor ngei i tih. Thlarau Thienghlim huna hin Thlarau Thienghlim ei niah a pienga a mi chenchil zing theina dingin Mary angin insuk thienghlim veng ei tiu.
2. Pathien ngaisak zawng a ni lei: Pathien ngaisak zâwng chu mi ieng ang am an na? A chunga ei hril ta hai angin, lungril chu nunghâk thienghlim ang, lungril chu, Pathien tienga pe mi ni a ngai a nih. Nang a ngaisak zâwng te iem? I ngaisak zâwng hi sum le pai, nuhmei pasal, inruithei hai am an nih? I ngaisak zâwng khawvel tisa thilhai chu i hnâwl fai vawng a ṭul a nih. I beisei, i lungkham le i ngaisaktak chu Pathien thu ni raw seh. Chuongchun, “Mary ṭi naw Pathien ngaisak zâwng i nih” ti hi nangah hung tlung veng a ta, Isu/Thlarau Thienghlim a hung pieng ding an nâwm.
Mary inngaitlawmna: Luke 1:38 “Lalpa suoknu ka nih, I thu angpeiin ka chunga tlung raw se” ti thei mi a nih. Lalpa'n mi chapo a theida. Inngaitlâwm hai kuoma chun lunginsietna a pek hlak. Jacob 4:10 “Lalpa mithmuin inngaitlawm ro, chuongchun chawimawi a ti cheu” a ti a nih. “Lalpa suoknu ka nih, I thu angpeiin ka chunga tlung raw se” ti ṭawngbau hi a hriltu chun, a hrilna pa/nu laka chun a tlawm hle a nih, ti inhrietna ṭawngbau a nih. Chuleiin Pathienin Mary chunga a programme hi a fe thlengpui a, A naupa piengna nu ni dingin a chawimawi a nih.
Setan khawma a sinthaw chu a thaw ve zinga, Sawrkar le helpawl hai chun, a châng povin inkap chawl an puong hlak, Setan hi inkap chawl nei nuom ṭhak lova mi dotu a nih. “Indona chu Lalpa indona, hnena chu Lalpa ta” ti hi ei hla-do insam ni pei raw se!
Ei Pathien hang var ziet hi, “Pathien nau ka ni tah tho an nâwm” ti a chapoâr el kha a dit nawh. A ropuina hi hmu zing in la, ei chapo nawna dingin ei tlingnawna le tlaknawna hmu zing in la, Isu Krista zara ei hamṭhatna hi hmu zing in la, “Lalpa I suoknu/I suokpa ka nih, i thu angpeiin ka chunga tlung raw se” ti thei zing in la, ti a nuoma, chu ngirhmun a inthawk chun mal mi sawm a nuom a nih.
Awleh, Christmas ei hmang mek ding a hin, Mari anga lungril thienghlim le inngaitlâwm takin “Isu, vawisun hin kan lungril tlawmtak ah, insieng thar nawk la, nang kan chatuon Lal dingin. I van zaipawl hai hla mawi hi kei a hin mi hung rem thar pek nawk rawh” tiin ei lungrilah ṭawngṭaiin hmun inkien seng ei tiu.
LALPA'N A THU MALSAWM RAW SEH.
