Responsive Ad Slot

Silchar ah Hmar nauhaiin Sikpui Ruoi a vawi khatna dingin an hmang

Friday, November 23, 2018

/ Posted by Simon L Infimate
Silchar, November 23, 2018, Virthli (ONP): Vawisun Thlaphal ni 23, 2018 hin District Library Auditorium, Silchar hmunah a ṭum khatna dingin Silchar Hmar nauhaiin Sikpui Ruoi hlim le ditkhawplo takin an hmang zo.

Program hi zing dar 11 in ṭan niin. Sikpui Pa Pu S. K. Khobung-in Sikpui Lung hawngna le puonzar keipharna a nei. Hun khatna hi hun insersuon tieng deu niin, lawmlutna thucha, thuhriltawi Sikpui Pa le Dr. R. K. Singson a’nthawkin ngaithlak a ni a, Sikpui Lam inentirna HSA Silchar Branch a’nthawk a um bawk. Hla tieng tuolsung zaimi bakah khuol zaimi Lien Shakum, Je El Hmar le Lalsanglien Zote hai khawmin hla an sak ve.


Sikpui Ruoi Committee Silchar chun Hmar hlasakthiem Lalsanglien Zote chawimawina inhlanin, thuziek le sumfai cheng 10,000 chu Pu Lalringum Sanate le Dr. Lalzawmlien Hmar haiin committee aiawin an inhlan.

Hun khatna hi dar 1:30 in a tawp a. Chawl sung kamcherek nei niin, hun hnina chawhnung dar 2 a ṭan nawk a nih. Chawhnungah hin hla ruoi ṭhe niin, mipui an hlimtlang hle. Beisei lo takin Hmar hlasakthiem Nk. Lalparzo Sanate hmel a’n lang hlau a, mipui lawm a hlaw hle bawk. Thuommawi le Kut Nunghak le Tlangval inelna chun hlutsak a hlaw hle bawk a. Kut Nunghak dingin Chawngthazo Keivawm, Kut Tlangval dingin Laltuoklien Hrangate hai ṭhalai huongah thlang an nih. Hienghai baka hin naupang, nupui le papui pawl khawm thuommawi thlangna a um ve bawk a nih.

Zantieng dar 4:30 in hun ditkhawplo takin suktawp a ni a. Sikpui Ruoi vawksa hmepawk, arsa hmepawk le nga hme kiltlang a nih. Bu fa po hi mihriem 400 bawr vel an nih.

Sikpui Ruoi Committee chun tlawmngai insuoa thlaisuong dinga a fiel Muolhoi a’nthawka hunghai chungah lawmthu a hril tak meu a nih. Chu el bakah, hi hun a hlawtling theina dinga tha le zung, sum le pai sengtuhai po po chungah lawmthu a hril bawk.

Silchar hmuna Sikpui Ruoi programe hi All India Radio Silchar, Barak TV, Manipuri News, le chanchinbu dang danghaiin an hung kan nghe nghe bawk a nih.(input: Gospel Songate)

Don't Miss
© all rights reserved
made with by Simon L Infimate