Responsive Ad Slot

Pu SN Ngurte ei lo ṭhe tah

Monday, November 19, 2018

/ Posted by Simon L Infimate
November 19, 2018, Virthli (ONP): Pu SN Ngurte, Chairman, Hmar Literature Society (HLS) chu hun iemani chen a'nthawka zunthlum natna leia enkawla um chu Imphal hmun ah dar 4:30PM vel khan ei lo ṭhe tah.

Lusûn sungkuo hai ei tuorpuiin ei sûnpui tak zet.


--------
A chanchin Tawi:

Pu, Ngursanghlei le Chawnghmunkhawl hai kara March ,1938 kumin Tinsuong Khuo, Pherzawl district a, a hung pienga, State School a Pawl VI zoin,1959 kumin ami'n an hril Matric  a passed a,Tribal Students hai lai an sang tak nghe nghe bawk anih. Kum 1963 kumin Guwahati University  hnuoia BA.(Economic Honours) in Second Class a zo a,1971 kumin Madras University hnuoia BP. Ed 1st Class a zo nawk thung anih.

Kum 1964 Noverber thla a inthawkin Manipur sawrkar hnuoia Higher Secondary School  a Lecturer sin thawin 1980 February thla in Project Officer (Adult Education) a promotion hmuin,1988 Aug thla in Joint Director(Adult Education) sina hlangkai ani nawk nghal anih. March 1,2002 kum a inthawkin sawrkar sin alo chawlsan nawk ta anih.

Kum 1959 October inthawk 1962 chen Inchuklai Nun Editor sin thahnemngaitakin a chel nawka, 1961 May thla a inthawk 1962 chen khan HSA General Headquarter a Vice -President sin chelin mawphurna nasatakin a hlen nawk anih. 1982 a inthawk in Hmar Hnam Dân Drafting committee chairman ni nawkin,kum 1990 a inthawkin HYA General Headquarter chun Hmar Hnam Pumpui hmang dingin an Dân draft chu alo pawm ta nghe nghe kha anih.

Kum 1985 kuma inthawkin 1992 chen Manmasi Welfare Society Founder Secretary sin chel nawkin, 1987 kuma inthawk 1992 chen khan HSA General Headquarter a Adviser sin hnesaw takin a chelsa bawk a, 1986 kuma inthawkin kum 2005 chen khan HYA General Hq. a Executive Member  sin a chel nawk a, 1988 kuma inthawk Sinlung Publishing Society a Board of Directors pakhatin a thanga,1989 April thla a inthawk khan Hmar Literature Society a Secretary sin a chel a ,Secretary sin a chel sung hin Seminar Tum -3 nei ania, Matric a inthawk B.A chen Hmar (MIL) Text Book po po siem zo vawng niin,Chukhela Manipur Sawrkar le Manipur University a Modern Language a inpawmtir vawng ani bawk anih. Kum 1999 kum bula inthawk Hmar Bible Translation Committee a member a ni nawk bawk a nih.

Kum 1982 a inthawk khan tu chen hin Lekhabu bu-30 lai lo ziek ta in, chu hai lai chun Bu-25 lai chu sut vawng alo ni ta nghe nghe. Chuong a lekhabu ziek hai lai chun Novel bu-16, Text book Bu-8, Drama -3 le Bu dang -3 hai chu an nih.

Churachandpur, Tuithaphai, Rengkai Road hmuna cheng le khawsa an nih. Ama hi Hnam le Khawtlang, Kohran ta dinga mi in pe zo le tlawmngai thei tak niin, ICI Kohran a inlawi an nih.

Credit: Manmasi Year Book, Vol. 1, 2005
Don't Miss
© all rights reserved
made with by Simon L Infimate