Responsive Ad Slot

Jinam Valley a HSA 3rd Block Conference hmang zo; Tattephai khuo lampuiin lungril a tawk hle

Thursday, November 1, 2018

/ Posted by Simon L Infimate
Haflong, Virthli (ONP): 29th - 30th October 2018 khan HSA Jinam Valley Block chun ropui takin 3rd Block Conference chu Tattephai khuo ah an hmang. Hi hun a hin Tv. David Keivom President, NCHISF chu Khuolliena ṭhangin Pu Zochawlthang Zote GB (Khuo lalpa), Tattephai chu Functional President in a ṭhang bawk.

Lampui ṭhat naw leiin motor a fe thei naw a, Khuollien hai khawm Organising Committee haiin Tractor ngaituo pekin darkar 3 lai vel lampui ah hun an hmang a nih.


Jinam Valley hi Pu CH Khawthlang NC Hills Autonomous Council a CEM hmasatak a constituency a ni a, amiruokchu Road, Electricity, Water Supply, Medical, Mobile Network, Internet le School ṭha um lo a nih. An nitin mamaw lakna Bazaar hnai tak khawm darkar 5 vel ke a lawn a ngai a, iengkim an mamaw popo hi headload deu vawng a ni hlak bawk.


Jinam Valley Block huom sunga inthawk unit tina inthawk palai ṭhahnem tawk tak fekhawmin rorelna nei a ni a, chun Flag keipharna chu Khuollienin a nei zoin Unit tina inthawk Hmar hnam lam inruolsiekna (Famtah Pu T. Tothang Songate Hrietzingna) nei a ni a, chu zo ah Volleyball (Famtah Pu VL Lianzaua Tuolor Hrietzingna) inelna nei a ni bawk.


Zantieng HSA Jinam Valley Block hai chun Khuollienhai chu bu fak tlangpuina an nei a, hi hun a vek hin thu tam tak le hmalak tlang dan ding hai hriltlangna an nei a, abiktakin Jinam Valley sunga Electric meivar a lut thei ngeina dingin ISF hai leh hma laktlang ngei ding ti rawtna siem a ni bawk.


Zan hun ah Hla Ruoi in hun hmang a ni a, HSA Block Choir, Local Artistes hai a'nthawk hla ngaithlakna nei a nih. Special item Vulmawi Band (Mauchar). HSA Jinam Valley Block in inchûkna tienga hlawtlingna ṭha dawngtu hai chawimawina an nei a, Upa Lalrobul Hmar, President le Pu Varmawithang Huolngo haiin inhlana an nei bawk.

Video - YouTube Virthli Channel ah en thei:  https://youtu.be/zM3wzvew91M
Don't Miss
© all rights reserved
made with by Simon L Infimate