HYA Tuithapui JHQ Ambulance Project a dingin sum an inhlan

CCPur, November 15, 2018, Virthli (ONP): HYA Tuiṭhaphai Jt. HQrs. Ambulance Project thiltum hi ram le hnam ta dinga thil ṭangkai taka ni ding bakah mi tamtak ta dinga lungkhambângna a ni ding ti an hriet leiin, kum 1953 ah lo famtah Pu Sunkhûm Hriler, Rengkai a tu-le-tehai chun an nei ang ang thawkhâwmin Mr. & Mrs. Sunkhũm Hriler Charity Fund an siema, vawisun khan Pu Sunkhum a tu-le-te laia upatak Dr. Lalnghaklien Hriler-in Pu Vanlalhlun Hrangchal, President HYA Tuiṭhaphai Joint Headquarters kuomah cheque in Rs. 33,799/- (cheng singthum sangthum zasari le sawmkuo pakuo) an hlân. Sunkhũm a tu-le-tehai hi Dr. (Upa) Lalnghaklien Hriler le a unauhai, Pu Herbert Lalsanglur le a unauhai, Upa Lalbiekluoi le a unauhai, Pu V L Renga Hriler le a unauhai, Pu Michael Joute le a unauhai baka an tunu Pi Lalremthar Khawbung an nih.

Dr. Hriler-in a hril dân chun Sunkhûm a tu-le-tehai hin WhatsApp group an neia, an unauin fiemhai thawin an in pâwl tlang hlaka, chun, chanchin inhrietpâwnaa an hmang bâka Pathien thu hriltlângna khawmin an hmang hlak. Chun hi project fund ding hi dêngkhâwm dinga an rawt hma hin Charity Fund: ṭhangpuingaihai thei ang anga ṭhangpui dinga fund siem hi an lo tum rêng a nia, member ṭhenkhatin a bul ṭanna dingin HYA project a hin hma lâk ṭan nisien tia an hung rawtna chu ṭha ti tlângin an nei ang ang, a tlâwm a tam ti um lovin an dengkhawm a nih tiin a hril.

Hi Charity Fund a an Convener chu Dr. Joseph Lalhmingthanga a nia, Co-convener chu Pu Alan Zozarlien a nih