~Jami Darngawn
Pathien rama sinthawtu ni ding chun lekha thiem le hausak kher ngai sien chu a theinaw tam tak um ei tih. (Kei khawm ka thei naw nghal.) Amiruokchu, lekhathiemhai le mi hausahai khawm Lalpa rawlbawltu ropui tak an ni thei ang bawkin mi pasie, mi mawl, lekhathiem nawhai khawm Lalpa'n hmangruo ropui takah a hmang thei bawk a nih.
Thilthawhai 4:
13. Chun Peter le Johan huoizie chu an hmu chun, lekhathiemnaw le mi mawl el an nih ti an hrietin, mak an ti hle a. Isu kuomah an um tah ti an hriet tah a.
14. Chun an mi sukdam chu an kawla ngîrin an hmu a, iengkhawm an sawisêl thei si nawh.
15. Chuongchun an rorêlnaa inthawka an infetir hnungin an inrawn a,
16. “Hieng mihai hi iengti'n am thawng ei ta? thilmak ropui an thaw ti Jerusalem khuoa um popovin an hriet tah hi, eini khawmin ei sêl thei si naw a.
17 Nisienlakhawm mi kuoma ân dar nawk zuol nawna dingin, tuta inthawkin tu kuoma khawm hi hming hin thu an hril nawna dingin inṭhi rak ei tiu,” an ta.
18. Chuongchun anni chu an kova, Isu hminga thu hril dêr lo ding le, inchûktir ta dêr lo dingin an ti tlat a.
19. Nisienlakhawm Peter le Johanin an kuomah, “Pathien mithmuah, Pathien thu zawm nêkin nangni thu zawm ân dik lem am ti, ngaituo ro.
20. Keini chu kan thil hmu le hriethai kha hril lovin kan um thei nawh,” an ta.
Peter le Johan huoisenna hi entawn tlak ava ni de, Lalpa ropuina ding chun huoisen khawm a lo ṭul hlak chu a nih.
Keikhawm 7-11-2018 zan mang, tak angin, mi pakhat a hmel ruok chu ka hmu thei naw a, hieng hin a mi tih, "Nitin thu ziek i post hlak hi thaw ta ngai naw rawh, i thaw nawk a ni chun" tiin lungsen deu chun a mi tia, ka thaw nawk a ni chun harsatna ka chunga tlung ding angin a um a nih. Chulaizing chun hming tam tak ziekna ka lo hmu bawk a, kei ka hming ni awm tak chu a hranin a'nchik a nih.
Zingkar ka hung tho chun ka mang a lo nia, ka mang chu mak ka ti hle leiin ka pasal kuomah ka hril nghe nghe a nih. Ani ngei el, kei mi mawl le thiemna/inchûkna neilo nu hin Lalpa a'nthawka ka hmu le hriet hai hi hril naw thei kan naw leiin Lalpa ringsanin huoisen takin ka hril/ziek lem hlak a nih.
Tulai thuthang (Ran hai chunga nunrawng taka khawsa) vel leiin nasa takin țhang ka lak ve a, ka thei tawkin ṭawngṭai kaisan ka fiel a, chu chu Setan-in a lo theida nasa a nih ti chu ka chieng hle a, Lalpa ram lienna ding a ni phawt chun huoisen takin hril/ziek pei ka tum lem a, dik tak chun Pathien thu ka puong suok ding hin harsatna ka tuok ve hlak a, a chang chun ka taksa chenin natna ka tuok hlak a nih.
Iengpo khawm lo nisien Ringtuhai hi indona hmuna um ei ni leiin a chang chun ei tuor ding reng ah ngai ei ta, amiruokchu a thlawnin tuor nawng ei tih. Hi hnuoi ram a hin lawmman dawng kher naw inla khawm Lalpa'n Ama hmangaituhai tadinga a buotsaina ram/hmun ei tlung pha chun, chu hmun a chun indona um tah nawng a ta, lungngai țapna um bawk ta nawng a tih. Chun, ei thaw ang peiin Lalpa ei Pathien chun lawmman mi la pe ngei a tih.
Jakob 1:12.
Thlêmna tuor hrâm hrâmtu chu a ham a ṭha, fiea a um hnungin hringna lallukhum, Lalpa'n ama hmangaituhai kuoma a tiem chu a hmu ding a ni si a.
LALPA'N A THU MALSAWM RAW SEH.
