CCPur, Oct. 9, 2018, Virthli (ONP): The 1st Pherzawl District Level Sikpuiruoi Cum Sinlung Hills Council (SHC) Lawmna Programme chu hungtlung ding Dec. 4 (Zan) le 5 (Sun le Zan), 2018 haia Pherzawl District Headquarter, Pherzawl hmun ah puithu taka hmang dingin Oct. 9, 2018 sun a Organising Committee in Co-Convenor, Pu Ramsangthang Infimate, Chief of Pherzawl chengna In, Rengkai a meeting an neina hun ah thutlukna an siem fel tah. Hi hun a hin mawphurna tum tum cheltu ding hai suk felin, hmalak pei dan ding hai an hriltlang. Hi leh inzawm hin Souvenir Magazine buotsai ning a ta, thuhril ngaithlakna, Sikpui lam, Sikpuiruoi ruoiṭhe, Pi-le-pu nun pholangna bakah Manipur le Mizoram a Hmar hlasak thiem inlar tak tak le Live Band fiel anni anga mipui hla le rimawi a an in awi ding thu Organising Committee a Publicity Department chun an hril. Programme kimchang lem chu meeting nawk hmasatak ah sukfel a ni ding le mipui hriet a puonglang vat a ni ding thu hai an hril bawk.
