Responsive Ad Slot

HSA Founding Day ursun taka inser

Wednesday, October 3, 2018

/ Posted by Simon Infimate
October 03, 2018, Virthli (ONP): Hmar hnam huopa pawl upa pawltak le lien pawltak Hmar Students' Association (HSA) a piengchampha a kum 79-na chu vawisun Hmar nauhai chengna hmun hrang hrang ah ursun taka inser a nih. Insukhlimna/Sports, Career guidance, lung phunna, HSA Flag keipharna, rimawi tieng panga insukhlimna le hmun thenkhat a hai chu ruoi meu thein hun an hmang a nih.

Mizorama HSA Kolasib JHQ huoihawtna hnuoia IOC Hall, Vairengte-ah ni 3 zet aw prokram siem ani a, taksa tienga insukhlimna, career guidance hai nei ani bakah Pathien thu tienga rawngbawlna Rev. H.P Runremthang in a nei bawk a nih. Vawizan hin Chief Guest in Pu Robert Romawia Royte hmang ani a, hlasakthiem Nk. Gladys Lalparzo, Carolyn Biakthansangi, Margy Lalremruati le R. Lallawmsanga haiin mipui hla tieng panga an inawi.



Saiphai a khawm Career guidance, sports hai nei ani a, vawisun Chief Guest in Pu K. Lalrintluanga, MLA, 6-Serlui Constituency hmang a ni a, School hai khawm chawl puong vawng a nih. Saipum a khawm prokram puithu taka hmang a nih.

NC Hills ah Huonveng Unit chun HSA Founding Day le HSA Huonveng Unit Silver Jubilee (1993-2018) lawmna chu Huonveng Community Hall ah an hmanga, hi huna hin Huonveng Unit lo phuntu Pu Lalthlirlien Darngawn, AFS, Chief Accounts Officer, Govt.of Assam hmang a nih. Silver Jubilee lung phunna, Jubilee Souvenir tlangzarna hai nei ani a, bawng pahni zet thatin ruoi an the a nih. Rimawi tieng pang ah tulaia inlar em em Tv. Jajai Singsit, Nk. Christina Shakum, Rapper Tv. Je El Hmar le local artiste iemanizatin mipui an inawi a nih.

Muolhoi Unit khawmin sun le zan prokram CH Khawtlang Hall ah an hmanga, hi huna hin Chief Guest in Upa Lalsangmawi Hmar, AFS, Asst. Conservator of Forest, Govt.of Assam hmang a nih. Sun huna Career guidance prokram le hun chidang dang hai hmang ani a, zan huna hla ruoi nei ani a, Mizo Rapper inlar Lilzo le local artiste han mipui an awi a nih. NC Hills a hin P Hnachangzawl, Retzawl, Dawiheng le khuo iemanizatin HSA Day hi umni khamin an inser a nih. Karbi Anglong ah D. Hmarveng a khawm lung hai phunin inser a nih.


Cachar le Barak Valley a chu Hailakandi, Diger haia inser ani a, chun Jiribam, Gilgal, Ngampabung, Ankhasuo, Delhi, Guwahati, Imphal haia khawm flag keipharna hai neiin hunser hmang a nih. 
Don't Miss
© all rights reserved
made with by Simon L Infimate