Responsive Ad Slot

Allahabad khawpui hming Prayagraj tia thlak

Tuesday, October 16, 2018

/ Published by Simon L Infimate
Lucknow, October 16, 2018, Virthli (ONP): Uttar Pradesh a khawpui hming inlar em em Allahabad chu vawisun khan UP Chief Minister Yogi Adityanath a Cabinet chun official takin Prayagraj tiin an lo thlak/thleng tah. CM Yogi Adityanath chun kum thar January thlaa Kumbh Mela hmang hma ngeia Allahabad khawpui hming chu Prayagraj tia thlak a ni ding thu hi a lo khekpui tah hrim a nih.


Allahabad hming thlak ding thu a hin nasatakin Opposition parties han an kal a, kum thar election ding tinzawna BJP sawrkar thilthaw niin an hril. Mithiem, inchuklai le mipui vantlang ngaidan khawm an kal nuk a nih.

Hming thlak thu a hin CM Adityanath chun kum 500 liem tah, Mughal lal hun lai khan Prayag tia ko hrim Allahabad tia thlak ani thu a hril bakah hi lai hmun hi vadung thienghlim hieng Saraswati, Yamuna le Ganga hai intuokhawmna hmun ani leiin Prayagraj ti ani a, history hre der lo hai chauin hming thlaka um hi sawisel an tih tiin a hril a nih. A tul ani phawt chun khuo hming le lampui hming hai khawm thlak la ni pei a tih tiin a hril bawk a nih.

Yogi Adityanath keihruoi BJP sawrkar hin a hma khawm khan railway station inlar Mughalsarai Junction chu an Jan Sangh leader chawimawi tumna in Pandit Deen Dayal Upadhyay Junction tiin a lo thlak bawk a nih.
Don't Miss
© all rights reserved
made with by Simon L Infimate