Responsive Ad Slot

Organic farming chungchangah Pherzawl district ah Workshop nei

Saturday, September 15, 2018

/ Posted by Simon L Infimate
Pherzawl, September 15, 2018, Virthli (ONP): Tarik 11-12 September 2018 inkar sung khan Pherzawl District sunga aithing chingtu haiin hma an sawn pei theina ding le International Market chena khawm ei inlang ve thei dân ding ngaituoin Horticulture Directorate huoihawtna hnuoia Organic Farming chungchanga workshop/Seminar Pherzawl le Senvon khuoah hai hlawtling taka hmang a nih. Hi hun a hin Horticulture Directorate a’nthawkin Mr. Dev Dutta, Director, Manipur Organic Mission Agency inrawina in Staff iemanizat le media tieng ISTV, DDK, ANI hai bakah MOMA Brand Ambassador nilai mek le Manipur Film Star hmingthang ni bawk Mr. Danny khawm hi Seminar nei naa hin a zu ṭhang ve a nih. Chun, Ginger Festival Organizing Committee a’nthawkin Pu Lalringum Inbuon, Chairman le Pu Ramhluothang, Finance Secretary hai khawm an ṭhang bawk.


Tarik 11 September, 2018 (Thawlenni) khan Pherzawl khuoah Seminar Programme hi hmang ani a, Tinsuong, Damdiei le Pherzawl khuo a Aithing chingtu mi 300 vel zet an thang a. Chun, tarik 12 September, 2018 (Nilaini) khan Senvon, Parbung, Lungthulien, Rawvakawt, Parvachawm le Senvon khuo hai a’nthawkin Aithing chingtu mi 600 zet hi Seminar a hin an thang bawk a nih.

Pherzawl District sunga Aithing chingtu mi 500 hai kuomah a Chi man ding cheng Rs.4000/- seng a pêk an ni bawk a nih. Chun, Horticulture Department in Aithing urṭawlna khawl, a sâwpfâina khawl, a âtdârna khawl le a herphitna khawl hai Pherzawl khuoah an sie bawk. Khawdang dang a khawm la sie pei an tum bawk a nih.

Chun, media hai khawmin nasa taka ṭhang mi lakpui an tum a, ei lampui that tawknaw thu le Sawrkar department dang dang haiin infrastructure an nei ṭhat tawknaw zie le Electric hruihai an zam rei rui a, a taka hmang ding um si lo hai chipchier taka enin a thla an lak bawk a, hieng hai po po hi media hmanga nasa taka mipuihai ṭhangpui an tum bawk a nih. (input: Mr. Ramhluothang, Finance Secretary,Ginger Festival Organising Committee)
Don't Miss
© all rights reserved
made with by Simon L Infimate