Responsive Ad Slot

Nk. Margy Lalremruati le hohlimna

Thursday, September 6, 2018

/ Published by Simon L Infimate
Kum 2014 a HSA Platinum Star Hunt a mi hriet hlaw le tulai hnai ela Aizawl khawpui kawthlera Hmar hla huoitaka a sak leia mipui lawm hlaw le mi ngaiven Khawlian nunghak Margy Lalremruati chu Virthli in a ve a vea, a tawp tawpa chun a biek paw thei ta hrama, a nuom nawsain hohlimpuina a nei thei ta..., Nk. Margy hohlimpuina a inthawk hin thalaihai ta dinga chona nastaka a um ngei ring a uma, an zinna lamtluong a hin mi hai ang bawkin lamsuk lamtung a tam em em a, a chang lem chun hnuk ul khawpa lungsietum a nih.

Harsatna le retheina in a hneban lo Nk. Margy chanchin anthawk hin inchuk ding tamtak hmu ngei ei tih ti Virthli chun a ring leiin a ma hohlimpuina a nei tah a nih.



Kum 1996 khan Khawlian khuo chun nunghak feltak, hnam, khawtlang le kohrana inhmang, hlasakthiem la nei an tih ti reng an dawn phak ngai lo naute ditum takel chun hi khawvel tawngsephur rama hin lamtluong inkho tak hraw dingin khaweng a hmu tan ve ta...Sienkhawm chu naute pawi tawklo chu thla hni/thlathum mi a ni chau tiin vangduoina'n a chungah thla a zar nghala, harsatna dang dang leiin ama hringtu nu le pa an inthe ta hlau el. Tuithlar a nia, Hmangaina le lainatna a hmu ding ang dawng pha reng reng lovin a hringnun a hmang tan ta a, kum thum mi chau a la nih tiin zamsanin a um nawk ta peia, a pu (tuta a pa ni tah) ha'n an siengna nu chu a hmakhuo an ngaituo leiin pasal dang an innei tir nawka, hi taka inthawk hin chu naupang ditum takel chu puhai enkawlna hnuoiah a seilien tah a nih.

Pi le Pu han duottakin enkhawlhai sienkhawm nu le pa thlazar hnuoia ngampa taka chawlhadamna ding nei ta lo chawk chawk chu inphalamna in a sipa, a bei a dawnga, tapa inrumin Pathien a ko hlak a nih. A hung tleirawl hnungin mihai in ah puon sawp le bel nawt le hlo thlo dama inhlawin zirna run a hung bel ta a, tuhin chu nunghak feltak, mi inngaithlawm tak el le thuhnuoi rawltak, hnam, kohran le khawtlangin an i sawr a hung ni tah a nih. Hi tleirawl ditumtak el hi tu mi dang ni loin tuta ei hrietlar Nk. Margy Lalremruati hi a nih. Remruottu Lalpa chun rem a ruota, Remruati chu remruot pekin a uma, remruot pek la ni pei bawk a tih. Virthli le an hohlimna hi lo tiem raw le...

Hming: Margy Lalremruati
Pa Hming: B Zahunga
Khuo: Khawlian, Mizoram

VT- Virthli
MG- Margy Lalremruati

VT: Hello Margy, i dam maw? team Virthli chun hohlimpui che kan nuoma, hun tawite bek mi pe thei i ti?

MG: Ka dam an nawm Pathien zarin. Nangni in dam tlang maw? Kei te lul in mi hohlimpui nuom chu inzak a um de. Tawite chau khawm ni lo sawttak khawm hun ka nei an nawm, hehehe.

VT: I piengna le murna le i hming indiktak mi hril thei i ti?

MG: Hril thei e, January ni 26, 1996 khan Khawlian, Mizoramah ka pienga, kum 2010 khan inchukna sunzawm dingin Aizawl ah ka sunghai belin ka hung uma, tuchen hin ka khawsa zui ta pei a nih. Ka hming indiktak chu Lalremruati a ni a, amiruokchu Margy ti hi ka ruolhai mi kona ka put sawng pei ta lem a nih.

VT: Indawn chi a ni chie dim ka hriet nawa, i chanchin tawite bek hi hril inzakum ti'ng i ti?

MG: Inzakum ti hran love, ka nina a ni mieu sia. Amiruokchu hi thu ka hril lei hin tukhawm ka dem nawa, mi hai ditsakna le lunginsietna ka chang theina dinga Pathien malsawmna inthup (a blessing in disguise an ti manih) a lo ni zing. Ni e, thla 2 mi ka ni khan a mi hringtu pa ka pa'n nuhmei dang a nei leiin kan siengna nu leh an inthe a lo tul ta a, chuphing leh ka puhai intieng kan kir nawka, sienkhawm kum 3 mi chau ka niin kan siengna nu hi ka pu ha'n a hmakhuo an ngai leiin tap pumin pasal dang, pasal thatak an in nei tir nawka, Chu china inthawk chun ka Pi le ka Pu hin nau angin an mi laka, nu/pa tiin ka kova, a mi hringtu ka pa hi Sungte hai nisien khawm ka Pu hnam Khawbung ka put ta a, tuta ka pa (pu) hai hin tuisik ka nia inthawkin an mi enkawl seilien ka nih.

(Hi thu a hril lai hin lungriem in an thlaka an hniek fat fata, chawmkhat kan hohlim thei nawh-Virthli)

VT: A lo ni ngei chu tie, Khawvelin mi ropuia a nei hai hi tukhawm inhawitak le tluong rawnga mi ropui hung ni tah an um naw ang bawkin nang khawma lamtluong inkho tak i lo hraw ve zing a ni chu maw, chanchin ngainuomum tak i lo nei zing a ni chu. Anleh kum iengza mi'm i niin hla i sak tana, mipui hmaa hla i sak tanna hmasatak?





MG: Music hi ka chinte a inthawkin kan hnik ve reng renga, Junior department a ka um lai hla ka sak tana kum 2012 anthawk khan mipui hma ah ka sak tan.

VT: Music le inzawma lawmman lak i nei ta am, pawl a dam i thang am?

MG: Kum 2014 khan HSA Platinum Star Hunt ah HSA, Sinlung Hills Jt. Hqrs a thuoituhai Pu Henry L. Hmar, Pu VL Khawbung hai le mi dang dangin hma an mi lakpuia, ka chanpuolin sum dam an mi zawng peka, in elna ah ka hang thang ve a, 2nd runners up chu ka hang lak ve khiet kha tie. Pathien le mi lunginsietna ka changa, khawtlangin lawmin tap pumin an mi lo hmuoka, Pathien le hma mi lapuitu hai le CCPura kan nghatna hai Pu Puite hai sungkuo le mi lawmpuitu hai po po chungah lawmthu a tharin ka hril a nih. 2009 khan KTP huoihawtna in under 18 solo competition ah pakhatna ka lo lak ta bawk. Tuhin All Mizo Artiste Association ah a hmingin committee member ka ni ve ie.

VT: Music album/Music video iengzat am i siem ta a?

MG: Album (audio) chu mi hai thangpuina zarah pakhat "Ringna lawnga chuongin" ti Pu Laltlansang a hla hai ka lo tlangzar tah a. Music video ruok hi chu sengso a tam leiin kan neina'n a la tlin nawa ka la siem thei naw a nih ie. Nakie tieng Lalpa'n rem a tia, mi fel le mi tha a mi pek chun ei la siem rawi mawh. hehehe.

VT: Ieng hla hla'm i lo siem ta a?

MG: Mi hai angin hlasak thiem naw lang khawm music hi kan hnik ve reng renga, Pathien hla le hnam hla ka sak deu taka- chuonghai chu "Ringna lawnga chuongin" ti album bakah, Are are lanu, HSA hnam sukmawitu, Hnam mawina le Martyrs' hla hai an nih.

VT: Hlasaka rawngbawlna hi i nei hlak am?

MG: Mi han an mi ditsaka, Kohran khawmpui bakah sawrkar programme, students association hieng HSA, MZP, MSU, YMA le concert a hai an min saktir ve hlak hi tie. Hi baka hin Mizoram puotieng, Haflong, Manipur a hai hlasaka rawngbawlna ka nei ve hlak. Chun Uttar Pradesh ah ramthim a Chingroli a hai le hmun dang dangah Rawngbawltu zuiin hlasak rawngbawlna hai dam ka nei ve tah.

VT: Inchukna tieng?

MG: Inchukna chu mi hai angin hril ding iengkhawm ka nei nawa, KG - Class 7 chen Rimawi English High school, Khawlianah kan chuka, chun Class 8-10 chu Holy Child School, Aizawl ah kan chuka, kan umna Zemabawk le school umna Ramhlun North hi km 4/5 vel a na, bus fare ding ka nei naw chang, ke in ka lawn hlak. Chun kei ni fakzawngna tha nei naw hai ta ding chun Aizawl a khawsa chu a expensive em em a, Inrinni zat hin mi inah tuongnawt, puonsawp le belnawt damin ka tuition fee ding ka hlaw hlaka, chun ka nute (kei chun u ka tih) Nguri hai leh hmeithaiin kan khawsa a, Zemabawka hin lo nei an um hlaka, Inrinni zat kan zing/zan suong ding hlawin hlo thlo ah kan hlaw hlak. Class 8 hi distiction ah ka pass leiin kan teacher han pawl 10 ah an mi sawna, pawl 10 chu I Division in ka pass a, Mathematics le Mizo ah letter mark ka hmua, zana hai dam hmeruo le theitui hai zawrin hun kan hmang hlak leiin distiction chu ka phak ta nawh, sienkhawm Pathien le kan teacher hai chungah ka lawm takzet. Pawl 10 ka zo hnung hin mi in ah a rem rem thawa inchuk sunzawm dingin ka uma, pawl 11 a hin science ka laka, amiruokchu thlahni-thlathum vel chau ka um hnungin ka umnahai naupa hi thluok tieng harsatna a nei leiin a mi sukbuoi hlaka, ka umna ha'n ka sunghai in tieng kir nawk dinga an mi ti leiin Zemabawk Higher Secondary Schoolah principal hai lunginsietna ka changa, admission ka hmu ve nawk ta hrama, chuong chun pawl 11 chu thatakin ka zova, pawl 11 kan chuk tawp tieng hin medical nursing institution centre hnuoiah nurse inchuk theina an hawnga, nurse ni nuom reng ka ni leiin pawl 12 zo lo khawmin admission anthaw thei an tia, amiruokchu admission fee dingin Rs 10,000 a ngaia, chu chu ka pek thei nawa, vangneithlak takin free admission ka hmu ta hlau a, monthly fee Rs 2000 chu ka nu le pa in thei ang angin an mi tum pek a nih. Nurse kan chuk sung hin private in pawl 12 ka zo nawka, chu zova chun management course kan chuk nawka, tuhin IGNOU hnuoiah BA kan chuk meka, DAY-NLUM hnuoiah computer a thlawnin kan chuk bawk a nih.

VT: Hnama hin a chieng hle an ti chea, CYMA khawmpuia a khawm Hmar puon bi in hla a sak an ti che a?

MG: Ka piengpui hnam chu Hmar a na, Hmar a hin ka chieng em ema, chun milai inzapuina ding san ka hriet nawh. Ei ni ang anga ei inlanga ei identity ei inzapui naw hin mi'n an mi ngaisang lem hman hmanin ka hriet ie. Chun Zo nauhai po po unau ei nih ti hi ka pawm nghet tlat bawk. Nikum khan Central YMA inkhawmpuiah hlasak dingin chanvo an mi peka, ka hang sak kha tie, Hmar puon ka hang bi ngei.

VT: Hlasaka inlar hnung khan bazar a dam hmeruo i zawr hlak an tia andik a ni?

MG: Inlar lem chu kan lar nawh ie. Aw ka zawr hlak ngei, mani ngirhmunin a zir ngang naw chun tam le pasietin inzak a hriet nawh an tia, ka tuition fee ding dam, vawikhat sa man a lo dei le khawm tiin Mission veng bazar footpath ah hmeruo ka zawr hlak.

VT: Hmasak lai el khan Aizawl kawthlerah Hmar hla i sak thu an hrila, ieng huoisenaa sak che?

MG: Huoisen lem chu kan ti hran nawh ie, kan thuoituhaiin Sakawrdaia ei unau siettuokhai ta dingin charity concert ei nei ding a nih an mi ti peka, a hun an mil bawk leh ei hnam hla mawi tak el sakna hun remchang niin ka hrieta, chubakah thenkhatin Hmar hla ngei sak rawh tiin an min fui bawka, Hmar hla sak leiin mi hnawt zam naw awm tak ei nih ka tia, chubakah Mizoram puotienga ei unauhaiin hnam le tawng inzapui angin an mi dem hlaka, Mizorama Hmar umhai hin hnam le tawng kan inzapui naw zie, ei identity suklang ka nuom leiin hun remchang a nih ka tia, ka sak ta pawp el a nih. Hi hma hin thenkhat chun hall a hai le Hmar in function ei neina a hai chu Hmar hla kei ngei khawmin ka lo sak ta a, amiruokchu Aizawl khawpui kawthlera chu tukhawm a sak an la um ngai nawh an mi ti pek kha tie, a tak tak a ni dim.

VT: Anleh thildang dai, "tiem tlat e" a ti vat ta ding an ti chea, andik a ni?

MG: Hahaha, ka hril nuom dim a nih aw. Tak taka chu thup ding a um nawh, Lalpa'n ruolthatak a mi peka, Pathien le ka sunghai ti lova chu iengkima ka iengkim a nia, ka mentor a ni tawp el a nih. Amiruokchu hma tieng thil iengkhawm ei hril thei nawa, Pathienin rem a ti chun 'tiem tlat e' khawm la ti rawi naw mei nim.

VT: I hratna bulpui iem a na?

MG: Ka hratna bulpui chu Pathien, ka iengkima iengkim hi a nih.

VT: Virthli website/facebook group hi i lo kan hlak am?

MG: Ka lo visit hlak ngei, inthaw tha ka tia, hmun dang danga ei chanchinhai ei hriet theia tha ka ti takzet. Hienga a thlawna Hnam rawngbawlna tia, in buoipui hi, in sin buoi ding leh inpak thlak in ni takzet a nih. Lalpa'n thuoiin malsawmna'n vur mawl raw se cheu.

VT: Hun tha tak i mi peka kan lawm ie, Lalpa'n i hma thuoiin malsawmna'n hnawtzui raw se che.

MG: Kei khawm ka lawm takzet, in rawngbawlna hi a pawimaw em ema Lalpa'n damsawtna pe mawl raw se cheu.
Don't Miss
© all rights reserved
made with by Simon L Infimate