Responsive Ad Slot

HSA in Aizawl ah mobile charity concert buotsai, ralna sum Rs 1.87 lakh lut

Sunday, September 2, 2018

/ Posted by Simon Infimate
AIZAWL, September 02, 2018, Virthli (ONP): Hmar Students Association (HSA) chun September ni 1, 2018 khan bungthar kaiin Mizoramah Hmar nauhai chanchinah mellung pawimaw tak a ziek.

Aizawl khawpui khawthlerah Hmar nauha'n programme an buotsai a vawikhatna di'n Hmar Students' Association (HSA) Joint Headquarters 3- Aizawl, Kolasib le Sinlung  Hills Joint Headquarters huoihawtin Inrinni khan Aizawl veng hran hranah August ni 20, 2018 a Tuiruong a lawng chetsuolna a unau Sakawrdai mi 4 zet, hringna chanhai ṭhangpuina/ralna di'n "Mobile Charity Concert" buotsai a nia, Ralna sum Rs. 1.3 lakh lai  zet mipui anthawkin a luta, mimal le pawlin an hung thawlawm popo hai leh belkhawmin Ṭhangpuina/ralna hi Rs. 1,87,132 lai zet a lut a nih. Hi baka hin Zofood restaurant a bawm daw la lâk lo a uma, donation hi a la lut zing leiin Ṭhangpuina sum hi a la pung met beisei a nih.

Ruot lawk angin September ni 1, 2018 (Inrinni) khan Mission Veng (Thakthing bazar), Khatla kawn, Tennis court le Vaivakawn a hai Charity concert nei a nia, hlasakthiem mi 21 lai an inlanga, HSA volunteer mi 36 lai, a ṭhen hnamthuom a inthuom le Hmar muffler dam awrin nisa chartang hnuoiah ṭhangpuina bawm dawin siettuokhai ta di'n an tlawmngaina an inlang tir.

Sound hai iengkim remfel a ni hnungin dar 11 velin Thakthing bazarah programme ṭan a nia, Aizawl Joint headquarters a Assistant General Secretary ni lai mek Pu Samuel Zorama in hnetak la zei em emin a host a, concert neina san hai mawi le  thiem deuin a hung hrilfie a, mipui inzi nuoi nuoi haiin stage tieng an mit an inlen ṭan, hi lai zing hin HSA volunteer mi 36 zet chun umhmun an lo rem sau saua, hlasak ṭan chara chesuok dingin an  lo inpei at tah. Chu zovah Pastor Sangneikhuma, EFCI in hunser neiin Pathien kuomah ṭawngṭaina a neia mipui lungril a them ṭan.
Leh hlasak ṭan a ni ta,  Thawlehnaniropuia @ Puipuia (Mizo Idol-3, 2015) stage ah a hung ngirsuok, a rawlmawi tak le nal takin hla nal em em el a hung sak, mipui bazar kaihai in an ngaithla ṭhuop, dawr nghak hai puotieng an hung dâk, programme an fuk ṭan ni dinga an lang leiin HSA ṭhuoituhai an lawm. Hla inrîk ruol charin HSA mihuoisen hai an che ṭan, dawrtina lutin bawm an dawa, nupui lampuia hmeruo zawrhai ṭhangpuina an khawn, a ṭhenin lampuiah motor an lo inchana thei ang angin bawm an lo daw mek bawk, Rs,10, Rs, 20, Rs, 50, Rs100, Rs 500 a tla mur mur nghal, Hmar nauha'n Aizawl khawpuiah an la thawngai lo thil a ni leiin ṭhuoituhai anlawm, um hmunah thei ang angin an lo invir vat vat. HSA volunteer hai houisen zie le inpekna hmuin mitthli a tla naw thei nawh, a ropui a nih, ropuitak a nih.

Host in mi 2 -3 vel a ko zovin Marina V Varte a hung ngirsuok, tulaia hla inlar le mi dit em em "Thlawitelani",  thiem em em le zei em em in a hung sak, mipui in kut an ben, a ṭhen an lo lâm, bazar kaihai khawm ngirpum meuin hlasak an la ngaithlak, mipuiin bawmah an thei ang angin ṭhangpuina an thlak mek bawk, thawlawm petuhai  hei hmu chun a ṭhen lem chu nitin fakfawm zawng an nih ti  hriet ngawi ngawi, HSA ṭhuoituhai hnuk a ul, a va hang ropui de! Mizoramah Chanchin pawimaw ziek a ni der tah.

HSA volunteer han an sin chawl lovin an thaw zing. Mi 11 velin hla an sak tah, chuzovah Nk Margy Lalremruati (HSA Platinum Star hunt- 2nd runners up) in stage ah ro a hung rel, mipui hai, an thei ang anga bawmah ṭhangpuina thlak dingin a la hei ngen te te a, chuzovah "ei rengin a  hlathu umzie ei hrietnaw khawmin vawisuna bawm ei dawsan hriezing pumin Hmar hla- ' Are Are Lanu, hung sak ka ta, mipuiin ṭhahnem ngaitakin bawmah ṭhangpuina mi lo thlak pek dingin in tlawmngaina ka hung ngen cheu" tiin thuhma a hung nei, mipuiin kut an ben dur dur, dawra nunghak hai lawmin an lo inchawm, HSA ṭhuoitu ha'n lawmin awm an lo chum, a rawlmawi zetin "Are are Lanu, i hnam puon leh .... Hmar ei ni hi ei lawma ei varin ei tum an sang, Non-Hmar hai ei khûm ṭan mek....." tiin mipui a hei in awizet chu a ropui dap dap hle el. A turu a nih, turu tak a nih.

Hi hi Aizawl kawthlera Hmar hla sak phutna a nia, hi hma hin Aizawl khawpui kawtthlerah mipui hmaah Hmar hla sak tukhawm hriet an la ni nawh, HSA chun bungthar a kai, Hmar nauha'n Hma an sawn, chanchin ropui ziek a nih.

Hi thil hin hnam ṭhuoituhai a suklawma, Hmar ṭawng hmang ngam lova inkiltawi deua lo umhai khawm "kei khawm Hmar ka nih" tiin stage kawla hai an hung lam zak zak el nih.
Nk Margy hin vawihni lai Thakthing bazar le Vaivakawna hai, Are Are Lanu hi a saka mipui lawm a hlaw hle.

Hi chau hi a lan nawh, a tawpna tak Vaivakawnah HSA Aizawl Jt. President in lawmthu a hril zovin, Pu JC Hmar, EM, SHC in hun khar ṭawngṭaina a neia, Hmar ṭawng indak hlawkin a hmang, Hmar nauhai hin inferiority complex an nei naw zie, Mizoram mi le sa ngei an ni zie le ṭawng inzapuina an nei nawh ti an sukchieng ngei el.

Hi huna hin Hmar hlasak thiem Lalramchan Amo, Caroline Biakthansangi, Lalsiamthari, Esther Jessi, Marina V Varte, Fefeli Hmar, Margy Lalremruati, Thawlehnaniropuia ha'n an rawl mawitak takin mipui an in awi bakah Mizoram hlasak thiem R. Lallawmsanga @ Amama (1st runners up, Youth Icon, 2017), Kr Roberta, KC Hmingtea, Ronald Zothantluanga, Didika Chhakchhuak le C Lalremruata le mi dang dang ha'n mipui an in awi bawk a nih. Programme a hlawtling, hlawtling tak a nih.

Hi hun hi Hmar Inpui, Mizoram region ṭhuoitu, SHC hotuhai, MZP, MSU le HSA General headquarters ṭhuoituhan an ṭawiawm bawk a nih. (with input from Sinlung Hmathlir)

Don't Miss
© all rights reserved
made with by Simon L Infimate