Responsive Ad Slot

Ex-Minister Pu Ngursanglur chun term nâwk MLA a contest ding thu a puong

Saturday, September 29, 2018

/ Posted by Simon Infimate
CCpur, September 29, 2018, Virthli (ONP): Ex-Minister Pu Ngursanglur chun a chêngna in Lighthouse Lane-a a rawi hai le term nâwka hmalâk dân ding hriltlângna vawisun khan an nei. Hi huna hin Hmar biel le Vangai tienga inthawk mi sawm ruk bawr vêl an fe khawm.

Hun hmasataka Pu Lalhmingthang Varte'n hun keihruoiin Pu Ngursanglur chun mipui kokhâwm an nina san a hril a. Pu Nguranglur chun vawi hni tling naw thangtlawm leia ngir ding ni loin ram le hnam mipui hmakhuo ngaina leia ngir ding a ni lem thu, power nei le sum le puon hi a dittak a ni naw a. Mipui le ṭhang khawma ram le hnam siemṭhat hi a thiltum a ni lem thu a hril bawk.


Pu Sanglurin a hril peinaa chun ram chu a sie po le eini hi a tuortu ei nia. Khêl hril thei naw bîk ka ni nawh. Ram siem tum, thilṭha dit ka ni leia khêl hril lo ka ni lem. Vote capture le inṭhi ṭheina thaw ding eini nawh. Thilṭha kâwk hmu le inchûktir ding eini leiin a ṭha naw a'nthawka ṭan ei nuom naw a ni lem. Ni khat chu Pathien zarin hlawtlingna ei la chang ding a nih. Tu hi Pathienin ei ta dinga hun a la ruot naw leia tling naw ei la ni lem.

Titakna, indikna le hmangaina bovin ei ram tungding ngai naw mei nia. A rama sawrkarin hma a lâk leiin changkangna changtlung hung um el a ni nawh. A ram mipuihai titaknaa innghat a nih. Mipuiin sum le pai en lovin mi ringum le indik en lem raw hai seh. Pawisa sum leiin vote thlâk lovin indikna en lem ei tiu.

Term nâwk a tling ngei tuma Imphal phairuoma biek thei thei bie a tlân tlân a ni thu a hril a. Ka pa khan ka pu nei po po sengin mipui ta dingin a lo inrim vea. Keikhawm ka pa'n ka pu nei popo a seng angin ka pa nei popo ka seng ve a nih.

Tipaimukh mipui tam tak Mizorama an inpêm nasan ka hrietin ka lungril a naa, iengleia inpêm am an ni ei ti chun a biela a ram ênkawltu'n a thaw ding a thaw naw leia fâk le dawn zawng inhawi lemna rama inpêm an nih.

Pastor a mi ênkawltu hai hi mani sin thaw lovin nawchi lane a um vawng ta hai sienla mipui iem chang ei t'a? Chu ang bawk chun a biel ênkawltu indikna le ringumna tlasam chu iengleiin am ram chu tungding a t'a?

Mani chau insukhausa lovin mipui le ei rengin ei insukhausa lem ding a nih. Tipaimukh mipui chu mi ram hai angin motor khalin, an du du fain khawsa ve hai sienla ti chu ei thiltum a nia. A biela palai mawphurtu'n a thaw ding a thaw nuom naw leia ei ram hi pasie a nih. Indik taka bufai sem le MLA local area fund sem hi a ni ding hrim a nia. Chu chau chu ni lovin a nêka tam lem thaw tum ei nih.

Mani sin pawimaw hai tlânsana fe khâwm tuhai popo chunga lawmthu a hril a. Vawisun hi a tâwpna ni lovin a bul ei ṭanna chau a ni lem. Term nâwka ngir dinga hmalâk mêk ei nia. Inrenga in mi ditsakna ka lawm tak meu tiin Pu Ngursanglur chun mipui fe khawm hai chunga lawmthu a hril. (input: Daniel Lalsanhim) 
Don't Miss
© all rights reserved
made with by Simon L Infimate