Responsive Ad Slot

HMAR – KUKI (Ei nina ei pei thei nawh)

Wednesday, August 15, 2018

/ Published by Simon L Infimate
HMAR – KUKI (Ei nina ei pei thei nawh)

~ Thangsawihmang

Hmasawnna Thara ‘Hmar-Mizo’ ti ka târlang tah, tuhin ‘Hmar-Kuki’ ti thu ka târlang a nih. Ka thu ziek hin ṭhangtharhai lu a sukhâi deuh khawmin, a thu zuk tiem an ta, an lu inhâi bo nghâl a tih. Thu dâwn sei, chîk taka ngaituo hlak lem chu an Hallelui hiel ka ring bawk. Ei phuokfawm ni loin ziektuhai thuzieka inthawka ei hriet dân chun Kuki hming hung suok dân chu hieng ang hin hril a nih. Kuki chu Baluchistan thumal ‘Kuchi’ tia inthawka lâk a nih, a umzie ‘hnam mawl’ (nomadic) tina a nih. Chun, ‘Kuki’ ti chu eini inkona hminga ei put ni loin, puotieng mihai mi kona hminga ei put a ni lem. Sinlung suok, Manmasi thlahai hi ei umna hmun le a hun zir peiin hnam dangin hming tum tum, Mitz-Dzo dâm, Zo or Jo dâm, Chin mi dâm, Kuki dâmin an mi ko. Ei pi le puhai China rama an um lai chun ‘Mitz-Dzo’ (Mizo) oe ‘Zo/Jo’ ti dâmin an mi ko thu ei hriet. Burma ram an hung zuon chun nuhmeiin paikâwng an phur an hmu chun Burmese chun ‘Chins’ an tih a, thumal ‘Chin’ chu ‘paikâwngte’ (small basket) tina a nih. Chuleiin, pi le puhai umna tlânghai chu ‘Chin Hills’ ti a nih. Pi le puhai India ram an hung lût chun hnam dang, puotienga mihai chun ‘Kuki’ an ti nâwk pei a nih.




OLD KUKI LE NEW KUKI

Ei phuokfawm ni dêr loin sâp ziektuhai chun ‘Old Kuki’ le ‘New Kuki’ tiin an mi ko a. Assam rama Old Kuki le New Kuki an ko dân chu hieng ang hin ziek a nih. “Naga Hills le Manipur khêla chun Cachar sim tieng, Lushai-Kuki umna ram ei tlung a. Ei hriet dâna chun inhma laia inthawkin Manipur sim thlang tlângram, Cachar le Sylhlet saktieng tlângramhai chu hnam tam takin an hluo a, Bengali-hai chun anni chu ‘Kukis’ tiin an ko.” (Physical And Political Geography Of The Province Of Assam, published by MATERO Company p, 225). Assama Old Kuki le New Kuki chu hieng a hnuoia ziek angin ei hmu bawk.

“North Cachar-a um hnam tam tak chu mi dangin an hung hnawt leia hmun râlmuong nia an ngai leia um an nih. Simtieng tlângrama umhai khawm anni nêka hrât lem hnam dangin an that hlak leia um an nih. A hung inpêm hmasahai chu Kacharihai chun ‘Old Kuki’ an tih a, British rorêl hnunga hunghai ruok chu ‘New Kuki’ ti an nih….. Kuki sûngkuo laia British rorêl hlima chawkbuoitu tak chu Tlangams, Changsels, Thadois le Poitus an nih. Lushai ruok chu Pitus-haiin an hung hnawt lêng leiin kum 1840 hin Catachura tlângdungah an hung inlang chauh a nih.” (Physical And Political Geography Of The Province of Assam, published by MATERRO COMPANY p, 226).

Cachar, Assam-a Hmar hnam ṭhenkhat ‘Old Kuki’ tia an ko hai le Lusei khawm ‘Kuki’ tia an ko dân chu hieng ang hin ziek a nih. “Luseihai khawm Bengali-ha’n tlâng mi an kona ‘Kuki’ ti an ni ve a. Cachar-a Kuki le Naga Hills-a Kuki chu pawl hnih, ‘Old’ le ‘New Kuki’ ti an nih. Old Kuki-a chun Rangkhols le Bete le hnam kaupênghai an na, New Kuki ruok chu Jansens, Thadois le Shingshongs an nih. ‘Old’ le ‘New Kuki’ hming suok dân chu hieng hi a nih. Old Kuki-hai chu Lushai Hills-a inthawkin Thadois le Jansens chun an hung hnawt thlâk a, North Cachar Hills le Naga Hills District sim sak tieng an chêng a nih. Old Kuki-hai chu kum iemani zât hnunga chun Thadois le Jansens chun an hung zui a. A san chu Luseihai le an lalpa Lallula rawi chun Lushai Hills-a inthawkin an hung hnawt thlâk lei a nih. Lushai Hills District-a inthawkin Cachar District an tlung chun Thadois, Jansens le Lushai chu a lût hmasa Rangkhols le thlier hranna dingin ‘New Kuki’ ti an nih. New Kuki Cachar an lûtna chu kum 1840-1850 sûng hi a nih. Lushaihai chu an lalpa Lallula rawiin North Lushai Hills hluotu an hung nih.” (Gazetteer of The North Lushai Hills by A. W. Davis p, 3,4).

Manipur-a Old Kuki chu hieng Lt. Colonel J. Shakespear chun a hril. “Aimol, Anal, Chawte, Chiru, Kom, Kolhen, Lamgang, Purum, Tinkhup le Vaiphei. Anni hin tlângram phairuom le intawkna hmun an hluo a, kawng iengkimah inangna an nei a nih. Manipur Chronicle hril dânin Manipur-a lût hmasatak chu Chiru le Anal an nih, kum zabi sâwmparuk inṭan laia lût an nih. Aimol ruok chu kum 1723 hin Tiperaa inthawkin Manipur an lût.” (The Lushei Kuki Clans, p, 147). Chun, Naga ni lo, Manipur tlâng mi Old Kuki naw phawt chu New Kuki ti ding an nih.

Naga le Kuki chun Manipur tlângram po po chu an lo hluo a nih. Ruonglevaisuo biel, tuta Tipaimukh Sub Division ni ta khawm hi Hmar (Old Kuki) chun ei lo hluona kum za tam a ni tah. Eini hluo hma hin Hmar hnam Hrangkhol, Ranglong, Kaipeng, Bawm, Chiru, Kom, Anal le hnam dangin an lo hluo a. Lungthulien khaw kawla lungthu lien tak tak pathum khu Analhai thaw a nih. Parbung khaw hming khu Analhai phuok a nih. Ranglonghai chun Tuiruong suor sei deuh ‘Langsei’ ei ti khu ‘Ruongti samzîk’ an tih, a umzie chu ‘Tuiruong sam anga tlûn’ tina a nih. Hieng ang hin Naga le Sinlung suok, Manmasi thla, ‘Kukis’ tia koa umhai chun Manipur tlângram chu ei lo hluo vawng a nih. Chun, Hmar chu Kuki hnama khawm Kuki upa ‘Old Kuki’ ei lo ni leiin Thado ṭawnga ṭawng, Kuki bîka ei ngai hai nêkin Kuki hnam thua chu ei upa lem leiin ‘Hmar-Kuki’ ti thupuia hmangin ei ziek a nih.

HMINGA EI BUOINA

‘Hmar-Kuki’ thupuia hmanga thu ziek le hin a’n zawm pei leiin Sinlung suok, Manmasi thla, ‘Chin-Kuki-Mizo/Zo’ ti group hin ei rênga huopin hming thua ei buoi hi politics-a inthuruolna dinga ei harsatna niin ei hriet. Chu fiena ding chun Mizorama buoina hril hmasa phawt ei tih. Mizoram chuh hnampui, Mizo intihai hluo a nih. Amiruokchu, Lusei ṭawng chu a ram ṭawng, (official langnguage) a hung ni chun Lusei ṭawng, tuta ‘Mizo ṭawng,’ ti ni tah thiem naw chu Mizoa ngai nawna lungril a um a. Chu chu Mizo hnam ta dinga inthuruolna dangtu, hripui a hung nih. Chuong ang pei chun Y.M.A. (Young Mizo Association) chu Lusei ṭawnga ṭawnghai chauh taa ngaina a hung um a, hnam dang Lusei ṭawnga ṭawng naw chu a huop nawa ngaina a um bawk. Amiruokchu, Y.M.A. hnuoi chun Mizo hnam po po a huom a nih.

Manipur-a khawm tlâng mi, Naga naw phawt chu Kuki vawng ei nih. Chu chu puotieng mihai mi kona, ei lo nina indik tak chu a nih. Hun a hung fe pei chun Thado lalhai ṭawng, Thado ṭawng chu British sawrkar chun ‘Kuki ṭawng’ an hung tih a. Thado ṭawng thaw pâwl chun Kuki hnam kaupêng ṭawng danga ṭawng chu Kukia ngai nawna lungril an hung nei a. Chuong ang pei chun hnam dang Thado ṭawng thaw ve lo chu Kukia inngai nawna ei hung nei a nih. Thisena ruok chu Naga naw phawt chu Kuki vawng ei lo nih. Kukia khawm Hmar chu Kuki bul, Thado nêka Kuki hmasa ‘Old Kuki’ ti ei nih. Chuleiin, Kuki Students’ Union chun Thado speaking Student chauh ni loin hnam dang po po, Naga naw phawt chu a huom vawng ding a nih.

Mizoram-a Mizo hnam po po inpumkhatna Mizo Union ṭhuoitu hmasatak chu Hmar a ni thu ei hriet. Chu ang chun Manipur-a Naga naw, tlâng mi po po ṭhuoitu ding le a ṭantu ding chu Hmar bawk hi Pathienin a mi ruot ni ei ring. A san chu Hmar hnama hin an ṭawng thaw ve si lo, Thado inti thei, Paite inti thei, Vaiphei inti thei, Simte inti thei bawk ei kat nawk hi. Hi hi hnam dang le inunauna siem dinga Pathienin a mi ruot bîkna niin ei ring bawk. Zo-Land/Kuki-Land siem ding chun tlâng mi po po ei inthuruol a ṭûl a, ei rênga ei inkona hming ding chun ‘MANCHINKUZO’ ni raw seh. Hi hi Manipur-a Naga ni lo, tlâng mi po a huom vawng a nih. A umzie chu MAN chu Manmasi, CHIN chu Chin mi, KU chu Kuki, ZO chu Zo/Mizo; a huom vawng a nih. Hi hmingpui (common name/nomenclature) hi UPF/ KNO-in hmang nuom sien chu ei thil hni (demand) chu daihnai lo ang ning a tih; hla naw hleng a tih, ei hmu nghâl ring a um. Hi thu hi Hmar Inpui inkhâwm kum 2018 khan fiel ka ni leiin ka hril tah a. Sienkhawm, an mi ui-in-ek naw khawp el a, ka beidawngin ka sap ṭawng thiem naw leia inzak zing pumin ‘Chin-Kuki-Zo’ group po po unau ei ni zie lekhabu ‘MANCHINKUZO’ ti ka ziek nghe nghe a; ka sut ngam dim chuh.

~ http://www.virthli.in/2018/08/hmar-kuki-ei-nina-ei-pei-thei-nawh.html

Don't Miss
© all rights reserved
made with by Simon L Infimate