Haflong, July 10, 2018, Virthli (ONP): Zani zantieng dar 4:00PM khan Haflong Circuit House Conference Hall ah Indigenous People Forum (IPF) movement chungthu le inzawmin inbiekna nei a nih. Hi huna hin IPF huomsunga hnamtin an'thawk Inpui, Student Organization, Women Organization thuoitu le Village Chief hai ṭhahnem tawk tak an ṭhanga, chun Assam sawrkar tieng chu Dr. Himanta Biswas Sharma, Finance Minister, Shri. Sum Ronghang, Minister, HAD, Shri. Pallab Bhattacharya (IPS) DGP, Shri. Mriganka Barman BJP State General Secretary, NC Hills DC le SP hai an thang.
Hi huna hin Dr. Himanta Biswas Sharma Chair na hnuoia inbiekna hi nei a nih. Dr. Himanta Biswas Sharma chun N.C Hills District hi hnam pakhat hming sâl bika District hming Dima Hasao ti a thlak a um hi sawrkar in a lo thawsuol zie thu a hril a, hi le inzawm hin IPF Movement chungthu hi sawrkarin a ngai pawimaw zie thu hrilin, inbiekna vawitam tak lo nei tah haia hrillanga lo um ta angin tuta ṭum hin Assam sawrkar chun Dima Hasao District chu pahni a khawidar le hnam tin Development Council pek chu iengtik lai khawm an nuom zing thu an hril bawk a nih. Liem tah March 29, 2018 a Assam sawrkar leh Political Talk nei tum khan hi thu hi hrilin alo um tah a, chun N.C Hills Autonomous Council pahni a ṭhe ding ti thu ruok chu Central sawrkar subject liu liu a ni leiin, N.C Hills le Karbi Anglong District in Council pakhat an lo inṭawma a hnunga Central sawrkarin pahni in a hung ṭhe pêk ang khan IPF hai chun Central sawrkar kuoma Separate Council chu inla hni zawm zing thei a chuleiin Assam sawrkar in kan i pek thei cheu District hi la phawt el ro tiin an hril a nih. Dr. Himanta chun tuta ṭuma ka hung hi iengkim suk fel pui ding cheua hung ka ni a, chuleiin District or Development Council hi a ieng am indit lem hi lo inrawntlang in la 20th -25th July 2018 sung hin Chief Minister level a inbiekna Guwahati hmuna um a ta chu huna suk fel hman ngei dingin IPF Palai hai chu a hril.
Chun, Guwahati a meeting nei huna hin Council Constituency Delimitation, Community wise Development funds, Appointment le thil dang dang hai khawm hriltlangna nei sa dinga ti a nih. Chun hi huna hin baua hril el nilo in Cabinet in ziek nge in an pass ding thu an hril bawk.
Inbiekna nei zo in Dr. Himanta in Tv. David Keivom President, NCHISF le Shri. Debolal Gorlosa chu a hrana ko in inbiekpuina a neipui. Hi huna hin MSDP chungthu a Council level a lo inhnamhnuoi ta lo ding le lo suk buoi ta lo dingin CEM, NCHAC chu a hril bawk. Chun Sangbar Block dan lo taka Dehangi a Council in an lo sawn chu Dr. Himanta chun order an rang thei anga cancel dingin a hril pek bawk. Chun, CEM kuoma Chief Minister level a meeting nei hma ngeiin buoina dang dang le inhrietthiem nawna um hai chu ISF hai lo inbiekpui a a ṭul anga hma lo la a chingfel dingin a hril bawk. Hun sawt tak inbiektlangna an nei zo in Dr. Himanta hin inremna le inthuruol taka hma la tlang a ṭul thu a hril sa.
