Responsive Ad Slot

Sietnia ei intawiawm dan hi: A hun le hmun enin sukdanglam a tul tah naw maw?

Tuesday, June 12, 2018

/ Posted by Simon Infimate
~ Prof. Dr Lal Dena

Hnam dang dan ṭhahai la veng ei tah, An dan suol thik loin.-Lalkhum Keivom.

Ei hriet seng angin ei chengna khawtlang le khawvel hi digital age a ni tah a. Ei khawvel tak khawm ‘khawvel khuote’ (global village) ti hiel a ni tah. Thu inhriettawnna hmangruohai- internet, facebook, tv le satellite-hai leiin khawvela thiltlung po po ei hmabul ela tlung ang vawngin ei hmuh thei tah. Hi kakhawk lei hin khawtlanga ei thil ngaihluthai (social values) le chingdan hlui (traditional values)–hai hi hun inthlakthleng mila ennawn le sukdanglam a ṭulin an lang tah. Chu thlirna tukvera inthawk chun sietnia ei intawiawm dan le insawngbawlbawl dan ṭhenkhat chauh zuk sawrbing ei tiu.



1.Vuina programme hi biekina hmang ni ta sien: Ṭum khat Sap rama Mingohai mithi inthlanaa ka ṭhang a. Funeral Directorate (FD) mithiruong sawngbawltu bik haiin mithikuong (coffin) cheibawl le thlan cho iengkim an thaw vawng a, mipui an ṭhang ve nawh. FD official paliin mithikuong nal taka cheimawi chu pulpit hma taka an sie a. Ka ṭhang ve ni hi nipui lai a ni leiin FD staff mi palihai chun kekawrtluon dum le zakuo var banbul hakin necktie nal takin an suih seng a. Biekin sung inthlana thucha le rawngbawlna iengkim chu Pastor-in a thaw vawng a; conductor hran an um nawh. Bible reading ruok chu lusun sungkuohai laia mi pakhat ruot a nih. Biekina sunpuituhai po po hi thlana mithi vuinaah kan ṭhang nawh. Pastor, FD official le lusun sungkuo hnai zuol hai chauh an fe. Saphai thaw dan po po a ṭha vawng ei ti nawh a, entawn tlak chu tam tak a um. Ei in bawl dan le compound nei ṭhat dan an ang vawng nawh. A ṭhen compound ṭha tak tak nei ei um. A ṭhen nawk chu hmun intep le ṭenbarama um khawm ei um. Mi hausa in le mi pasie in an thlau bawk. Ei ram Kristien zaah za insalna ram a ni tah a. Khawsung mithi tu el khawm Kohrana inlawina nei naw ei um nawh. Chuleiin vuina/ ruong inthlana programme tak hi Sap mi var lem hai thaw angin, biekinah thaw ni ta sien. Chanchinbu le mobile-ah thangko ziek pha khawm mithi chu a Kohran inkhawmna zieksa nghal ni tah sien. Suntu dinghai khawmin biekin pan nal nal el inla, a va ṭha lem ta awm de. Khawpui, hieng Imphal le Delhi-ah hai lem chu a remchang zuol. Hnam dang karah, ei hnam thawdan ti lei ela, rem le rem lo inkhawh em ema hall heih zara thaw bung bung hi a remchang nawna chin
a tam. Tutu khawm biekina inthawkin heih inthla thei ta inla chu a va mawi awm de!

2. Ralna thilpek: Ralna thilpek, sum a ni chun dakipa mani hming, address le mobile number le ziek thlapin biekin khawtkhar bulah plastic bucket-ah thlak el ni sien. Chu chu, inthlana programme hmang zoa makpahaiin zieklobuah ṭha takin zieklut hai sien. Ei thuring chun, “Nang ruok chun thil I pekin, I kut changtiengin a thaw chu, I kut vawitiengin hre naw raw se; I thilpek chu a ruk a ni theina dingin; chuongchun, I Pa (Pathien) a ruka hmutu che chun thung a ti che” Mt.6:3-4) ti’n a mi hril. A ruka thilṭha thaw hi inchuk ei tiu. Ka thilpek hi Pathien le kar thu a ni leiin, ka hming khawm ziek nawng ka tih i ti khawm a, a ṭha hlei hlei. Thunglet beiseia thilpekin hlutna a nei nawh. Thunglet beisei naw inla khawm, thilṭha thaw hrim hrim chu damlai ni lala khawmin malsawmna hi khawtienga inthawkin amani a hung luonglut tho tho hlak.

3. Tuom puon: Ei hnam dana chu mithi chu pahnam inkungkeina dungzuiin a tuomtu ding bik an um hlak. Ka hrietsuol naw chun, mithi chu pasal a ni chun, farhaiin an tuom hlak. Tuom puon hi ei nei bik am?. Hi thua Mark Twin, Pu Zaneisang rawtna kha ṭha ka ti ngei. Ei thangsuopuon hi hmang pawlawt ta naw deuh inla. Tuom puona hmang ei nuom tal khawmin Hmar puon hmang a ṭha lem naw dim a nih? Ngaituo nawn a ṭul. Farnuhai naw lem chun, puona tuom nekin ei phal zat char sumin pe lem el inla, lusunhai phurrik nasa takin sawkzangkhai ngei a tih. Miṭha deuh an thi chun tuom puon (thangsuo puon) za chuong dam a ni hlak a; a dawngtuhai ta dingin lawm a um ruolin, zawr chi a ni si nawh; laina le ruolṭhahai kuoma a thlawna semdar a ni nawk hlak. Thil hlawk lem le hlawk naw hai hi ngaituo nawnin, thil hi thaw hlak inla nuom a um tah.

4. Thlana vuina: Thingtlanga le Tuiṭhaphai dungah chu mipuiin thlan hmuna vuina programme ei la hmang thei a, lawm a um. Khawpuiah ruok thilthaw harsa a ni tah. |um khat Imphala ka um lai hmeithai pakhat nau a thi a. Sunpuitu an tlawm. Vehicle hmu ding meuh a um nawh. Miṭha deuh an thi chun vehicle tiem seng lo deuh thaw, bus chen a thlawna hung petu an um. Sietni hin mi rethei le hausauhai inthlauzie an langfie zuol. Imphala unau Paitehai thaw dan ṭha ka tih. Imphalah chu mithi inah vuina le inthlana programme pastorin a hmang zo a; mithiruong chu tlangval tlawmngai haiin truck-a thakin an va’n zo fel vawng hlak. Hnam dang thaw dan ṭhahai lain, insiemṭhat pei tum ei tiu.

5.Thlan cho le khawsawt inlengpui: Thingtlangah le Tuiṭhaphai dunga thlan cho hi problem a la nih nawh. Amiruokchu, thlan cho le khawsawt inlengpui hi khawpui lienah chu problem tak tak a tling a. Chengna hmunhai kar a hla a, mitinin vehicle ei nei seng naw bawk. Hi kawnga khawm hin Imphalah unau Paitehai chun thlan cho ding inhlawfa an ruoi hlak. Khawpui lien metropolitan city-haiah khawm thlan cho chu thil thei lo ang tluk a nih tah. Amiruokchu Kristien ringtu cemetery neituhai an lo um pei a, biek thiem izirin thlan cho pumpel thei a ni tah. Vairama chu flat le quarter chite tea um ei ni tawl leiin, hlasaka lengkhawm bung bung khawm hi a rem nawna chin a um. Hlasak lengkhawm neka inhnem dan ṭha lem a um am? Ngaituo nawn a ṭha.

6. Inphum am, inraw? Eini lai chu hmun le hmang ei la hauh a, inphumna ding problem ei la nei nawh. Amiruokchu, ei hriet ding pakhat chu hnuoi hi an ṭhangin a pung thei nawh. Nakie kum 20 hnunga thlanmuol hi ei la hung indaih naw ding a nih. Saprama chu sungkuobing thlan an nei bik tah. A ṭhen chun electric cremation (electric hmanga inraw) an thlang lem. Hienga inraw hi kumzabi 19-na lai Italian daktawrhai hung rawtdawk a nih. Italian ram inpumkhatna suoltu Garibaldi kha inraw a thlang leiin, raw a nih. England-ah chu Sir Henry Thompson, Prof of Surgery, London University, chu Cremation Society indintu a nih. British Parliament khawmin kum 1902 khan danin a lo pawm tah. Kristien ringtu hmasa tam tak martara thi, anni ditthlangna ni loin raw hlumin an um a. A ṭhen chu an thina hmun le rawna hmun hriet thei ta lo tam tak a um. Iengkhawm nisien, hun danga: Kristienhai inraw hi a biblical am, a biblical naw? ti hi la hril lem ei tih. Ei Kohran ṭhuoitu le theologian-hai khawmin lo ngaituo ve hai sien. Ei hunin a la phak nawa chu, ei hmabaka thilum ngaituo lawk ṭul a nih.

Thutlipna: Hieng a chunga rawtna ei siemhai neka ṭha lem tam tak um a tih. Khawvel inthlak danglam dungzuia ei thilngaihluthai hi ennawn a ṭul tak zet. Ei hril tah angin digital age-a ṭawngkamsuok khawm “smart” ti a nih deuh vawng ta; “smart mobile”, “smart city” ti dam a nih tah hi tie!. Sietnia ei intawiawm dan khawm ‘smart’ lem, ṭha lema thaw dan um a tih. Khawvel hrat taka a tlan lai zing hin, mi hnung hnawta ṭhang pal ei tih ti inlau a um. (8th June, 2018).
Don't Miss
© all rights reserved
made with by Simon L Infimate