Responsive Ad Slot

HKI: Inthiemnawna le Pawi ti na thupuong

Thursday, June 7, 2018

/ by Simon Infimate
HMARRAM KOHRAN INZAWMKHÂWM

INTHIEMNAWNA LE PAWI TI NA THUPUONG
6-6-2018

Tarik 1/6/2018 (Zirtawpni), Parbung, Pherzawl District huom sûnga nuhmei pasal thila tharum hmanga ṭhuoilui le pawngsuol tlung hi Hmarram Kohran Inzawmkhâwm chun an thiem nawh a, a dem hle.

Ringnawtu le vairam khawpui sûnga tlung hlak anga ei hriet, ringnawtu laia tlung ding khawma ei ditlo em em, ei insûng ngeiah a hung tlung el tah hi Hmarram Kohran Inzawmkhâwm chun pawi a ti hle a.

Hieng ang suolna hin suksuoltu le tuortu ta dingin thilṭhalo ân tlun hlak. Tuortu ta dingin lungril le thlarauah hlîmna, sûngril inthûk takah inngaisietna, vântlâng laia thla ngamnawna le inkeitimna antlun thei a, suksuoltu ta dingin chungrikna le hmêlhuotna a tlung thei bawk.

Hieng suolna hi customary law hmanga inrêlbâwl chun, a thiltlung le thu um dân I zirin a ri dam zawnga sukmit thei a ni khiet rawi mawh. Amiruokchu, tuortu ta dingin natak a ni si leiin an hadam theinaw tlat chun ram rorêltu (sawrkar) kuomah intlun theina chanvo (right) ei nei tlat leiin sawrkar na hriet le case pêklut a hung ngai tah a. Sawrkarah case a lût tah pha chun inhêktuona a hung ni tah. Ringnawtu kuomah ringtu le ringtu ei inhêktuona a ni thei a. Chu pha chun hnam ta dinga muolphona, ei ringtu nina sukhmelhemtu, ei ringtu nina a hmelhem pha chun ei Pathien hming hrilsietna a hung ni thei bawk. Pathien hming hrilsietu hnam ei ni chun hmasawnna ni loin hnufuolna chau a hung ni lem ding a nih.

Chuleiin, hnam ta dinga muolpho theina le Pathien hming hrilsietna hieng ang nuhmei pasal thila thawluina le pawngsuolna thil hrim hrim chu hmarram sûnga intlungtir nawk ta ngai lo dingin Hmarram Kohran Inzawkhâwm chun mipui kuomah ngênna a siem.

Sd/- Secretary
HKI


Don't Miss
© all rights reserved
made with by Simon L Infimate