Responsive Ad Slot

FIFA WORLD CUP

Sunday, June 24, 2018

/ Published by VIRTHLI
~Jami Darngawn
Columnist, Virthli (ONP)


Kum 4 dana um pei FIFA World Cup hi ka pieng thla June thla a um hlak a ni lei khawm ni chuong lovin, ka tleirawl lai a'nthawk chun ka lo ngaihlu em em hlak a, khawvela ka pieng le pieng naw khawm mi hrie lo ding hai ka țan lei chun țhang ka lo lak nasa thei em em a nih.

TV khawm nei zo naw inlakhawm ka ruolhai le chun mi in ah kan en ve hlak a. Ka nunghak lai vawikhat chu kan țan ha'n zan sawt hnunga an pet ding lei khan ka ruolhai leh țhahnemngai takin kan nghak ve a, chulaizing a chun tlangval pakhat khawm chun a lo en nuom ve ni ding an'a, amiruokchu zingkar leilet kei ding ani leiin zan sawt kha a meng thei naw ding lei chun pawi a ti hle el a, hieng hin hla'n a'n zawt el a nih. "Leilet nei hi a harsa taluo, en nuom sie, en thei lo, zingkar leilet kei ding leiin" tiin thiem takin hla'n a siema a hun lai khan chu tlangval kha hlasak thiem ve a ni leiin World Cup hla a siem khawm kha mi'n an ngai nuom hlak leiin mipui puipun nikhuo haiah a sak ve hlak a, an lar pha hle a nih. (Tulai World Cup entu-hai hi zingkar lo kei ding leia TV en naw pha ei um ring a um bek ta naw a nih.)


Chuongchun, ka nupui hnung chen khawmin World Cup hi ka la'n hnik zing tho a, ka țan hai an hrat naw hin chu ka zawi tawp hlak a, chu bakah kei hi chu ka buoithlakna chu a hrat naw hai hai hi ka lo lunginsiet nawk peia sawl a um thei hle hlak a nih.

Tukum 2018 World Cup hi ka kum 41-na leh a lo inruol a iem ani kawng taka chu hlimum ka ti ve a, ka en ngai naw a chu ka lungril takin ka lo hlim ve a nih.

Ka pasal le ka naupa a naupang lem chun zan tin deu thaw'n an en hlak a, enpuitu dingin an mi dit leiin an kuomah ka um ve zei a chu ka'n hnik nuom ta naw a nih. Ka naupa chun "Nunu, nangin Messi țan la, keiin Ronaldo ka țan a nih" a ti ve bawk a nih. (He he...)

A hun lai khan ka țan hai an hratnaw chun ka zawi tawp hlak a, bufak tui dawn khawm ka pei naw pha hiel hlak (ka natpui ti inla indik tak a tih). Amiruokchu, ka țan hai an hrat pha ruok chun ka hlim em em hlak a nih. Kei hi a reng reng thu ah ka mi angnawna tak chu ka thawna tieng tieng hi thaw tûn tûn hlak ka ni leiin World Cup en leia lungril ngaituona popo seng kha ka pei ta naw leiin tu kum World Cup chu ka en nawh ti thei a la nih. Chun, World Cup lut thei chin hai hi chu mi mei mei chu an ninaw reng a, en an phu hlie hlie bawk a nih. Kum tam taluo lo, tlawm taluo lo, thau taluo lo, cher taluo lo, an hmel hai țha bek naw hai sienkhawm an thahratna le an inpekzona hai khan en nuom an um hrim hrim niin ka hriet a, ngaisang khawm an um tawl hle ka tih.

Awleh, World Cup en tuha'n țhang ei lak nasa em em ang bawk hin nang le kei Lalpa Pathien Nau/Ringtu-hai khawm hi nitin suol Setan leh ei inbeina/indona a hin Vana inthawka mi entu/thlirtu hai hin lungril le titak zetin an mi en/țan hlak a nih ti chu ei hung suklang ve a nih.

Hebrai 12:
1. Chuleiin eini khawm, thlîrtuhai, sûmpui nasatak anga tamin an mîn huolvêl leiin, a mi sukrik thei taphawt le suol mi man el thei chu siekiengin, ei hmaa intlânsiekna uma hin seltakin tlân ei tiu,
2. Isu ei ringna siemtu le sukfamkimtu tieng chu en zingin, ama chun a hmaa hlimna um lei chun muolphona chu ngainêpin, kros chu a tuor a, Pathien lalțhungpha changtieng khin a hang țhung ta a.

Ani ngei el, Lal lsu Krista zar chun nang le kei khawm Pathien ta ding chun mawi tak le en nuomum tak ei nih a, World Cup ball pet thei chin hai ei en nuom ang neka nasa lemin Pa Pathien le Mi Thienghlimhai le Vantirkohai tading chun en nghawk um lo ei nih. Chuong ani lei chun nitin ei Rawngbawlna/kalchawina tinreng a hin ei fimkhur a va ngai de! Kei ve bawk khawm hi nitin hin suol Setan leh ka'n inbei hlak a, a chang chun suol hin a mi hne ve hlak a nih. Hne a ka um ti ka hriet charin Vana inthawka mi thlirtuhai lungril nat ding ka ngaituo'n ka tlusawng ngam ngai naw a nih. Chuongchun harsa hle sienkhawm Lal lsu'n ka ta dinga a lo tuorna chu ngaituo zing pumin Lalpa Pathien hratna ringsanin ka tho fan fan/hram hram hlak a nih.

Halleluiah Lalpa ropui raw seh.

TIEMTU DITUM TAK NANG LE KEI KHAWM WORLD CUP NEKA ROPUI LEM DAWNG DING EI NEI A NIH...
Don't Miss
© all rights reserved
made with by Simon L Infimate