Responsive Ad Slot

Sinlung Hills Council le inzawma HPC -D Thusuok

Tuesday, April 3, 2018

/ Posted by Simon L Infimate
PRESS RELEASE
3rd April, 2018


A hmasa’n hi chen mi thuoitu ei pa Pathien kuomah ropuina le chawimawina chu um vawng raw seh.

August 2016 laia inthawka tan thar nawk, Mizoram sawrkar le Hmar People’s Convention (Democratic) palaihai inbiekna chu official taka vel 6 le unofficial-a vel tam an inbieka dawkan an kil hnungin April 2, 2018 (Monday) khan Inremna Thuthlung (Memorandum of Settlement) ziek theia a hung um el tah leiin HPC(D) chu a lawm zet a. Hi chen mi thuoi tlungtu ei pa Pathien le kawng iengkima kan kaiza mi vengpuia, tha le zung, sum le pai le thil danga mi thangpuitu Hmar mipuihai khelah taksa le thlaraua mi keihruoia kan hnung thuoltu, Kohran nu le pahai chungah lawmthu kan hril.

Mizorama Hmar hminga political movement ei neina hi thang khat (one generation) a liemtah a, ei nawrsuok le hmu ruok chu hril khawp a la tling naw hle. Hringna hlu, tha le zung le sum le pai ei sengralhai ngaituo lem chun tuta Inremnaa ei hmu, ‘Sinlung Hills Council’ khawm hi ‘a nep taluo’ ti ngaidan nei ei um khawm ringhla a um nawh. Sienkhawm, politics a hin mipui zaah za lunginruolna le hlawtlingna hi thil um ngailo a ni ti hrie zing pumin tuta ei hmu le chang hi kalbi/kailawn pakhat anga ngaiin hmang le sawr tangkai chu ei thaw ding hmasa chu ni ngei a tih. Tuta Inremna Thuthlung ei ziekin a rasuok hmasa dinghai, zieka sie chie lo chu hun sawtnawteah Mizoram State Assembly-ah Sinlung Hills Council Bill 2018 putlut ning a ta; Chu Bill chu passed a ni zoah ‘Rules’ siem nghal ni bawk a tih. A ni ding ang taka Council a um hmaa hun lailawka lo enkaitu dingin Interim Council um a ta; chu chu thla 6 (six months) sung ning a tih. Hi Interim Council mawphurna pawimaw tak ding chu SHC Rules siemnaa sawrkar thangpui, Council Area le delimitation buoipui le Council Bye-Law siem ni tak a tih. Thla 6 hnung ah hin Council Member ding inthlang thei ngei beisei a nih.

HPC(D) le Mizoram sawrkarin Inremna Thuthlung (MoS) an ziek tah leiin ‘HPC(D) hi um talo le thaibo’ ding anga ngai pawl lo um pal thei ei ni leiin chuong ding chu a ni naw thu hi hi ei hrilna ni nghal raw se. India Hmarsaka Hmarhai hi ‘Administrative Unit’ pakhat hnuoia um ei nuom thu India Prime Minister bul ngeiah 1950s lai dei khan ei lo intlun taa chu thil namai a ni naw zie a taka hmu le hrietu seng ei nih. HPC (D) movement hi a tir chun Mizorama bik ni sienkhawm, hun a hung inher liem peia Manipur le Assam a hai state ramri dungzuia thehran met met a hung ni tung pei a nih. Manipur-ah chun United People’s Front (UPF) hnuoia central le state sawrkar hrietpuiin Suspension of Operation (SoO) neiin political level talks ei nei mek. Chuong ang bawk chun, Assam a khawm sawrkar le inkapchawl puongin NC Hills (Dima Hasao) le Cachar phairuoma Hmarhaiin politiks thila inhumhalna le insawrkarna mumal tak ei nei theina dingin sawrkar le ei indawr mek a nih.

Chuleiin, Hmar Movement HPC(D) in a changchawi hi a la tawp el naw a nih, ti mipui hriet dingin kan hung puong nawn nawk nisien, Mizoram Chapter ah ei vawikhat inzo nisien khawm, Assam le Manipur Chapter ah hmabak inkho deu ei la nei hi General Headquarter chun tawp lovin a enkai zing anih.

Hmar hnam dam zing raw seh!


Sd/-

(JOHN F HMAR)
Secretary , Info. & Pub.
HPC(D), Headquarter: Sinlung


Don't Miss
© all rights reserved
made with by Simon L Infimate