Responsive Ad Slot

Interim council siem hun ding la chieng lo, May thla ah special assembly ko beisei

Monday, April 30, 2018

/ by VIRTHLI HMAR
Hmingchungnunga in May thla top ah office suoksan ding
(An exclusive report)

Aizawl, April 30, 2018 (Virthli ONP): Mizoram sawrkar le Hmar People's Convention (Democratic) haiin April ni 2, 2018 a inremna thutlung an ziek dungzuia thlaruk sung interim council siem ding ti chu tuchen hin pei fel a la ni naw thu le siem hun ding tak hriet a la ni naw thu, HPC (D) thuoituhai chun an hril.

HPC (D) thuoitu pahni Pu Lalropui Famhoite, Army Chief le working Chairman Pu Lalthanglien @ LT Hmar le inbiekna a HPC(D) spokesperson lo ni tah Pu Lalthalien hai chun Pathienni khan Aizawl hung chuongkaiin vawituk khan political level talks a sawrkar palaihai lo inrawitu Pu Lalrinmawia Ralte, political adviser to the chief minister le MLA ni bawk chu a chengna in ah inhmupuiin interim council siem dan ding le Sinlung Hills Council (SHC) Bill pass a ni vat thei dan ding an hrilpui niin, Pu Lalthalien chun Virthli pailai a hril.



Chanchinbumi thenkhat le an inpawlna ah Pu Lalthalien chun SHC Bill an rang thei anga pass a enactment siem vat chu interim council siem ding neka an ngai pawimaw hmasa a ni thu hrilin, sawrkar le HPC (D) hai khawm, mipui ringzo an kai theina dingin ringum takin hma an lak thu a hril.

Sawrkar chun an rang thei anga interim council siem a nuoma, May thla tir hin one day special assembly session ko an in beisei thu Pu Lalrinmawia chun HPC (D) thuoituhai hi a lo hril niin, Pu Lalthalien chun a hrila. HPC (D) thuoituhai hin Home Minister Pu R. Lalzirliana inhmupui an tum bakah a tul chun Chief Minister Pu Lal Thanhawla khawm hmu an tum thu a hril bawk.

Pu Lalthalien chun sawrkarin theitawpin a ngaisak thu le an ngenna khawm nu le pa chan changa a suk puitling vat a beisei thu a hrila, interim council siemna dinga file fe mek chu a fe nawna ding General Adminstration Department (GAD) ah a lo fe leia hun a lak met thu a hril.

A dan taka chun thil iengkim chu GAD hnuoia um ding a ni lai zingin council siem vat a nia, SHC Bill pass vat a ni theina ding le hmalakna a hrat theina dingin Home department chu nodal department a thang a ni thu Pu Lalthalien chun a hrila, May thlatir hin special assembly session ko in SHC Bill khawm pass a ni ngei a beisei thu a hril.

Virthli pailai indawnna dawnin Pu Lalthalien chun interim council sunga council member dinghai le Chief Executive Member (CEM) baka chairman dinghai khawm sawrkar kuomah iengkhawm proposal an la peklut naw thu le hi chungchanga hin ngaituona an hmang mek thu a hrila, ngaituona fimtak puta hmalak pei an tum thu a hril.

SHC Bill bikah Mizoram sawrkar le HPC(D) palaihai in official level talks vawi-4na, April, 2017 a an nei tum khan a thuphunga an lo pawm ta thu le tuhin Law department in an enfie mek thu a hril.

SHC area chungchangah chanchinbumihai indawnna dawnin PU Lalthalien chun area hi chiengtaka hrilfie (specify) la ninaw sien khawm, SHDC in a huom chin chu pawm phawt a ni thu a hrila, council thataka siem (function) a ni hunah council area in a huom phak naw khuohai abiktakin boundary kawl or puotienga um hai chu council sunga rinlut an nuom phawt chun sawrkarah hnina siemin rinlut dinga sawrkar leh inremna an siem thu a hrila, hi lai zing hin council huomsung laili (core area) a umhai chu an nuom, nuom naw thu ni lovin Council area sungah an um reng reng ding thu a hril bawk.

Rehabilitation chungchang bikah Pu Lalthalien chun HPC(D) cadre hai chu Rs 3 lakh seng hmu dinga sawrkarin a lekhain (written form) a pek thu le arms laying down ceremony lai khan a sumfai in Rs. 20,000 seng pek an ni thu a hrila, rehabilitation package chu kimtaka insung an lut pui seng theina dinga ruohmangna sawrkarin a siem lem thu a hril. Hi baka hin HPC(D) cadre hai hin sawrkarah 5 % job (seat) reservation an neia, a qualify an um chun police, home guards, IV grade le thildanga a hai sawrkarin recruitment a boutsai pha leh an lut thei ding thu a hril bawk.

Hi lai zing hin SHDC chairman Pu Hmingchungnunga chun May thla tawp hin office a suok san ta ding thu hrilin, ama ruol hin council member 17, (nominated member 3 thangsa in) hai khawm an chawl ta ding thu a hril.

Virthli palai, The Telegraph, The Mizoram Post le Newsmai News Netwrok palai ni bawk leh an hohlimna ah PU Hmingchungnunga chun Mizoram sawrkar le HPC(D) inkara inremna um thei ta chu lawmum a ti thu a hrila, sawrkar khawmin a thei chinah accord chu suk puitling ngei sien a nuom thu le SHC Act pass a enactment siem vat dingin a nuom pui thu a hril.

A hril peina ah Pu Hmingchunghung chun, HPC(D) le Sawrkar inremna a 1994 peace accord hluolan (supercede) a ni chu pawi a ti ruolin, nuom pawnga sawisela, hmalakna suk thuonawp zawnga chet chu tha a ti naw thu le a lungril a ni naw thu a hrila, hnam anga Hmar nauhai hma an sawnna dingin boruok thatak (congenial environment) siema, theina zawn zawna intawiawm ding le inthuruol taka hma lak tlang a tul thu a hril.

Thenkhatin 1994 peace accord supercede chungchangah court ah khing ding anga an hril chu thubelchieng dawllo a ni thu hrilin, Pu Hming chun inringzo tawnna leh thataka SHC a function chu a nuom tak a ni thu a hrila, SHDC chairman a ni sunga an hmalakna hai po po chu SHC ta dinga hma an lo lakna ang niin lawm takin council thar ta dingin an hlan thu a hril.

Hmar nauhai inthuruol an pawimaw takzet thu hrilin, Pu Hming chun "tuhi indema, inkhik-in-khalna hun an ta nawa, kha chapter kha ei close a ngai ta a, inthuruol le inpawtlang taka Hnam ta dinga kal ei pen a tul ta takzet a nih, ti'n a hril.

SHC interim council le SHC Bill pass ni vat theina dingin Chief Minister le Home Minister hai bakah sawrkar thuneitu danghai khawm a lo inhmupui thu a hril bawk a nih.


SHDC council hi April ni 27, 1997 khan indin a nia, chairman hmasatak chu Pu Lalrosiem niin Pu Lalmalsawma Darngawn le Pu Hmingchungnunga haiin chairman nina hi an chel insawka, tuhin Pu Hmingchungnunga hin term thumna a hmang mek a nih.
Don't Miss
© all rights reserved
made with by Simon L Infimate