Responsive Ad Slot

HPC (D) home coming le arm laying ceremony ropuitaka hmang a nih

Friday, April 13, 2018

/ Posted by VIRTHLI HMAR
Aizawl/Sesawng, 13 April, 2018 (Virthli, ONP): Ruotlawk angin Hmar People's Convention (Democratic) pasaltha ha'n nundan pangai an hraw theina dinga home coming le arms laying ceremony chu vawisun khan Central Training Institute (CTI), Mizoram Home Guards Headquarters, Sesawng ah ropui taka hmang a nia, hi hun hi Mizoram chief minister Pu Lal Thanhawla in a hmangpui.

Home coming ceremony hi hnam sipaihai in parade neiin bul tan a nia, Hmar national salute in entirin sawrkar mipawimawhai, hnam thuoituhai le mipui fekhawmhai inzana an in entir.

Arms laying down ceremony a hin hnam pasaltha (cadre) mi 102 le council member 12 hai chun sawrkar kuomah silai intungna an neia, silai thatak tak 44 le silaimu 2892 baka magazine 48 le radio set 5 lai Mizoram Home Minister Pu R. Lalzirliana kutah an inhlan.

Pasalthahai hin silai thatak tak hieng Sniper rifle -4, AK assault rifles-9, M16 carbine assault rifles- 1, double barreled guns- 13, M79 grenade launcher-1, 9mm pistol-3, heckler & koch series assault rifles- 6 le a dang dang Mizoram sawrkar kuomah an inhlan a nih.
Hi huna hin home minister Pu R. Lalzirliana chun HPC(D) working chairman Pu Lalthanglien @ LT Hmar a kuomah Rs 3.42 crore rehabilitation package an hlana, HPC (D) cadres inpe hai chun Rs 3 lakh seng an dawng ding a nih. Hi baka hin ralthuom man Rs 7 lakh pek an ni bawk a nih.

Hi huna thuhriltu Pu Lal Thanhawla chun HPC(D) ha'n inremna zawnga ralthuom an intung thei ta chu lawmum a ti thu hrilin, HPC (D) pasalthahai chu neitu lungril puta, Mizoram hmasawnna dinga hma lapui dingin a ngen.

A hril peina ah Pu Hawla chun HPC(D) movement leiin Hmar mipuiin namen lovin harsatna an tuoka, tu ruok hin chu inremna le muongna a um thei ta ding a ni leiin lawmum a ti thu a hrila, Mizoram sawrkar chun theitawpin Hmar mipui hai hmakhuo a ngaisak ding thu a hril bawk.
Inremna le muongna um theina dinga hmalatuhai popo kuomah lawmthu a hrilin Sawrkar khawm a lawma, HPC(D) hai khawm an lawm takzet a nih a tih.

Pu. R. Lalzirliana chun HPC (D) pasaltha ha'n nundan pangai hraw dinga silai an intung tah chu lawmum a ti thu hrilin, kum 1994 khan Sesawng a bawk hin silai lo intung a ni ta a, amiruokchu kha hun lai khan silai thawnaw vawng intung a nih a tia.
HPC(D) pasaltha ha'n ralthuom thatak tak an hung intung nuomna chun inremna le muongna intlun an nuom takzet thu an entir bakah Mizoram ta dingin hmasawnna intlun an nuom ngei a nih ti a sukchieng a nih a tih.
Hilai zing hin Pu Zira chun Pu Lalhmingthang Sanate pawl tuta ramhnuoia la umzing hai chun buoina an siem sunzawm chun mipuiah harsatna an tlun ding bakah Sawrkar chun unau ei nih tiin zai a daw bik naw ding thu a hril.

Home coming ceremony huna hin HPC (D) working chairman Pu LT Hmar le Tipaimuk assembly constituency MLA Pu Chaltonlien Amo hai khawmin thu an hrila, Pu Chalton chun Mizoram le Hmar mipuihai ta dinga ni pawimaw le inchikthlak tak a ni thu a hril.

A hril peinah Pu Chalton chun, Mizoram chu Zo hnathlakhai popo in mani ram ang sengin an en thu le thlamuongum a ti thu a hrila, Hmar mipui khawma hma an sawnna dingin Mizoram sawrkar an tawiawm a pawimaw thu a hril bawk a nih.

HPC(D) Deputy Commander-in-Chief (C-in-C) Pu Lalbiaknunga in Virthli palai a hril danin nundan pangai hraw dinga hienga an hung suok ta chu lawmum a ti thu hrilia, an sung le kuohai hmukar an nghakhla ta thu a hril. Zing 14 April khin HPC (D) pasalthahai chun Sakawrdai pan an ta, chu taka inthawk chun mani inseng an pan ta ding thu a hril bawk.

Home coming ceremony a hin sawrkar mipawimaw, hnam thuoitu le mipui thahnemtak an thanga, zantieng programme hmang zovin inremna ruoi ropuitak the a ni bawk. Hi huna hin sawrkar mipawimawhai kuomah hnam thuoituha'n thangsuopuon an inhlan a nih.

Don't Miss
© all rights reserved
made with by Simon L Infimate