Responsive Ad Slot

NO. 4 & MOBILE PHONE

Sunday, February 25, 2018

/ Published by VIRTHLI
~ Jami Darngawn
Columnist, Virthli (ONP)

Kum 8 vel liem tah a khan ka ruolnu pasal chu natna inrik takin a hung na el ta a, doctor hai chun damsuok zo ta lo dinga an hril lei chun Hospital a'nthawk chun an in tieng inenkawl dingin an um tah a. Ka ruolnu chun a pasal chu țawngțaina nei pek dingin a mi ngen lei chun kei khawm nikhat chu ka va fe thei hram tah a, ka ruolnu pasal ka hang hmu chun lunginsiet a um em em a nih.

A natna chu ana em leiin patling zet chu an rum hlut hlut el a, a mi hmu char chun mi ngai em emin ka hmingin a mi ko a, "lunginsiet takin ka natna hi ana em leiin ka damna ding mi ngaituo pek raw aw?" A tia, a hmel ka en chun ka lunginsiet em ema thaw ngaina ka hriet sie nawh, a nuhmei/ka ruolnu kuoma chun "iengtin am a natna a hung suok pha in thaw hlak ?" Ka ti leh, ka ruolnu chun "nat sawkna kan pek hlak" a ti a, chuongchun nat sawkna man ding chu pawisa ka pek ta a, naupang hai chun damdawi chu an va laka an pek ta ngeia chu taka chun hadam takin a in thei tah a nih.

(Nat sawkna dinga an va lak chu a mîn an hril No. 4 ei ti hai kha a lo nih)


Damnaw in kar chun țawngțaina kan nei nei ta lem a, chun in tieng ka kir motor ka khal malam chun lampuia ramtin ka ngaituo tah a, lamsak lam thlang khawm chu uksak lek lo chun ka lungrila hieng hin ka țawngțai mawl mawl tah a "Lalpa, vawisuna ka pawisa hmangna chu ka lung ava awinaw ngei de, No. 4 man in ka pawisa ka hmang el ana, mi hrethiem raw aw?" Ka hang ti te te a, chu taka chun ka lungrila chieng em em chun " l pawisa chu a hmangna ding taka i hmang a nih" ti a mi hriltu um angin ka uma kan thuok huoi el a nih.

Ani ngei an hril dan chun No. 4 ei ti hi a siemtu hai chun natsawtna țhatak dinga an siem reng ana, a hmangna ding taka hmang chun thil țha tak a ni reng a nih. Cancer a na hai a țhen chu, an thi ding tawm hin na an ti taluoa en zo an ni ngai naw leiin No. 4 in an jection hlak reng kha alo nih.

Amiruokchu mi tam takin a hmangdan indiklo taka an hmang leiin sietna rapthlaktak ei tuok mek a nih ti chu ei hriet seng ka ring !

Chuongang bawk chun tulai mi tam takin ei sawr em em le ei sietpui mek mobile phone hi iengtin am ei hmang hlak aw?
Mobile phone khawm hi a hmangdan indik taka hmang chun thil țangkai le awlsam taka sin thaw theina a nih. Amiruokchu ei hmang suol vei vei chun thil pawi taluo ding a ni nawk a nih.

Kei khawm ka taptebul a'nthawkin khawvel ka thlirna tukver țhatak pakhat chu tuta ka chawi mek ka mobile phone hi a nih, thei tawp chun hmang țhangkai chu ka tum ve bawk hlak, Lalpa zarin hmang khawm ka hmang țangkai ve niin kan hriet bawk.

Amiruokchu hmelmapa Setan hin a lo sawr țangkai tum ve nasa taluoa, kiltin kiltang a'nthawkin țhang a lo lak ve hlaka ei fimkhur naw chun taksa le thlarau ta ding chen khawma sietna rapthlak tak an tlun thei zing a nih.

Thil reng reng hi a țha nekin a țha naw hi inkai/copy a awl em ema, chuleichun thil țha naw thawna'n ei lo hmang khawm alo ni chun, Lalpa kuoma ngaidam inhnia thilțha thawna'n hmang sau sau tawl inla ti chu ei hriet tasa nisien khawm ei hung hril thar a nih.

Kum 3 vel liem tah a khan lnternet khawvela kei khawm ka hung lut ve chau ana, ka hung lut hlim chun mi khawhlo tak tak hmu ding an uma, Setan group chen siem in a um a ni kha, khanglai khan kei khawm lnternet khawvela um chu harsa ka ti leiin suok dawk nawk el ka tum lai chun, Lalpa rawl ka hrieta Lalpa chun "Hi lai hmuna khawm hin ka Chanchin Țha suk lang ro" tia a mi biek lei chun tlin le tlin lovin, harsatna tamtak pal tlangin Lalpa hratna ringsanin țhang ka lo lak ve a nih.

A chang chun hmelmapa'n bomb in a mi deng hlaka NA ka ti chang a um ve hlak. Amiruokchu Lalpa ei Pathien chun damdawi țha chi a mi pek hlaka Lalpa zarin ka dam nawk el hlak a nih.

Awleh, a lo sei taluo leiin suktawp el ei tih.

EI THIL NEI AH LALPA CHAWIMAWI EI TIU KHAI.
Don't Miss
© all rights reserved
made with by Simon L Infimate