Parbung, Jan.22, 2018, Virthli (ONP): Saidan ICI Kristien Thalai Pawl members mi 32 hai chun January 12-22, 2018 sung khan Hmarbiela khuo tum tum- Pherzawl, Tinsung, Damdiei, Taithu, Parbung, Sinlung le Senvawn hai kanin Pathien thu le hla ah rawngbawlna an nei. Hi Tour an nei sung hin Upa Robert Zote, Tv. Solomon L. Songate, Chanchinmawi Joute le Tv. Mathew Lalramlien han Pathien thu hrilna an nei a, Tv. Solomon L. Songate in Israel ram tin zawnin tulai khawvel boruok inlumlet dan hai projector hmangin ‘slight presentation’ hun a hmang hlak bawk. Tour an nei sung hin Saidan ICI KTP hai anthawk group song le hlapawl hai ngaithlak a ni a. Soloist- Nk. Grace Ramhlukim (winner- ICI KTP Tuithaphai Presbytery 2016 Solo Competition) le Nk. Rebecca Lalengmawi (2nd Runner Up- ICI KTP Tuithaphai Presbytery 2017 Solo competition) han Pathien inpakna hla sakna an nei hlak. Hi Tour an nei huna hin Parbunga NPT Prayer Mountain kanin tawngtai ruolna an hang nei a,Pathien thu le hla a rawngbawlna an nei bakah Hmarbiela Hnam Rolung inchikthlak tak tak hai le hmun pawimaw zuolhai kanna an nei tawl. Saidan ICI KTP chun January 23, 2018 hin Saidan khuo tieng kir nawk tang an tih. Saidan ICI KTP Unit hai hi KTP Unit hrang hrang hai laia Hmarbiel fang hmasaktu an nih.
