Aizawl, Jan. 23, 2018, Virthli (ONP): Lalsantluong, kum 24 mi, Aryan Ngurte tia hrietlar, Pu Ngurlallawm a naupa chu vawizan dar 7 bawr vel khan Aizawla hotel inlar pakhat Top Chef, Solomon Cave, Zodin square ah a ruolhai leh zanbu an fak lai inchung sawng anthawkin tla thlain, biek khawm hrie hma lovin a hmunah a thi nghal.
Ama hi Boromuolkawi, NC Hills a um niin, kumthar hmanga Aizawla a u hai umna Chhinga venga hung um a nia, zinga (24 January) khin an khuotieng kir dinga an siem mek lai a nih.
A sunghai a'nthawka chanchin ei lak danin Lalsantluong hi zantieng dar 5 bawr vel khan a ruolhai leh bufak tlangna an nei ding thu a hril leiin in a inthawkin a suoka, hun sawtnawte sungin hieng hin tuoksuol a tuok zui tah a nih.
A thlakna hotel hi sawng 4 a insang a na, a chetsuol lai tak hi a ruolha'n anhmu naw thu an hril. A ruolhai hril dan chun bathroom a fe dinga suok kha a chetsuol zui pei an ring thu an hril.
Ama inhnaipui deu a ruol ṭhenkhat hrildan chun, Lalsantluong hi thlangval fel tak, inruithei thilin a sukbuoi ngai lo a nia, a thlakna hotel hi sawng 4 lai zeta insang a ni leiin mani le mani insukhlum ding chun ring a um naw thu an hrila, ṭuong in nal leia intawl tlu a tukvera tla thla khawm lo nisien a thlakna zâwn le a ruong umna hi a kar an hlat em leiin ringhla a um deu niin an hril bawk.
A ruong hi police hai chun inhlawmin Aizawl civil hospital tieng phur phei nghal a nia, vawizan hin mithi siena (morgue) ah sie niin zing darkuo hin postmortem ning a tih.
Postmortem thaw zo hnungah Lalsantluong a ruong hi an khuo Boromuolkoi tieng pan pui ning a tih, tiin a sunghai chun ei palai an hril.
Hi thina le inzawm hin police hai chun investigation an fepui mek a nih, ti'n ei thulakna chun a hril.
Lalsantluong hi Pu Ngurlallawm hai nau 12 laia a naupangtak a nia, Chennai a sinthaw lai mek a nih. Thuziek thiemtak le hlaphuok thiem tak el a nia, Mizo group ṭhenkhata hai mi inlar hai chanchin ziekin mi tam lem chun Aryan Ngurte tiin an hrietlar lem a nih.
