Responsive Ad Slot

Parbung Joint KTP in Advent Christmas, Sports le Crusade a Nei

Friday, December 22, 2017

/ Published by VIRTHLI
Parbung, Dec. 22, 2017 (Virthli ONP): Liemtah Thawleni, 19th December, 2017 zan anthawk 21st December zan chen khan Parbung khawsunga thalai inzawmkhawm Joint KTP chun Advent Christmas, Sports le Crusade programme hai an hmang. Crusade programme hi zan tin RPC biekina nei a nih a, main speaker in Rev. Zawllienmawi, P/O hmang a nih. Sports ruok chu Dec. 20, 2017 sûn khan PMS Complex-ah nei a ni thung a, Chief Host in Rev. Lalnghillo, P/S, ICI Hmarbiel North Presbytery hmang a nih. Advent Christmas chu PMS Complex ah Dec. 21, 2017 khan hmang a nih a; Carol programme zan inkhawm tinin hmang a ni bawk a, Dec., 22, zing dar 4:00 AM chen hmang a nih.

Parbung Joint KTP hi kum iemani zat liemtaha indin ni ta sienkhawm Hmar Kohran Inzawmkhawm (HKI) hmalaknain 2016 lai khan indinthara hung um nawk chau a nih a; Parbung khawsunga kohran tin anthawka member hai chu Joint KTP a hin member niin, group pali (4) — Samson, Gideon, Mosie le Joshua group — a the an nih.


Tulai Parbung Mini-stadium ding bawl meka a um leia field (playground) hmang thei a ni naw leiin Joint KTP Sports hih PMS Complex-a nei a nih a, inelna (competition items) hieng Volleyball, Tunnel Ball le Tug-o-war hai neiin hun hlimtlang taka hmang a nih. Advent Christmas programme khawm PMS Complex-a tho hmang a nih a, hlapawlpui inruolsiekna le Bible Quiz hai neiin, zantieng mi thahnemngaihaiin an hung thawlawm ruoi inhnik tawk tak kiltlang a ni bawk a nih.

Advent Christmas Carol programme ruok chu Val-Upa hai le inthukawpin hmun thum — Block (Community Hall), Hmawngzâng le Dawrkawn haia hmang a nih, mi 100 chuong an thang a nih.

Crusade tumtiek zan hin Pu Sumlamrawn Hmar in Parbung Val-Upa hai kuta a ipek sound system (Stranger, FM Set) le Parbung Library a sie dinga a ipek lekhabu tam tawk tak hai Pathien kuoma inhlanna nei a ni sa a, Parbung Village Authority (VA) office bearers le member thar thlangtlinga um hai ta dinga tawngtaipekna (commissioning service) nei a ni bawk a nih.

Parbung Joint KTP hi Upa Lalruotthieng (Chairman) le Tv. Lalchunghnung Songate (Secretary) haiin an keihruoi mek a nih.
Don't Miss
© all rights reserved
made with by Simon L Infimate