Jiribam, December 11, 2017, Virthli (ONP): Vawisun tarik 11, December, 2017 hin Hmarphairuom mipuihai chun sawrkar kuoma an lungawinaw zie inlangtirna in Jakuradhor hmunah dharna an nei. Hi huna ruosur sienkhawm mipui 1000 (sangkhat) chuong fekhawm a ni a, abikin Tuisuolien a inthawk Khangbor chen mipui fe khawm a nih.
An lungawi naw nasan chu Manipur sawrkar in order a hung insuo le inzawmin, Jiribam Revenue District sunga hin land survey order a hung suoka, hi survey order hi mipui hai chun an pawm thei naw a, asanchu kum tam tak hilai hmuna lo um tah, ram le tui, in le lo le huon le thlai det nei ta hnung, sawrkar in a zuk lakpek el ding anga um a ni a, hilai biel hi tienlaia inthawka Lal (Chief) hnuoia inkhai niin, lal rama um, ram lekha (patta) neilo tam tak hai huon an zuk lak el ding le mipui rawn loa sawrkarin hienga thil a thaw ditnaw lei le Jiribam district chau niloin, Pherzawl district sunga Hmar khuo hieng Khangbor, Ankhasuo, Savawmphai, Muolkhangthol, Henchungpunjee le Upper Tuisuolien khuo hai khawm an thang sa a nih.
Mipui haiin placards le banner hai chawiin, Jiribam district map kan pawm nawh, land Survey order kan dit nawh ti le thil dang dang an suklang bawk. Chun hi huna hin Manipur Revenue minister, Jiribam MLA, Jiribam DC le SP hai khawm ram hung fangin an hmu ngei dinga dharna hi lo huoihawt a ni a, minister khawm lampuia hin chawlin public leader hai hohlimpuina a nei a, minister chun hi chungchanga lan bie dingin a hril bawk. Hi huna hin media hai khawm hungin, thil umdan feltaka hril pek a nih.
