Aizawl, September 12, 2017, Virthli (ONP): Mizorama selkaltu pawl lientak Mizo National Front (MNF) chun hung tlung ding September ni 14, 2017 (Ningani) hin Mizoram pumpuiah "total bandh" huoihawt a tum.
Vawisuna, Aizawl Press Club ah thuthar lakhawmtuhai an pawlpuina ah MNF senior Vice President le MNF Action Committtee Chairman ni bawk Pu Tawnluia chun total bandh huoihawt an tumna san chu Mizoram hmun hran hran ah infepawna lamlienhai a siet zie ditnawna in entirna a nih a tia, Mizoram Congress sawrkar chu lampui siemțha nuom lo angin an tum bawk.
Pu Tawnluia chun Mizoram hmun hran hranah lampui țhat naw leiin mipuiin namen loin harsatna an tuora, lamlien tamtak chu motor hraw thlak/fena thlak khawm nilo in an um a nih a tih.
Congress sawrkar inthlada leiin lampui țhatnaw leia mipuihai thlahuolna'n total bandh hiel huoihawt a lo țul el tah chu a lungngaithlak takzet a nih, ti'n chanchinbumihai a hril bawk.
Tulai hin Mizoram hmun hran hranah infepawna lamlienhai țhatnaw leiin mipuiin harsatna tamtak an tuora, thuomhnaw phur motor lien (truck) hai khawm Bairabi le Kolasib inkar lampui țhatnaw leiin zanita inthaw khan tlan ta loin bandh an nei a nih. Hi baka hin Champhai le Aizawl in kara service maxicab (sumo)hai khawm Nilaini anthawk Inrinni chen lampui siet leia tlan lo dingin bandh nei an tum bawk.
