Aizawl, September 12, 2017, Virthli (ONP): Gauhati High Court chun tulai hnai el khan order insuo in Pu Lal Thanhawla keihruoi Mizoram sawrkar chu kumkhat sungin Hmar People's Convention (HPC) peace accord sukpuitling dingin an hriettir.
September ni 4, 2017 a Gauhati High Court, Aizawl bench judge Michael Zothankhuma in thuthlukna a siem dungzui chun July ni 27, 1994 a ziek Memoramdum of Setllement (MoS) clause 5.1 le 5.3 hai chu order a suok anthawk kumkhat sung sukpuitling dingin sawrkar anhriettir a nih.
Clause 5.1 of MoS in a tarlang danin Hmar țawng chu Primary level chen "medium of instruction" a hmang ding le Mizoram ah țawng lien/pui (major language) pakhata pawm dingin sawrkarin hma lang a tih ti a nia, chun clause 5.3 a hin Sakawrdai ah Civil Sub-Division bakah department hran hran divisional offices hawng ning a tih ti le Sakawrdai a Primary Health Centre chu khum 30 umna Community Health Centre a sukchangtlung/hlangkai (upgrade) ning a tih ti a nih.
Hilai zing hin sawrkar ukil Samuel Vanllhriata Chhangte chun kum 1999 khan Civil Sub-Division chu Sakawrdai ah hawng a nita thu le Primary Health Centre khawm khum 30 umna Community Health Centre a hlangkai a ni ta thu court ah an tluna. Hi baka hin Mizoram (Election to Sinlung Hills Development Council) Rules khawm August ni 18, 2017 khan cabinet in a pawm ta thu a hril bawk.
Kha hma a ei lo tarlang ta angin, Sinlung Hills Accord Implementation Demand Committee (SHAIDC) chun nikum May ni 25 khan writ petion thelutin, HPC accord sukpuitling dingin Gauhati High Court, Aizawl bench ah a lo zuolko a nih.
