~ Jami Darngawn, Columnist, Virthli
Awle, hun liem tasa nisienkhawm, Lalpa ei Pathien thuzawm/thuawi țhatzie chu kei mi țawmkailo nu hin ka tawnhriet hai Lalpa Pathien ropuina dingin la hung suklang nawk ei tih.
2008 lai vel khan ka fena tieng tieng mi ngainatuhai chun "Nau pai/nei nawk ta rawh" ti kha thupuiin an hmang tawl a, keikhawm nikhat chu kan ngaituoa a, awm kha ka ti hle el a, asanchu ka pasal hi naupa mal ani lei le, ka naulutir chu mi pangai ang ani naw lei chun mi ditsak tuhai le mi hmangaituhai chun nau tam tak nei dingin an mi ditsakin ka hmakhuo an mi ngaipui leia an mi hril hlak a nih. Ani ngei anni hai thu chu zawm ka tum tah a.
Chuongchun khawvel doctor thiemhai chu panin nau pai ka tum tah a, doctor thiem hai ka pan nasan kher chu ka fimkhur lei a nih. (Asanchu ka nau lutir kha ka'n doctor pa'n a mi uksaknaw leia khangang vangduoina tawpkhawk tuok kha ka'n ni lei a nih) Chuongchun doctor hai chun an mi ti dan ang ang chu ka'n hang thaw tah a, a chang le ka thisen le ieng ieng am mani an mi test a, a chang chun rinum ka ti thei hle a chu doctor hai thuzawm chu ka thawthei ve sun ani bawk sie a, a tawp a tawp a chun en thei po po le, test thei po po an hang test zo chun, "i sul a chin deu a nih" an mi ti pek el tah a, chuongchun damdawi fak ding chi dang dang an mi peka, ka hang fak ta ngeia leh! Nikhat chu ka damnaw nasa khawpela ka damdawi fak hai chu ka ngeinaw niin ka hriet bawk, chau em em in ka zal tah a, thi el ding hin kan ngai el a nih, ka zal pum chun Pathien kuomah ka țawngțai tah a "Aw Lalpa ka thi el ding chu an ta a, iem i laka thawsuol ka nei ? Dam ka la nuom a nih Pa!" Tiin țap pum in Lalpa ka ko tah a, chutaka Lalpa mi hung dawn na chu ! " Sari'n ka thutiem nghakzo lovin a pasal kuomah a suoknu le nau nei dingin rem a ruok ang kha i nih. Ka thu tiem nghakzo lovin i ditdan angin i um lem a" ti a nih. Ka hang ngaituo chet chet chun alo ni tak luo ie. Lalpa'n thu a mi tiem pek chu ka nau lutir kum 7 a ni pha iemmani tak hung tlung dinga ka țawngțai pha a mi'n hriettir/hmutir hlak kha ana, chu sungpo chu ruithei sala intanghai laia rawngbawl ding ti kha ana, chu chu nghakzo lovin kei ka ditthlangn'an mi hai rawl chu ka lo ngaisak lem ka ni ziet ka chieng ta hle el a, chu taka chun Pathien kuomah ngaidam inhni in ka țawngțai lai chun, ka'n biel pastor pa a hung inlang vang vang tah a nih. Ka pasal kuomah chun ka um dan hai ka hril a, ka pasal remtina ngei chun ka'n biel pastor pa chu mi țawngțai pek dingin ka ko tah a, ka'n pastor hai nupa chu mi țawngțai pek ding chun an hung tangeia ka lawm em em el a nih. Chuongchun ka lu chungah hriek mi nal in ka lu chungah kut an nghat char chun ka taksa popo Pathien Thlarauvin a hung fang vawnga, ka taksa chu sukdanglamin a um a nih. Pastor pa țawngțai lai chun maktak el chun ka natna hai popo chu sikthlak angin a bo hmak tah a nih. Lalpa ropui tak raw seh.
Chuongchun ka hun nei hmasa taka Lalpa'n ka rawngbawlna dinga a mi ruotpekna hmuna chun camp thawpui ka rawt tah a, chu taka speaker ding ka zawng vel lai ka buoi rak rak lai chun, zankhat chu mang mak deu ka nei a, mangang takang chun van tieng doctor hai chun an mi hung kan a, (vantieng doctor ka ti nasan chu, boruok ah an uma punvar an sila hnuoi an sir naw a nih, chun keia fie takin khawvel doctor an ninaw ziet hriettheina ka nei bawk a nih) an ni hai chun an mi en ngeia chu ka taksa an tawk naw a, ka iengkim kha an en ve niin ka hriet a ka manga chun "doctor nau ka pai thei ta ding?" Ka lo tia chu an to țawk țawk tawla ka hang har chu ka mang a lo nih a, iengkhawm nisien "Lalpa thu thu nirawse" tiin ka rawngbawlna tieng chun ka lungril po po ka pek tah a nih.
A thla nawk vel a chun ka um dan hai an hawi naw leiin mak kan ti hle a, ngai inhawilo deuin ka uma iengkhawm nisien tiin ka zun ka hang test chu nau ka lo paițan ve an ta chu !!! Haleluiah ! Ka va lawm ngei de Lalpa !
Chuongchun doctor hai damdawi min chaw ka fak lei nilovin, a rawng tlin le tlinlova ka bawl hlak Lalpa Pathien thilthaw theina'n nau a mi'n paitir a nih. Ka naupa a naupang lem hih Lalpa zarin tuhin kum 8 hmel chu a hmu ve tah a Lalpa a chun ka lawm em em a nih.
Chuongchun ka nau lutir kum 7 a niin a lawn thei ta bawk, chun a sangte ding Lalpa'n a mi pek bawk lei chun ka'n lawm em ema kohran ah lawmna ruoi ka'n țhe hiel ani kha. Lalpa'n ropuina chang mawl raw seh.
Ei hung suklang nuom chu, Pathien thu nekin ei mihriem chanpui hai thu le mani thu hi ei fepui/zawm a awl hlaka, chulaia chun fimkhur taka ei um a lo țul tak zet a nih. Harsa deu hlak sienkhawm nghak fan fan le tuor hram hram puma Lalpa thutiem hai chu ei thaw/zawm hlak hi a lo țha in, a va hlu deh!!!
Lalpa'n rem a ti chun la sunzawm nawk ning a tih.
Tiemtuhai lungrilah Lalpa"n thu hril mawl raw sen ie.
