Tu kuma CL-X le Cl XII passed tharhai po po, lawmpuina chibai inrêngin ka bûk cheu. Chu ruol ruol chun, mani inthladana lei khawm a ni thei; an naw leh harsatna dang dang leia la hlawtling zo ve lohai, lungril takin ka tuorpui cheu a. In hlawsamna’n sukbeidawng naw sienla cheu; hlawsamna hi hlawtlingna ban (lungphum) pawimaw tak a nih ti lungrila vawng tlat puma tha thara ṭhang nasa taka in lâk ka beisei.
Kei hi thuziek ziektu’n Cl X ka exam vena kha kum 50 a lo hlei hiel tah. Khâng hun lai khan chu, Manipur pumpuia hin First Division-a passes 20 khat bâk an um ngai nawh. A nâwlpui lem chu III Division-a passed an nih. Tlângmihai ta ding lem chun First Divn kha vâna ra ang a la nih. Kei lem hi chu Third Divn-a khawm tling phâk lo ka nih. Kei ni hun laia Cl X Second Divn-a passed thei chinhai kha chu Class 1 Officer inziek tling dinga ngai an nih. A tlângpuiin an inziek tling hrim a nih. Tulai ruok chu, Cl -X First Divn-a passed, a chung tieng hril zui ding um ta mang lova zui ral ei tam tah niin an lang. Hi hi thil pawi tak, thil inzakuma ngai ding a nih. Cl X kan in-exam ve lai khan chu, tulaia ‘Internal Mark’ inti ang hi kan la nei ve nawh. Pawl 10 ni sien, pâwl 12 khawm ni rawseh, First Divn-a passed thei chinhai chu mani subject master vieu dinga ngai le, an hnuoi tâwpah Class II Officer bêk inziek tling thei ding khawpa College zo dinga ngai le beisei an nih. Class X First Divisional ei tam tâk vei leh, ei zui ral pei niin an lang a, a va pawi deh aw!
Pu L.Ruoivel Pangamte’n Hmasawna Thar le magazine hrang hranga a hril rawp hlak angin, taksa khawsakna kawnga mi dawmsangtu ding chun Education naw hi chu a um naw ma ma chu a nih! Ei society hi ei khawsakna hmun, Mizoram, Manipur, Assam le Meghalaya-hai khawm nisien, ka ram hang ti thei ding ei nei nawh a. Ei chengna state-haia hin hnam danghai chepdena kara lêngin nau fahra chan ei chang a. Sawrkar development sum hrim hrim hlak chu hnam danghaiin a tak le a thau ṭha ṭha an mi fak zo pek a. Dik taka hril ding chun a rukawl khawm an mi hle nuom naw chu a ni tak tah hi tie maw ?
Ei beidawng luotin, ‘Hi khawvel thil vanrama ei sawm thei ding khawm ni hlei lo chu ….’ hang ti de hlak inla khawm; hnuoi taksa puta hi khawvel ei hluo sûng hin chu a ni thei tak tak bawk si nawh. Ei Pathien thu’n, “Chunglêng vatehai khi en ro, bu an tu nawh a, an sîk bawk nawh. Nisienlakhawm in Pa vâna mi chun a châwm sih a.” ti thu Mathai 6:26-a hin hang innghat ngawt ding ni inla, Bible thiemhai chun, “Chunglêng vatehai hin bu tuin sîk nawhai sien khawm, an fâk ding lakhâwmin, châwl lai hrim an nei nawh. Leilung siem tîra inthawk an umdân dinga Pathienin a siem ang takin an umin an khawsa zing lem a nih.” an mi tipêk nâwk âwm sih a.,”
A iengpo khawm chu lo ni sien, vawisûna Cl X le Cl XII passed thar po pohai hi, mani intodelna lampuiah tlâna, khawvel thiemna insanglem tui chawi thei dingin kawtsuo pawimaw tak in paltlang mek chau a nih ti in inhriet tlat a pawimaw hle. Tuta in phak chen Cl X or Cl XII hi chu fakkhawp a la tling naw leiin taimak in insuo nawk zuol nuom a um takzet. Fak khawp inchuk dawk ding chun lampui hraw ding sei deu in la nei ti hrein, inthlada a thieng nawh. Cl X 1st Divn-a passed hnunga Cl XII 3rd Divn-a passed ti ang chi hi thil inzakuma ngai a hun tah. Kum tin First Divn-ah ei intlar del dulna hi kum tam fut an tah. Cl X result-a inthawk inkhi chun, HSA member sawmhni khat bek kum tin First Class Officer inziekkai ding âwm hmel chu ei put tah. Amiruokchu, ei zui ral tiel tiel am a nih ti dingin Cl X chungtieng hin ei ri hi a dei deu tlat ta pei nisien a hawi a ? Țhang lak nasat a ṭul. Tuhma kum 25 vel hmaa pawl sawm III Div-a lo passed-hai hman officer an lo inziekkai thei a ni chun, I Div-a passed-hai ta ding lem chun ei thei ding a ni ringawt el. Amiruokchu, officer inziek kai ding chun inthlada a thieng nawh. Mani ei in hmusitna ding ni naw sien, hang hril mei mei ka tih. Kum tin hin Cl X result hi inter-net ah ka lo en ve hlak a. Ei ni rawi Churachandpur tienga Zohnathlakhai a tam lem hi chu, Internal Marks le MIL-in division ṭha ah a mi keikai mei mei ni sien a hawi. Chuleiin, ei division le ei hrietna tak tak inkar hi hla vieu rawi a tih, inthlada thei ei ni nawh. Sin ṭha zawnga competitive exam-na hall ah ei inṭhung pha, ei division ni lovin ei hrietna chau a nih ei sawr ding chu.
Chuleiin, HSA member tin, abikin tu kuma Cl X le Cl XII passed-hai chau ni lo, a fail hai khawmin Tirko Paul ṭawngbau zûl deuin, “First or Second Div ah passed inti bêk bêk khawm ka ni nawh a, tu ṭum ka fail lei el in thil hre thei lo hrim hrim nia inngaia êkche inṭhunga inṭhung el khawm ka ni nawh a, thiemna field-a kan tlansiekna lam suo tah bêk bêka inngai khawm ka ni bawk nawh. Amiruokchu hi thil pakhat hi ka thaw hlak; vawisuna ka result a ṭha tam a sie tam theinghilin, hmatienga thil um, thiemna le hrietna tak tak nei dingin inthlada lo le zawmthaw lovin; mihriem ta dinga hun (time) pawimaw bêk bêk zie ngaituo le hre zing pumin ka hmaa khawvel intlansiekna ding uma hin sel takin hma tieng panin ka tlan ṭal ṭal a nih,” ti thei seng in la nuom a um bêk bêk.
Vawisuna nunghak le tlangval, High Schools, colleges le Universities-a inchûk mekhai hi zinga hnam le kohran ṭhuoitu dinghai in nih a. Thlarau ramah nisien, khawvel khawsak thiem inchûknaa khawm ni sien, mani phâk chin bâk midanghai ei ṭhuoi thei ngai nawh. Division ṭha/insanga passed-hai an division-in phûrna le taimak nawkzuolna pe sien la. Division inhnuoi deua hlawtlingna changhai le vawisuna la hlawsam hrihaiin “iem ka thei naw bikna ding san” tia thangtlâwmna ṭha an nei beiseina leia hi thu hi ziek a nih.
Tuhma deu khan chu Cl X result suok zo charin pass-hai lawmpuina inkhawm kha HSA-in a buotsai hlak kha niin ka hriet a. Vawisuna Hmar Students Association ṭhuoitu haihin an sin le an mawphurna tak hi an hriet naw ve deu am an tah aw ? ti dingin a um. Inchuklaihai, an sâwla an hung inthlada nawna dingin, infui le sukphûr a pawimaw a; chu sin chu HSA ṭhuoituhai liengkova innghat a nih. Headquarter le Block levelhai ah ei huoihawt thei naw a ni khawm a, unit le village level-haia bek ei thaw thei ta naw am ning a tih aw ? An naw leh, hieng thil ei thaw kum tin hai, kei patamtawmin ka lo hriet phâk ve ta ngai naw lem ?
Chuleiin, nang thiemna in hrang hranga thiem inchûk mêk, hei ngaituo vang vang la; vawisuna in sungkuo le i hnam dawmsanga a um theina dinga thil pawimaw hrang hrang hei dap vel ta. Mimal, sungkuo le hnam mi dawsângtu dinga thil pawimaw tam tak i hriet am ? I insûng le ka insûng le ei hnam dawmsânga ei um a, mihai ei hnawt phâk vena dinga pawimawtak chu EDUCATION ngei hi ni lo am a nih ? Chu chu mâwl taka hril ding chun ‘Mihai lekhabu zieksa hriet rawn’ a ne’l. A ziek pei hman an um chun thaw ro, eini inchuklaihai hin inrim taka mi lo zieksa na na na chu hre ṭeu dingin tiem tlut tlut el ei tiu. A tlâwm tâwpah ni khatah darkar 7 ngûk taka i subject i tiem a ni phawt chun, ruol hnung i hnawt bik ring a um nawh. Chu formula chu an tak bek nawh. Ni tin zing dar 3:30 ah tho la dar 7 chen lekha tiem la. Zan dar 6:30 ah ṭanin dar 10 chen tiem nawk rawh. Chu chu thil intak tak, awlsam tak bawksi a nih. Chu thawtheina ding chun nang a tumruna le mani inthununna (self-decipline) ah an nghat lien tak.
Chuleiin, tiemtuhai, a bîkin HSA member thiem inchûk mêkhaiin, mani sin le inchûkna seng, inrim, taima le ngûk taka thaw hi ṭawngṭaina ngênngawl, Pathienin a dawn ngei ngei hlak a nih ti lo hrie thar nawk seng ei tiu.
Dated Rengkai, the 4th June 2017.
Phone 9862065735.
