Responsive Ad Slot

April 28-ah Mizoram sawrkar le HPC (D) inbiek nawk ding

Saturday, April 15, 2017

/ Published by Simon L Infimate
AIZAWL, 15 APRIL, 2017, VIRTHLI (ONP): Hun iemanichen anthawka inremna lampui zawnga inbie mek Mizoram sawrkar le Hmar People’s Convention (Democratic) hai chun hung tlung ding April ni 28 hin inbiekna dawkan kil tlang an tum nawk thu Mizoram Home Minister Pu R. Lalzirliana chun a hril.

Vawisun khan I&PR Conference Hall, Aizawl-ah Chanchinbumihai a pawlna ah  Home Minister chun tulai hnaia chanchinbu thenkhata hai inbiek nawk hun ding April ni 21 anga tarlanga um chu hrietsuol pal a ni thu a hrila, Mizoram sawrkar le HPC(D) hai hmalak dan ve ve hril tlang dingin April ni 28, 2017 ah inbiekna nei nawk dingin ruohmanna siem a ni thu a hril.


Pu R. Lalzirliana chun Mizoram sawrkar le HPC (D) hai chu inremna zawngin tum (trum) 8 lai zet inbiekna an lo nei tah thu hrilin, inbiekna hmasatak chu November ni 11, 2010 khan State Guest House, Aizawl ah nei a ni thu a hrila, hi hnung hin 2013 kum khan vawi 4 lai zet Aizawl le Sakawrdai Tourist Lodge a hai inbiekna an lo nei ta bawk niin chanchinbumihai a hril.

2013 kuma Suspension of Operation (SoO) chungthuah thu inhmu naw leia inbiekna a thlawl hnungin August ni 10, 2016 khan Mizoram sawrkar le HPC (D) hai inkara inbiekna chu tan nawk a nia, nikum sung khan vawi 3 lai zet  inremna zawngin dawkan an lo kil tlang hman a nih. Inbiekna nuhnung tak December ni 16, 2016 a an nei tum (trum) khan Mizoram sawrkar phutna angin HPC(D) chun Mizoram police hai kuta inthawka ralthuom a lo lakhai pekkirna a lo nei ta bawk.

Home minister chun inbiekna a thutlukna an siemhai chu inza tawnin a tu tieng tieng khawmin an mawphurnahai hrattaka bawzuiin hma an lak mek thu a hrila, Mizoram sawrkar khawmin HPC(D) hai leh an inbiekna dungzuia an thaw dinghai sukpuitling dingin sawrkar hnuaia department hrang hrangah hai hrat taka bawzui a ni thu a hril bawk.

Tuikuk (Rieng) thuoikir ding chungchang hrillin, Pu R. Lalzirliana chun Mizoram sawrkar chun a thawding ang ang chu a thaw vawng ta thu a hrila, sum mamaw ding zat Ministry of Home Affairs (MHA) in a pawm hun hunah thuoikir hun ding amani thuoikir dan ding le an hungkir dan ding thutlukna mumal tak siem la ni’ng a tih ti’n a hril.

Tuta Mizoramin a hmang mek Zu zawr phalna dan ‘The Mizoram Liquor (Prohibition & Control) Act, 2014 (MLPC) chu hlip tumna amani hlipnaw tumna amanih khawm a um chuong naw thu hrilin, Excise & Narcotics minister ni bawk Pu R. Lalzirliana chun ram le hnamin a siet pui ding a ni ruok chun iengtik lai khawm hlip thei dingin sawrkar an pei zing thu a hril bawk.
Don't Miss
© all rights reserved
made with by Simon L Infimate