Responsive Ad Slot

Hmarram Kohran Inzawmkhawm (HKI) Common Question le candidates hai dawnna

Friday, February 24, 2017

/ Published by VIRTHLI
Hmarram Kohran Inzawmkhawm (HKI) General Body meeting chu February 20-21, 2017 haia khan Parbung khuoa nei a ni a, hi huna hin 55-Tipaimukh A/C a MLA candidate hai ta dingin Common Platform siempek niin thuhrilna hun pek seng an nih. Intiemkamna inneitir seng an ni bakah HKI in Common Question a siem chu a hnuoia angin an dawn tawl a nih. Hi huna hin Pi Thangthatling ti lo chu an thang seng a nih.

Q- Tuta tum hin MLA a thlangtling lo n tala, ei Biel mipuihai thaw ding le um dan dinga I dit le an thangpui dan ding le an tlawppui dan ding che a I dit ieng ang am a um a?

Dr Fimate: Mipuiha’n thil thatak ei rawtnahai ah lungril thienghlim tak le Pathien dit dan le inhme a thahnemngai taka mani mimal duamna thang lova, ram le hnam hmangaina kha Priority-a(a pawimaw tak) hmanga mi thlawp dingin ka dita. Hlawfa sin thaw anga ei hmalaknahai ei thaw vet hlak hi um ta lovin, ei ram ei hnam hi ta anga ngaia chawngsin chawngpu nun puta sin thawtlanga Pathien dit dan hriea thienghlim taka sin mi thawpui dingin mipuihai ka ngen a nih.

Ngurrivung: Sawrkar sinthawtuhai khawm nisienla thil um reng renghai mipui hriet dinga tarlang, a tul leh mipuiin lam hrawnahai neia a tul chun thil indiknawhai Sawrkar Court ahai chen ah Case File ngam dingin ka ngen cheu. Ngursanglur: Ram siem dinga pawimaw tak chu mipuihai ei nih a. Chu ding chun indiknahai, taimaknahai titaknahai le hmangainahai hi ei rengin ei nei ka nuom a nih. Kei khawmin nei ngei tum bawk ka tih. Chun, Hmar hnam mipuihai hin Hotuhai ro relna hi ringzo ei tiu a mipui ta dinga tha an rel anih ti hih ei lungrilah sie tlat bawk ei tiu.Hi hi ei hnamin ei tlaksam pakhat chu anih.

Dr. Amo: Ei ram hmasawnna ding le a changkangna ding chun indikna, taimakna, titakna a tula. Chun Pathien titna nei a tul bawk a. Ei rama Sawrkar sinthawtu le thawktuhai hrim hrim ei Control tum phat leh a lo santu am ani ieng ieng amani inlo um hlaka. Chun, ei rama Sawrkar thawktu um pei lo hai khawm hi mipuiin thei ang angin lo support in lo duot hlak ei tiuva. Hme inhnik hnik a um naw khawma ei thei ang angin lo support hlak ei tiu. HKI hai hmalakna khawm hi support tlat ei tiu a, Pathien Thu a chau naw chun ei ram hi ami control thei tak tak naw ding a nih ti hi ka hmu a. Chuleiin HKI hmalaknahai khawm hi mipuiin support tlat ei tiu.

Q- Tuta tum ahin MLA a thlangtling lo nita la, mi po po chun an vote naw ding che ana, nang a vote nawtu chehai ta dingin ieng ang MLA am ni I tuma?

Dr Fimate: A hma deu khan Hillary Clinton chu US Senator dinga thlangtling ani tuma a thil hril kha tha ka ti khawp ela, chu chu ka Principle dinga ka I dit a nih. An inthlang zo ni a Victoria a a thuhril kha ‘Election lai khan mi dang dang ta dingin vote in zawnga, Republican ta ding, Democrats ta ding khawma vote in zawnga. Vawisun ni hin kei ka tling tak leiin New York ta dingin ei rengin hmun khatin sin thaw tlang ei tiu’, a ti a. Chu ang bawkin, kei khawm thlangtling kalo ni chun nangni pawl, kei ni pawl chuhai pawl, ti um lovin, pawl ramri thiekin, mi tu khawm thlierbik um lovin, ami vote tu le ami vote nawtuhai en dangna nei lovin, ram le hnam ta dinga ke khata ngir gtlanga inthuruol taka ei ram hmasawnna dinga thawtlang dingin thawng kata hma lang kata, tukhawm ramri thiekin inang vawngin en ka tih.

Ngurrivung: Tuta tum ahin MLA thlangtling lo nita lang ami vote nawtu ka hriet thei ka ring ta nawh a. Asanchu lekha ei sema, intina hai. Pathien hmingin kaisan fielin ei in fiela. In tinah vote khat bek ei thaw chun chu ami vote nawtu ei um thei naw ding ana. Chu pawl kha pawl ti um theilo ding, Jacob beram ruol ang khan a t iel tek tuk dam an um ding anih ti chu ka chienga. Chuleiin, anni pawl, keini pawl ti um thei lo ding. Mipuihai le Tipaimukh mipuihai aiawtu MLA ka ni el ding a nih.

Ngursanglur: Nakie khawm khan ka hril tah a. Kei chu ka var rak nawh a. Bible in “Pathien ti chu varna bul a nih”, a ti lei khan Pathien ti pumin ro ka relpui ding cheu anih kati chun, ami vote tu vote nawtu ka thlier nawh a ka en ngai naw bawk. Thilthawtheina ka nei chun tu khawm thlierbik ka nei ngai nawh. Rangva ka sem khawma ami vote nawtu khawm ka pek rawn el, bufai ka sem khawma ami vote nawtuhai ka sem rawn el, an ang vawng. Chuleiin, kha ding khan chun kei a hin eng dangna tukhawm ka nei nawh.

Dr Amo: MLA ka ni sungin , ei ram mipui ta ding le development thil, vantlang thil ani chun tukhawm thlierbik nei lovin kalo thaw hlaka. Amiruokchu, mimal inditsakna ding thil a um pha ruok chun, ami vote nawtuhai kha a tlar nuhnungah an uma, ami votetuhai kha a tlar hmasa ah an um hlak.

Q- Ei Biel ahin tuta tum hin MLA inthlangna ahin in reng hlaka tling ngaina um naw ding ana, Pakhat chau in tling awm si a ! MLA ahin thlangtling lo nita nawla, iengtinam ei ram ta dinghin hma lak pei I tuma ?

Dr Fimate: Thlangtling ka nia, ka hma lak tumhai chu, thlangtlingnaw ni lang khawm, thawthei dan lampui zawngin theitawp suo’ng kata. Ei ram ei Hnam damna ding le indintharna dingin ka tha chuoi chuong lovin hma la pei ka tih.

Ngurrivung: MLA a thlangtling lo nita naw lang khawm, Ka Manifesto tamtak Point 29 lai ei zieklanghai kha phursuok ani theina dingin a tling tlinghai thawpuiin a sukpouitling dan ding anni le keiin nawrpui tum ka tih.

Ngursanglur: Thlangtlingnaw hi chu ka ni ngun khawp ela, thlangtling naw hi vawitam ka nilaiin ka thaw ding chu ka chai chuong le. Mipui hmakhuo ngaiin ka thaw zing hlak.College ka zova Kum 25 kan tling charrin mipui ta dinga inpek ka ni leiin kan pek ran. Tling khawmin kan pek, tling nawlai khawmin kan pek. Ka nuhmei nei ku hi aw, vawisun ni hin a nunghak lai hmel tha sienlakhawm, a nupui hnungin a hmel asi lem…ka ditsak ta da’l ding ani? Nilove, ka hmangai ani leiin, ka hmangai rân el ding a nih.

Dr Amo: MLA ka ni sungin sin tamtak thaw zosa a uma. Kala thaw zonaw sunzawm ding sin bangkhai tamtakhai sunzawm dingin ka theina zawn zawnin, Sorkarah thei tawpin hmala dingin sunzawm pei ka tih.

Source: Hmasawnna Thar

Don't Miss
© all rights reserved
made with by Simon L Infimate