Responsive Ad Slot

AN THAW DAN HI LUMNAT A VA UM DE AW….!

Tuesday, February 21, 2017

/ Published by VIRTHLI
~ H. Zaneisang (9862065735)

Rome sipaihai le Juda mipui haiin khawvêl mihriemhai suol phurtu Isu Krista an sawisak dân lumnatumzie, Hmar hlaphuoktu Hrângkâpchîn-in ringna mita a hei thlîr chun, mak le râpthlâk tiin, “A thi dân chu lumnat a um de aw,” a lo ti vawng vawng a. Chuong ang bawk chun, ei Lal Isu’n Intlanna sin thaw zova vân tieng a lâwn ding tâwm a, ringtuhai kuoma kum khuoa umzing dinga Pa’n a hungtir ding ‘ Lalpa Thlarau’, ei sakhuo ṭhuoitu ṭhenkhatin an sawisak dân hi lumnatum ka ti êm leiin, vawi li nêka tam hiel ziek ta lang khawm, kei Critic khawm tling phâk lo, mihaiin criticiser chauva an mi hmupa hin lumnatum ka ti nasan tlâwmazâwng la hei ziek nâwk hrâm ka tih ie.

     ‘Thlarau’ an sawisak dân ti lêmah, intlanna sin Isu’n a thaw zo hnungin,  ringtuhai mâksan ta ngai lo dinga Pa’n Thlarau a hung tir hi, hming pahnih inneitira a um tlat el hi lumnatum ka ti thu ka la hei ziek nâwk hram a nih ie. I nuom leh i tiemzo pha, tapsak kilah i hner mi phen khum i ta... A ni le a ninaw dânhai mipui hrieta hril tum uk si lo a, tapte bula inrêl le inhrilsiet hi, ei society phâk tâwk a la ni khawm ni’ng a ta...Ieng anga rêtin um lang khawm, ka hriet phak ta tlat naw chun nâ ka ti chuong âwm tawp si nawh a…!

       Hranghlui hlaphuoktu haia inthawk, a ieng am a’n diklem ti hriet thei lo rak khawpa an hmang chingchivêt thu Hmasâwnna Thar Vol 31/287 dated the 6th. September 2016 khan detail deu hlekin ka ziek tah a. Tlâwmin zuk hrilnawn met ei tih. Hranghlui hlaphuoktu haiin Thlarau Thienghlim le Thlarau Inthieng an hmang dân tlangpui chu hieng ang hi a nih. Bracket sûnga no. hi Independent Hla Bu 1992 Publication No. an nih.

Thlarau Thienghlim hmangtuhai : 1. Pastor Thangngur (147). 2. Pastor Khuonga (12 & 21) 3. Hrânga (87). 4. Hrangkapchîn (13). 5. Pautinkhûp (155). 6. Hrânglien (201). 7. Pi Kûngnu (216). 8. Pi Runchawng (243). 9. Pi Lechawng (247). 10. Rev Hrângtawnlien (313) 11. Pi Tuosing (326). 12. Pastor Khuma Biete (51).

Thlarau Inthieng hmangtuhai :-1. Pastor Thangngur (183 & 265). 2. Pautinkhup (169 & 261). 3. Hrângngur (97). 4. Ngulsâng (172). 5. Pastor Thanglêr (143). 6. Lalthangkung (152).
7. Thangluoi (157). 8. Upa Rokung (286) 9. Pi Thangsuntling (226).

       A chunga ei hril ta pohai khi hrânghlui haiin Thlarau Thienghlim le Thlarau Inthieng an lo hmang dân tlângpui, Independent Kohran Hla Bu-a inthawka ei lâk suokhai an nih a.

      Kristien Hla Bu, Centenary Edition, 2011-a Thlarau Thienghlim le Thlarau Inthieng hmang kawkal dân chu a hnuoia ang hi a nih.

Thlarau Thienghlim hmangnahai: Hla Nos. 55, 114,146, 204, 212, 340, 406, 417, 427, 431, 447 & 450.

Thlarau Inthieng hmangnahai : Hla Nos. 121,122,124,190, 271 & 335.

       Tuhin, tulai ṭhangthar haiin iengtin am an hmang ve thung a ? ti lo hei en nâwk vuot ei tih.




Rev Dârsanglien Lekhabu ziekhai:

    1. Tirkohai Thilthawhai Hrilfiena, First Edition, 1982 (The ICI Press). Bung 1-na ‘Thlarau Thienghlim’ pêk tiem thuin a ṭan a, hniek phawi hman lovin tlar 8-naah Thlarau Inthieng-in a zui nghâl a. Bung 2-na phêk 8 & 9-haiah, Thlarau Thienghlim ṭum 5 lai a hmang hnungin, a khêl tieng chu Thlarau Thienghlim le Thlarau Inthieng a hmang kawkal nuk el.

     2. Kohran Thuring Bulpui :- (First Edition 1981, ICI Press).  Phêk khatna le phêk hninaah Thlarau Thienghlim-a ṭanin, vawi 5 zet a hmang a. Phêk 3-naah Kohran Thienghlim vawi hnih a hmang a. Phek 3-naah ICI Thuring inziek a quote-a inthawk Thlarau Inthieng a hmang ṭan tah a. Phêk 115-a ‘Bible-a thienghlimna’ Pathien Thienghlimna’ ti thuhai bâk chu Thlarau Thienghlimin hmun a chang ta nawh. Thlarau Inthiengin a hluohlân vawng tah ni sien a hawi.

       3. Chanchinṭha Kalchawi Part 1 & 2 :- First Edition 1982, Diamond Offset.
Phêk 89-a Thlarau Thienghlim a hmang bâk chu, Thlarau Thienghlim annawleh Thlarau Inthieng a hmangna ka zuk hmu el thei nawh. Ama Rev Darsanglien ma’n a ziek (inlet), Chanchinṭha Hril, Remruotna Ṭhuoitu tia ruok chu, phêk 4 le 81-a, Thlarau Inthieng a hmang ti lo chu Thlarau Thienghlim a hmangna ka hmu ta nawh.

     4. Leveticus Hrilfiena : Kum 2008-a Hmar Christian Leaders Forum-in Smart-tech Offset   
Printer-a suta chun, phêk 12-na a, Thlarau Inthieng a hmang bâk chu, Thlarau Thienghlim annawleh Inthieng a hmangna ka hmu nawh.

Rev Lalthankhum Sinate hmang dan:

Hebrai Hrilfiena, 2nd Edition 2003-ah Thlarau Thienghlim le Thlarau Inthieng a hmang pawl. Eg. Phêk 1, 24, 27, 31, 54-haiah, Thlarau Thienghlim a hmang a. Phêk 15-ah Thlarau Inthieng ṭum hnih a hmang.

Rev HK Khawlkung hmang dan:

Korinth 1 Hrilfiena. 1986, ICI Press. Phêk 30-naah, Thlarau Thienghlim ṭum khat a hmang a, phêk 90-ah Thlarau Thienghlim ma ṭum 3 a hmang ti bâk chu, Thlarau Inthieng a hmangna ka hmu nawh.

Rev Dr Lalhmuoklien hmang dan :

NAMBAR Hrilfiena. 2010. Hmar Christian Leaders Forum Publication. 2010. Smart-tech Offset Printers. Phêk 57-ah Thlarau Inthieng a hmang a. Phêk 65-ah Thlarau Thienghlim a hmang thung.

Rev S Infimate :

Philipi Hrilfiena, kum 1989-a ICI Press-in a sut phêk 9-na ah, Thlarau Thienghlim a hmang bak chu, Inthieng a hmangna ka hmu nawh. Thienghlim le Thienghlimna ṭawngbau a hmang zeu zeu.

Rev C C Rema :

Hebrai Lekhathawn Hrilfiena, kum 1993-a ICI Press-a sut ah, Thlarau Inthieng a hmang bâk chu, Thlarau Thienghlim a hmangna ka hmu nawh.

Rev Fimṭhasang Infimate :

Chanchinṭha Mathai Hrilfiena, Published by EFCI in 2001.
Thlarau Thienghlim (eg. Page 2)-a a hmang bâk chu Thlarau Inthieng a hmangna ka hmu nawh.

Rev J Huoplien Neitham :

Chanchinṭha Johan Hrilfiena a siem, kum 2002 Carlen Printing Press-a sut-ah Thlarau Thienghlim (see page 5 & 79) bâk chu Thlarau Inthieng a hmangna ka hmu nawh.

Rev Jolienkhum :
Isu Krista hungnâwkna, ti thupui hmanga a lekhabu ziek; kum 1984-a L & R Printing Press-a a sut ah, Thlarau Inthieng le Thlarau Thienghlim a hmang kawp. (see page 30)
Rev Huolthangsei Ṭhiek :
Marka Inchûklai Bu, kum 2015-a Hmar Christian Leaders’ Forum-in Smarth tech Printers-a an sut, phêk 14 le 15-ah Thlarau Inthieng le Thlarau Thienghlim a hmang kawp nghâl leiin, ka Pute khawm hin thienghlim le inthieng umzie a confuse ve ni’n an lang.
Rev H B Hluothang :-
Chanchinṭha Johan Inchûkna a buotsai, kum 2016-a Hmar Christian Leaders’ Forum-in Smath tech Printers-a an suta hin Rev HB Hluothang hin Thlarau Inthieng a hmang bâk chu Thlarau Thienghlim a hmang naw ni âwm tak a nih.
Awleh, Thienghlim or Inthieng thumal pahnihai hi Pathien Thlarau hrilfiena (definition) anga ngaithei a ni lai zingin, personal name a ni leiin, hmang kawkal sên chi nia an lang naw leiin; ei hmang kawkal dân hi lumnatum ka ti êm a, inthlahrung tak pumin ka hung ziek nâwk a nih. Darkâr 2, darkâr 3 sûngin lekhabu sâwmkhat nêka tam ei zuk keu thuok thuok a ni leiin, sukdiknaw pal khawm um thei a nih. Kei hi article ziektu hin tuhma ka thuziekhaia khan Thlarau Thienghlim ti lovin, Thlarau Inthieng tia ziekna dâm ka lo nei pal el dî’m aw ? ti’n hi thu ka ziek lai hin kan ngaituo fêt chutie.
Thlarau Thienghlim or Thlarau Inthieng ei hmang dân chu khieng te nuoi khi a nih a. Nang tiemtu’n lumnatum i ti ve naw maw ? Pathiena mi pathum (trinity) laia pakhat hming (personal name) a hnam pumin chîk taka ngaituoin;  ei inthuruol tlângna or mipui tamlem ditdâna hmang lem dinga thutlûkna siem pawimaw i ti ve naw maw ? Hieng te nuoi hin chu Pathienah mi pathum (3) ni lovin mi pali (4) nei ei hawi êm annâwm ie !
Don't Miss
© all rights reserved
made with by Simon L Infimate