Responsive Ad Slot

DITE KA NGAI EM CHE

Thursday, December 15, 2016

/ Published by VIRTHLI
Ramthienghlim Varte

            
Pu Kaikhawthang Puruolte @ Kaia Senvawn EFCI Assembly le inzawmin Shillong-ah March 2016 thlabul khan a hung a, bu fak tlangna dam neiin kum sawmhni neka sawt tah a kan hla siem le a hla phuok (Pathien hla le Sai hla) hai sakin hla ruoi kan the a, lung an leng khawp el.
            
Ei hmar hla (Pathien inpakna le sai hla)hai hih a thluk le phuoktu hming hriet mumal lo a tam ta em em a. Kan hla siem ‘Dite ka ngai em che’ ti hla Assam a ei unauhai chun Hmar MIL a naupanghai inchuk dinga a phuoktu indik naw taka an lo sie siemthat a tul thu dam a mi hril a. Chun, mi dang dangin an saka a thluk indik naw em em el bakah Independent hla thluka an mi hei sak pek el dam kan ngai thlak a. Nui an za naw khawp el.
            
Hi hla hi Pu Kaitinthang Puruolte @ Kaia, Edward Thangchunghnung Hrangate @ Edward T.C. Hrangate le kei @ Ramthienghlim Varte-hai tlangval laia zun thanga phuok a nih. Kum 1986 June thla khan Tv Kaia Senvawnin a ngai em em G.P.Women College, Imphal-a kai hmu nuomin Senvawna inthawk Tuithaphai-ah a hung pan a. Tulai anga telephone-a chanchin inhril zung zung thei a ni naw leiin inhrepaw lovin a ruolnu khawm chuh chawl a nei le inruolin an veng Senvawn tieng a hung ve a, Thanlon-ah an intuok pel hlauh a. Tv Kaia’n Tuithaphai a tlungin a hei hriet chuh a lung an leng hle a, changkhat le thunawn hi a hung inzawt suok  a nih.
“ Kar lam ang a hla, Muolzapuiin mi lo dan,
ka lengna phai khawlai tuol, Chun nun ring dim maw,
Dite ngaia um khawsawt, ka Dite ngai um khawsawt;

Dite ka ngai em che, Sakhmel tawnglo ni reng a sawt ngei,
Ieng dang ka dawn thei nawh, Aw dite,
Dite ka ngai che, ka ngai zuol che”.

Dite a ti hi Nk Melody tuta a pawmlai Melody Pathien dan thienghlima a nei  hih a nih. A hla thu a ‘ Ka lengna phai khawlai tuol, ti hi a lengna Tuithaphai  a tina a na, Chun nun ring dim maw’ ti hi thenkhatin ‘chun nun rieng din maw’ ti damin an lam/sak hlak a, an dik nawh. Hienganga khawsawt taka um dingin a nu (a piengna, Senvawn a umin a ring dim chu aw! a tina lem a nih. Tv Edward TC leh sakin khawsawt takin zanah an inpawl a. Lunglai hluozotu nei le nei intawng fu na na na chun Tv Edward TC khawm a chuong a liem a ni bik chuong nawh, hiengang hin a changhnina a hei inzawt suok ve’l chuh a nih.

Tuon sin dang sienkhawm, ka lunglai singmit remtu;
A engmawi an nui hlim thla,Ka hlimpui em em,
Tlang ka tlir liem nawk el hlak, Lung ka ruolpui thei chang sien. tiin.

HSA-a thuoitu ka ni lai khan Mizoram tieng thang kan lak nasa khawp el a, vawitam inzinin kum 1985 khan Aizawl Jt.Hqrs. indin a hung ni tah reng a. Zankhat chuh Tv Edward TC Khawmawi (kan in)ah hung lengin a riek nghal a. “U Kaia leh hla thar kan siem a” tin kan hei sak chuh a changhnina a phuoksan a mi hril bawk a, kan khuo a sawt hle a. Keikhawm nunghak mi ngai em emtu le ka theinghil thei lo, lungbawra chamzing neive tho chuh a changthumna dingin ka hei inzawt suokve tah a :
Kawlva lengsama leng, A rem naw maw ngailai Di,
Zanmu tuorem thei lovin, Laikhum zau ka bel,
Ka hung thawn che hmangaina, Virthli lenghai kuoma khan. tiin.
             
          Thenkhatin ‘Laikhum zal/nem ka bel’ tiin an sak/lam hlak a, a thu fe dan ngaituo chun a awm lem el thei. Amiruokchu, ‘Laikhum zau ka bel’ ti ding a nih. Chengna hmun le ram inzula ei tawng hmanghai danglam a um nelnuol a. Tuithaphai-a umhai chun phaizawla cheng ei ni leiin ‘ZAU’ ti hi an uorin an hmang tlanglawn em em a. Kei khawm ka lung an leng  a, kar a hla bawk si, a thang naw chun khum khawm ruok huouvin, zau heu huou angin ka hei hmu el chu a ni khah. 
            
Hi hla sak suokna hmasatak chuh kum 1986 HSA piengchampha lawmna Tuithaphai Block-in Saikawt Community Hall-a an hmang tum khan a nih. Tv. Edward T.C. leh kan sak a, keiin Second voice ka thaw nghe nghe. Kha nia inthawk vawisun chenin thangtharhai chen hriet lar a hung ni tah pei a, tukum 2016 June hi kum 30 hmel a hmuna an tah.
            
Lenruol Hlabu-a Sai hla, Hnam hla, Khawtlang lungleng hla, Ramngai hla, Nunphung hla – 233 le Naupang tuol chai hla, Hla do, pi pu hla, le dang dang 9 a rengin 242 vel ei hla kungpui haiin an phuok inchuonin, mi pakhat ringawt khawma hla 50 neka tam, mawi tak taka an phuok/siemhai inchuonin phek tamtak a hluobit a. Hi hla ruok hin chuh mi pathum zet, piengphunga pum inbaw ding khawma suongum khawpa pa lien tak tak, pansak panthlang sukbuoi lova khawsa theive tho haiin an siem phek khat khawm a hluobit naw vang a ni. A reng rengin mi pathum hla siem/phuok ka la hmu ngai zen zen ngai naw a, a tlawm thlakin inzak um zawnga lak lem chun mi laia meng ngamna chi le hei thelar chi khawm nin an lang nawh.
            
Ei Hmar hla hieng- Sakhuo hla, Sai hla, Hnam hla a ieng iengkhawm nisien a boutsaituhai awmhnawka hungsuok, a mawrtu rau neihai reng reng chuh saktu le ngaihtlatu lungrila a thawk dan a dang rieu chuh ning a tih. Ei sakhuo hla a hin Kristien hlabu-ah 509, Kristien hla thar bu- 372 (source 8th Edition 1992, EAC) Independent hla bua hla 500 vela hisapin (a hnunga an belsa peihai tiemsa lovin) hla 1381 vel um ang lo nisien hi takah hin thlarau pawlna changa Vawk ang ela ei inbuolpui, ei khukpui le mipui hriet lar Sakhuo hla chipchier deu hlekin ka hei bi kuol vela hla 200 bak ka pel thei der nawh. A thluk ei hriet ta nawhai Tonic Solfa-n ei hei thaw ngiel khawmin ei sawlpui angin hma ei sawn thei chuong nawh. Chuongangin Lenruol hla bu (Sai hla, Hnam hla) a khawm hin hla 60 bak umin ka hriet naw bakah a thluk siemlo a thu ringawt, a phuoktu hming khawm um lova ei senglut khawm iemanizat umin ka hriet. Thangtharhaia inthawk hla thar thalai nun le inzula siem a hungsuok a, hlahlui ei hriet sunhai khawm ngainatna a thlahnuoi tiel tiel a. HMAR HLASUINA Pu L.Keivomin alo buotsaihai anga thar ei buotsai ta naw lem chun hun sawtnawtea chuh ei hlahlui umzie inthuk tak tak nei a khawtlang nun le inzula ei siemhai hih mithi kuong sunga ruong siehai leh an dangna um kher naw nih.Literature a hnam hmuhalna pawimaw em em chuh ei nunphung hla thua an lo inzawthai hi a nisi leiin Kohra thuoitu, Hmar Artiste Association (HAA) le Literature tienga thuoituhai theitawpa thang ei lak a tul hle a nih.

Kum 30 a upa vawisun chena thangtharhai hriet lar a ni hi a san iengdang khawm umin ka hriet nawh. Phuoktuhai tlangval laia an DITE lunglai hluozotu an ngai em em lanu zakuo tiel hak pathumhai khah inzak dawn der lova an ngaina inzawtsuokna thu hlaa siem a ni tlat an nawm. December Ni 5, 2016-a Hmar pumhuopa Sikpui Ruoi programme Diphu ah khan kava thangve a, ASAP Band, Haflong tienga sur thluk thluka perkhuong zut pawlhaiin an hung sak a. Zalen taka mipui hei lam dup dup kha chuh nunhlui liem hnung a hung tho sung sung a, kum tam tak liem hnung HSA hotu ni lai nun khah a hung inher suok tup tup el a ni khah. ‘A phuoktu ei ni lai a um a thu tawite hril raw seh’ an mi hung ti nawk nghal. Inzak inphak dawn der lovin Lunglai hluozotu Luahlo Lungdi mi nu mi pa ni hnung khawma ngaituo kir changa lungbawra a bung le chang thaibo thei lo, mang chena mang chang lem chuh tlep bawr bawra ei la kur-in-kukpui hlaa inzawt suokna thu tlawmte chuh ka hei phusuok kha tie. An thiem lawm lawm ngei.
Don't Miss
© all rights reserved
made with by Simon L Infimate