Hmasawnna Thar | 28 October, 2016

Election Officials hai an hung

CCPur: Kum 2017­a Assembly Election hung um ding le inzawma thil ṭul le pawimaw hai ngaituo dingin zanikhan CEO Manipur Office­a inthawk Statistics Officer Biren Singh inrawinain official iemanizat CCPur­ah an hung a, zani zantieng khan BRGF Resource Centre­ah AERO (SDOs/BDOs), ZEO, CMO, Dist. Social Welfare Officer, PO (ICDS) le election official hai meeting an neipui. Hi huna hin Election huna piengphunga ruolbanlo (Disable persons) han harsatna um lova vote an thlak theina dingin Govt. Schools haiah ramps a um le umnaw thu hai indawnna an siem. ZEO, CCPur chun, Govt. Schools buildings tamlem haia chun ramps a um thu a hril.

HSLC Private Centre Committee siem

CCPur:  Kum 2017­a High School Leaving Certificate (HSLC) Examination hung um ding le inzawmin zanikhan Churachandpur Private Centre Committee­2017 indin a nih. Officials dingin hieng a hnuoia hai hi thlang an nih.

           

President dingin T. Goukhomang, ZEO; Officer­ in­ Charge dingin T. Hanglamthang;  AOC/Confidential in Pumshong Hangshing; AOC Head Office dingin M. Chaoba Stanley; AOC dingin H. Liankhanlal; CL John, TS Mangcha Haokip, Ms Dimngaihman, Ms N. Vashti  bakah local educationist  C. Hangshing, MCS; David Piaklian, MPS, Dr Kim Simte, CMO, CCPur; Members in Higher le High Schools haia Principals/ Headmisters/ Headmistress hai le Supervising Invigilators dingin Thangkhanlal; Joy Yumnam, Ms Thiankhanvung; S. Ginzalian Ngaihte, Lalram­tlun, Okendro Sharma le Ms Kimbiaksang hai an nih. 

CM le MHJU ṭhuoituhai

CCPUr: Manipur CM O.Ibobi Singh fielna angin vawisun 1:00PM hin CM Bungalow, Imphal­ah Manipur Hill Journalists Union (MHJU) ṭhuoituhai chu CM in inpawlpui a tih. Hi huna hin Churachandpur, Chandel, Ukhrul, Tamenglong le Senapati haia MHJU ṭhuoituhai ṭhang an tih.

Nov. 4 chen hnina peklut thei

CCPUr: Nov. 23­27, 2016 inkar sung khin Manipur Sangai Festival a um ding a ni a. Hi huna CCPur District a inthawka hnam lam van entir nuomhai ta dingin Nov. 4, 2016 chen khin DC Office, CCPur­ah hnina lekha peklut thei ning a tih tiin DC, CCPur chun inhriettirna a siem.

EVM Familiarization/Mock Poll campaign

CCPur: District Election Office, CCPur hmalaknain EVM Familiarization/Mock Poll Campaign chu Oct. 27, 2016, 11AM khan CCPur khawpui sunga College tum tum haia ṭan a nih. Sun dar 11:00 in Don Bosco Hr. Sec. School­ah nei a ni a, Lunminthang Haokip, IAS, DC/DEO, Churachandpur in prog. a hawng a, Hnunliansang, Nodal Officer, Training Management, District Election Office, CCPur in  Electronic Voting Machine (EVM) chunthu hrilhrietna a nei. 

           

DC CCPur chun EVM hi company lien takin an siem, ṭha taka enfel a ni hnunga India rama kum iemanizat zet Election­a hmang a ni ta thu hrilin EVM function power point presentation a pek.  Zanikhan hiengang campaign hi CCPur Govt. College le Sielmat Christian Hr. Sec. School haia khawm nei niin ei thu dawngna chun a hril.

ICI Tuiṭhaphai Presby KṬP Conference

CCPur:  Independent Church of India (ICI) Tuiṭhaphai Presbytery Kristien Ṭhalai Pawl 56th Annual Conference chu Oct. 28­30, 2016 inkar sung khin “Kristqa ta dinga Ṭhalai” ti thupui hmangin Ngurte, CCPur hmuna 56th Annual Conference hmang an tih. Conference sunga thuhriltu dinghai chu Pro­pastor Joseph L. Khawbung, Rengkai; Rev. Michael Z. Zote, Academic Dean, SBC;  Rev. Rorelfel, Child Coordinator, ICI le  Rev. H.P. Runremthang, YCO,& EAL, ICI hai ning an tih.

CMO thar lawmpuina an nei

CCPur:  Ladies Prayer Fellowship (LPF), CCPur chun zani zingkar 8AM khan CMO/CCPur thar Dr Kim Simte chu a chengna an inhmupui a, CMO/CCPur thar dinga ruot a ni lawmpuina neiin   Memento an inhlan.

Review meeting nei ding

CCPur:  October 28, 2016, 11:00AM hin CMO Office Chamber, CCPur­ah review meeting um a tih. Hi huna hin Grand Hearing Aids distribution (NPPCD), NPCDCS, RBSK le PMSMA hai ennawnna le thu pawimaw dang dang hriltlang an tih. Hi huna hin CHC/PHC le Blocks 5 haia BPMs hai chu ṭhang seng dingin CMO, CCPur in an hriettir.

HYA Tuiṭhaphai JHQ Conference­cum­Election

CCPur:November 1, 2016, 10:00AM khin Khawmawi Community Hall­ah HYA Tuiṭhaphai Joint Headquarters Conference­cum­Election 2016 um a tih. Pu Vanlalhlun, President, HYA Tuiṭhaphai JHQ in well come address hril a ta, Tv. Lallienkhum Traite, Asst. Secy. HYA Tuiṭhaphai JHQ a inthawk secretary report ngaithlak ning a ta, Pu Ramhninglo, Fin. Secy a inthawk Finance report ngaithlak ni bawk a ta. Session II chawhnungtieng 1:00PM in HYA General Headquarters inrawinain HYA Tuiṭhaphai Jt. HQ ṭhuoitu thar ding thlangna (Election) um a ta, Pastor Lalrokim in thlangtlinga um hai intiemkamna inneitir a nih.

Manipur HC in MU an hriettir

Imphal: Kum 2016-­17Academic Session sunga Manipur University a Admission thawnaah Schedule Tribe hai ta dingin seats 31%, Schedule Caste hai ta dingin 2% le Other Backward Classes hai ta dingin seats 17% huol (reserve) pek dingin Manipur High Court chun Manipur University an hriettir. Hi chungchanga Court thutlukna chu October 26, 2016 khan puonglang a nih tiin Advocate BR Sharma chun a hril.

Thi chena hrem an ni ding

Imphal: Ningol Chakkouba le Diwali Kut hai suonlama hmanga Lagao (Dice Game) inkhel khap a nih. HI thupek bawsea thawluihai chu thi chena hrem ning an tih tiin KCP Poirei Meitei Lup chun zanikhan thusuok an siem. Lagao inhnel lo dinga warningnain Imphal East District a Khekwa le Top Awang Leikai hmun hai bakah Hreirangoithong Maibam Leikai­ah an cadres han hand grenades an lo sie ta niin KCP Poirei Meitei Lup thusuok chun a hril.

NSCN (IM) le inzawmna neia intum mi 5 man

Imphal: Manipur Police Commandos hai chun darker 24 liemta sung khan Imphal West District le Chandel district haiah NSCN(IM) le inzawmna nei nia intum mi 5 an man. Oct. 27, 2017, 8:35AM khan Imphal East District­a Fairy Land area­ah NSCN (IM) overground worker 4 an man a, Chandel district­a  Pallel bazar bul Forest gate lai pakhat an man bawk.

KIM le KOHRT han an dem

Imphal: Manipur CM O.Ibobi Singh le Ministerial team Oct. 24, 2016 nia Ukhrul an inzin ṭuma lo beituhai chu an dem hle thu Kuki Inpi Manipur (KIM) le Kuki Organisation for Human Rights Trust (KOHRT) hai chun zanikhan an puong. Tlangmihai chu CM le a ministerial team kalzawnga um an nih tia Gaidon Kamei, President, UNC in ṭawngbau a hmangnaa hin mipui kuomah thupha chawi raw seh tiin hieng pawl pahni hai hin an phut.

CPI ṭhuoitu han Governor an inhmupui

Imphal: Manipur a CPI State Secretary, Dr M. Nara Singh inrawinain zanikhan CPI Manipur ṭhuoitu han Raj Bhavan, Imphal­ah Manipur Governor Dr Najma Heptullah an inhmupui a, Imphal­Dimapur Road le Imphal­Jiribam Road haiah High Way Protection Force sie ding, hieng national  highway pahni hai siem ṭha ding, Manipur University buoina chingfel va dingin ngenna an siem.

Pak. enthlatu High Commission staff Akhtar chu darkar 48 sunga India suoksan dinga inhriettir;

An thlawppui Rajasthan mi 2 man; pakhat dang zawng mek

New Delhi: India sipai hai chetvel dan le thuruk a kawl leiin New Delhi­a Pakistan High Commission a thawk Mehmood Akhtar (35) chu Pakistan ram ta dinga enthlatu sin thaw ni dinga ringhla leia hun iemanichen an enthlak hnungin zani hmasa khan Delhi Police han an man a, a hnungin insuo nawk a nih. External Affairs Ministry Spokesperson Vikas Swarup chun Akhtar  ‘persona non­grata’(India rama la um pei dinga a ditnaw) puong an ni a, ama le a sunghai chu darkar 48 sung ngei ( Inrinni) chenah India ram suoksan dinga inhriettir an nih tiin a hril.  

   

Hi thil le inzawm hin Foreign Secretary S. Jaishankar chun Pakistan High Commissioner Abdul Basit chu zani zingkar khan inhmupuiin India ram kal zawnga chetnaa inrawlna nei Commission staff nei lo dingin an hriettir.

   

Mr Akhtar hi zani hmasaa kha Rajasthan­a cheng mi pahni haia inthawk India ram thuruk  (sensitive documents) a dawng dawng le kawl leia Delhi Police han an man a nih. A tir chun Mr Akhtar hin India mi nia inhrilin Mehboob Rajput ti hmunga Aadhar Card lem khawm Police hai an hmutir a, Chandni Chowk niin an hril bawk a nih. Amiruokchu, uluk taka thu indawnna nei a ni hnungin a hming tak chu Mehmood Akhtar a ni thu le Pakistan High Commission a thawk a ni thu an puong nawk a nih. A ngenna angina High Commission inhriettir a ni hnungin Pakistan High Commission official hai kuta inhlan nawk a nih.

   

Mr Akhtar chun, Pakistan Army­a  Baloch Regiment a lo ṭhang hlak a ni thu le January, 2013 a inthawk Pakistan Inter Service Intelligence (ISI) ah deputation­a hung le September, 2013 a inthawka kha Pakistan High Commission­a thawk ṭan a ni thu Police kuoma an puong.Pakistan High Commission­a visa section­a thawk a nih.

           

Hi thil le inzawma Rajasthan mi pahni mana um hai chu Maulana Ramzan le Subhash Jangir hai an  ni a, Delhi Court chun  an pahni hin ni 12 sung Police Custody­a la um phawt dingin a rel. Anni pahni baka hin hi thila inrawlna nei vea intum Jodhpur­a um passport and visa agent Shoib khawm man dinga zawng mek a nih.

RBI in pawisa lak fimkhur dingin

New Delhi: Reserve Bank of India (RBI) chun pawisa lem a tam leiin mipui hai chu Rs. 500/­ le Rs. 1,000 hai an lak hmain ṭha taka finfie phawta la ding le la fimkhur hle dingin an hriettir. Pawisa note lem indar zau pei ding dona kawngah mipui hai chu thlawp dingin Reserve Bank of India chun a ngen bawk. Pawisa note lem le tak hriet theina (security features) chu RBI website­a en thei dinga sie a nih.

Primary School building raw nawk

Srinagar:  Kashmir­a  chun  darkar 24 liemta sung khan tu ti hrietlo han Primary School building pakhat le motor pahni an raw nawk. July 8, 2016 nia Security forces han Hizbul Mujahideen helpawl Burhan Wani an kaphlumleia buoina suoka inthawk tuchena School building rawa um a 19­na a nitah. School building raw thara um hi Baramula district­a Pattan area­a Government Primary School a ni a, school building room 3 hai chu a kangsiet vawng a nih.

UPSC Prelims exam June, 2017­ah

New Delhi: Union Public Service Commission huoihawtnaa Indian Administrative Service (IAS), Indian Foreign Service (IFS), Indian Police Service (IPS) le a dang dang hai lakna dinga Civil Services Preliminary Exam nei hlak chu August ni loin June, 2017 a nei  ning a tih. Tuta hma kum 3 liemta haia khan chu UPSC in Civil Service Preliminary exam hi August thlaa a huoihawt hlak a nih. UPSC exam calendar dungzuiin civil services preliminary examination, 2017 chu June 18, 2017 in nei ning a tih. Hi thil hi examination process a hun taka zo hman a ni theina dinga thaw tum a nih. Kum 2016, 2015 le 2014 hai khan preliminary exam hi August thlaa nei an ni a, Kum 2013 khan May 26 a nei a ni bawk.

Central thawktu hai DA 2% a sukpung

New Delhi: Zanita Union Cabinet meeting chun sawrkar thlungpui hnuoia thawktu le pensioners Dearness Alloances (DA) chu 2% a sukpung dingin a remtih. Hi thil hi Central thawktu 50.68 lakh le pensioners 54.24 lakh han an hamṭhatpui ding a nih. DA pungna hi July 1, 2016 a inthawka hmang ṭan ding a ni a, DA sukpung lei hin sawrkar thlungpui chun kum khatah Rs. 5,622.10 crore a seng belsa ding a nih. Sawrkar thlungpui chun tukum kum bul tieng khan thawktu hai DA 6 percent a inthawk 126 percent in a lo sukpung ta a, sienkhawm 7th Pay Commission hmang a hung ni leiin basic pay leh merged nawk a ni a. Central Govt. employee unions chun a hma khan DA hi 3% a sukpung dingin an ngen a, sienkhawm sawrkar thlungpui chun 2% a sukpung a remti ta a nih.

EMPLOYMENT NEWS

1. Weights & Measures Department, Govt. of Manipur hnuoiah Inspector Post 4 (ST­1), Lady Inspector Post 1, Assistant Inspector post 4  (ST­1), LDC (OA) post 4 (ST­1), Driver (Heavy & light) post 2 le Peon Post 7 (ST­2) a ruok. Hieng sin ruokhai hi Employment Exchange fe thlenga lak ding a ni a, Employment Exchange a hming peklut theina hun nuhnungtak chu 10­11­2016 a nih. Application form chu Rs. 500 (General) le Rs. 250/­ (OBC, ST & SC) pekin 02­11­2016 a inthawk Controller, Weights & Measures Department, Manipur ah lak thei le fill up zovin Controller Office  a hin  16­11­2016 chenin peklut thei ning a tih.

           

2. Manipur  Human Rights Commission hnuoia Contract basis a kum khat sunga thawk ding Accountant, Computer Operator, LDC, Driver, Chowkidar (UR vawng) post khat seng le Peon post 2 (UR) a ruok. Application Form 14­11­2016 chenin peklut thei ning a tih. Sin ruokhai hi Employment Exchange Office fethlenga apply ding ti a nih.

VAWISUN THUPUI

Krista chu  kuta bawl hmun inthieng a tak  angpuia chun a lut si nawh a; tuhin Pathien hmaa ei aia ngir dingin vana ngei a lut ta lem a;

­ Hebrai 9:24

Editorial: Home Sweet Home

Mihriemhai hin beiseina hi nei naw ni inla chu dam man a umnaw hle ring a um. Beiseinain a mi ṭhuoi a, beiseina neiin sin ei thaw a, mani thei ang tawk sengin hma chu ei lak seng a nih. Beiseina ei nei leiin nuhmei pasal ei nei tawl a nih. Beiseina ei nei thil chi tum tum hai laia pakhat chu sungkuo inhawi le sungkuo ṭha, Home Sweet Home an lo ti hlak hi a ni awm ie. Nu le Pa ni ta hai po poin sungkuo inhawi siem hi thil awlai a ni der naw ti chu ei hrietchieng tawl hle ring a um. Ei ram, ei hnam, ei khawtlang le khawvelin a mamaw ngawi ngawi chu sungkuo ṭha hi a nih. Sungkuo ṭha nei seng inla chu khawvela hin dan siem ngai naw ni a, lungin bawl ṭul naw ni a, Police, sipai le ralthuom ṭha ei ti hai khawm hi ei mamaw ring a um nawh. 

   

Home Sweet Home nina le hlawtlingna chu in ropui le ṭha, sum le pai, hausakna, hmelṭhatna, thiemna, varna, ropuina, inlalna, thuneina, hlawtlingna, nina le insangna hai lei chu a ni naw tawp el. Chuong ninaw sienla chu milien le milal, mi ropui le mi hausa hai hi mani le mani inthat ngai naw nihai. Ei hriet seng angin tuta hma deu khan Arunachal Pradesh Chief Minister hlui Kalikho Pul chu CM bungalow a suoksan hmain ama le ama an that a ni kha. IAS Officer lien tak tak hai khawm an ni le an ni an inthat rawp hlak ti ei hriet seng.

   

Miin khawvel hi a pumin nei sienla, a nun chan si sienla, a ta dingin ieng am a sawtna um a ta? ti ang deu khan khawvel ropuina le hausakna ei ti hai hi sungkuo  inhawi le ṭha a um naw chun mihriemhai ta ding chun iengam a sawtna um a ta? Khum ṭha, mawi le manto, Dunlop sa le innem ṭha, foreign blanket manto le innem ṭha em em chungah zal inla khawm sungkuo ṭha, inrem le inhawi ei ni sinaw chun imu inhnik chuong naw nih. Sungkuo inhawi le ṭha ei ni phawt chun ngaidi in sungah chengin , ruo le rapa siem khuma khawm zal inla imu an hnik lem ring a um. Sungkuo inremlo hin mihriem nun chu a suk rinum hle a nih.

   

Kan inleng pasal pakhat in a hril ka la hriet zing. Churachangpur a mi hausa tak inah sin ka thaw a, zantieng bu fa nghal rawh an mi ti a. Bu fa dingin bufakna dawkanah  thleng mawi le nal tak tak, kei a ta ding chun ka vawikhat hmuna le hmangna ding, sa, nga, thlai le thil chi tum tum an sie ṭhup a, bu fa dinga dawkan kan hang kil tumlai tak chun kawtkhar a hung inhawng ṭhuoi a, an tlangval pakhat chu inrui em emin a hung lut a. Iengleia ka thu lova bu in fak tum a ti le inruolin bu fakna dawkan a nam thluk a, thleng le hme hai ṭuongah an dar eiuoi el a. Ka phing ṭam a re nghal hmak a, kha ni ang em ema ka hamhai le rinum ka tina kha ka la tawng ngai nawh. An in common room banga “Home Sweet Home” an tar chun umzie a nei naw hle tiin a hril.

   

In ṭha, in ropui le mawi tak tak, bur le bel manto tak tak, tulai tak le changkang em em el nei inla, ei chet dan hai hi sap hle (standard) sienkhawm a sunga chenghai hi ei inrem si naw chun umzie le hlutna nei chuong naw nih. Sungkuo ṭha, sungkuo inrem, sungkuo hlim thei le sungkuo inhawi hin umzie le hlutna nasa tak a nei lem. Khawvela inhnarum tak chu sungkuo ṭha, Home Sweet Home neithei hai hi an nih. Home Sweet Home a chun Pathien an lal tak a, a dawtah Nu le Pa an inlal hlak. Pathien inlalnawna, nu le pa hmusitna insungah sungkuo inhawi a um thei ngai nawh. Hi lei hin mi han vanram hnai tak chu sungkuo inhawi le ṭha leh an lo tekhi a nih.

   

Sungkuo inhawi le sungkuo ṭha um theina ding  chun ṭhangruol a ṭul. Tulaia ei rama ei harsatna lien tak chu thabona le thuawinawna hi a nih. Churachandpur Town sungah hin a ni nawk zuol bik. Nau le te hai thabona, nu le pahai thuawinawna, inzanawna le inphalamna an hriet ta der naw hin nu le pa hai a sukbeidawng a, thaw ngaina hre lo le beidawngin an inrum tlawk tlawk a nih. Nauhai chu nu le pa enkawl ding hrim an nih. Amiruokchu, tulai ṭhalai han an nuhmei le an nauhai chena nu le pa hai enkawl dinga ngaina lungril an nei hi an dik nawh. Hi lungril an put hi an bansan hmak a ṭul a nih.